ᐅᑭᐅᕐᑕᑐᒥ ᒪᓕᒉᑦ ᑐᖕᖓᕕᓕᕐᑐᑕᐅᒪᒍᑎᖏᓐᓄᑦ ᑲᑎᒪᓂᖅ: ᐃᖃᓗᓐᓂ, ᓅᕕᒻᐱᕆ 2, 2017

ᑖᓐᓇ ᓀᓪᓕᑎᕐᓯᒪᔪᖅ ᑐᓴᕐᑎᓯᒍᑎᒃ ᐃᖃᓗᓐᓂ ᑲᑎᒪᓂᐅᓚᐅᔪᒧᑦ ᓅᕕᒻᐱᕆ 2, 2017-ᖑᑎᓪᓗᒍ ᐅᑭᐅᕐᑕᑐᒥ ᒪᓕᒉᑦ ᑐᖕᖓᕕᓕᕐᑐᑕᐅᒪᒍᑎᖏᓐᓅᓕᖓᔪᓄᑦ.

ᑖᕙᑎ ᒪᒃᐃᒐᕐᒥᑦ

ᐃᓚᐅᔪᑦ

ᓄᓇᕗᑦ ᑐᖕᖓᕕᒃ ᑭᒡᒐᑐᕐᑎᖏᑦ, ᐃᓄᐃᑦ ᑲᑐᑦᔨᖃᑎᒌᓐᓂᖏᑦ, ᐃᓄᐃᑦ ᓄᓇᓕᓐᓂ ᒪᑭᑉᐸᓕᐊᒐᓱᐊᕐᓂᒥᓪᓗ ᐱᕙᓪᓕᐊᑎᑦᓯᓂᕐᒧᑦ ᑎᒥᐅᔪᑦ ᖄᖏᕐᓂᑯᓕᐅᕐᑏᓗ ᑐᑦᑕᕕᖓ ᑲᑎᓯᓚᐅᔪᑦ ᑲᕙᒪᑐᖃᒃᑯᑦ ᑎᐊᕆᑐᐊᕆᐅᓪᓗ ᑭᒡᒐᑐᕐᑎᖏᓐᓂᑦ ᓅᕕᒻᐱᕆ 2, 2017-ᒥ, ᑲᑎᒍᑎᖃᕐᓱᑎᒃ ᐅᑭᐅᕐᑕᑐᒥ ᒪᓕᒉᑦ ᑐᖕᖓᕕᓕᕐᑐᑕᐅᒍᑎᑦᓴᖏᓐᓄᑦ. ᑭᓇᒃᑯᑦ ᐃᓚᐅᔪᕕᓃᑦ ᖃᐅᔨᒪᔭᐅᖁᓇᒋᑦ, ᐊᑎᖏᑦ ᐊᓪᓚᑕᐅᓯᒪᖕᖏᑐᑦ, ᑭᓯᐊᓂ ᐅᖃᕐᑐᕕᓃᑦ ᐊᓪᓚᑕᐅᖁᔨᓯᒪᔪᑦ ᐊᑎᕐᒥᓂᒃ ᐊᓪᓚᑕᐅᓯᒪᓚᖓᑦᓱᑎᒃ.

ᓱᓇᒨᓕᖓᓂᖏᑦ ᐊᒻᒪᓗ ᐅᖃᐅᓯᑦᓭᑦ ᑐᖕᖓᕕᓕᕐᑐᐃᒍᑎᑦᓴᓄᑦ

ᑐᑭᓯᓇᕐᑎᓯᒪᑦᓯᐊᑐᖅ ᐅᑭᐅᕐᑕᑐᒥ ᐃᓂᓪᓚᖓᐅᓯᖅ

ᐃᓂᓪᓚᖓᐅᓯᐅᔪᐃᑦ ᐊᓯᑦᔨᑐᕐᑕᐅᓂᖏᑦ

  • ‎ᑲᑎᒪᒋᐊᕐᓯᒪᔪᑦ ᐅᖃᕐᓯᒪᔪᑦ ᑭᖕᖒᒪᓇᕐᓂᖓᓂᑦ ᐊᓯᑦᔨᑐᐃᓂᖅ, "ᑲᓇᑕᒥᐅᓂᒃ ᐱᕙᓪᓕᐊᑎᑦᓯᓂᕐᓂᖅ ᐃᓂᓪᓚᖓᐅᓯᓕᐅᕐᓂᒧᑦ ᓄᓇᖃᕐᕕᐅᔪᒥ. ᐃᓕᑕᕆᔭᐅᓂᖃᕐᓱᓂᓗ ᑕᒪᓐᓇ "ᐃᓅᓯᕐᒥᒃ ᐊᓯᑦᔨᑐᐃᓂᕐᒧᑦ" ᐊᑐᕐᑐᓴᓕᐅᕐᓂᖅ ᐊᑭᑐᔫᓚᖓᒋᐊᖓ, ᑲᑎᒪᒋᐊᕐᓯᒪᔪᑦ ᐅᖃᕐᓯᒪᔪᑦ ᓈᒻᒪᓈᕐᑐᓂᒃ ᐊᑐᕐᑐᓴᓕᐅᕐᓂᖅ ᐊᑯᓃᕐᑐᒥᒃ ᓯᕗᓂᕐᒥᒃ ᐱᐅᓂᕐᓴᐅᓚᖓᒋᐊᖓ.
  • ᒫᓐᓇᐅᔪᒃᑯᑦ ᐃᓂᓪᓚᖓᐅᓯᓕᐅᕈᓰᑦ, ᐃᓚᒋᔭᐅᑎᓪᓗᒋᑦ ᐃᓪᓗᖃᕐᑎᓯᓃᑦ, ᐅᖃᕐᑕᐅᓯᒪᔪᖅ ᓲᕐᓗ "ᒪᑦᑐᓯᕆᓂᑐᐃᓐᓇᐅᑎᓪᓗᒍ" ᑎᐅᕆᑐᐊᕆᒥᒃ ᓯᕗᒧᐊᕐᐸᓕᐊᑎᑦᓯᒐᓂ.
  • ᑲᑎᒪᒋᐊᕐᓯᒪᔪᑦ ᐅᖃᕐᓯᒪᔪᑦ ᓄᓇᕘᒥᐅᑦ ᐱᐅᓂᕐᓴᐅᑎᑕᐅᒐᓱᐊᕐᓂᒥᒃ ᕿᓂᖕᖏᑑᒋᐊᖏᑦ - ᑭᓯᐊᓂ ᐃᓅᓯᖃᕈᒪᓂᕋᕐᓱᑎᒃ ᑌᒫᑦᓭᓇᖅ ᖃᓪᓗᓈᓂᒥᐅᑦ ᐃᓱᕐᕆᐅᑎᖏᓐᓂᑦ ᐱᑕᖃᕐᑎᑕᐅᓗᑎᒃ. ᐊᑕᐅᓯᖅ ᐃᓄᒃ ᐅᖃᕐᓯᒪᔪᖅ ᐱᑐᑦᓯᒪᐅᑏᑦ ᐊᕐᖁᑎᖏᑦ ᐱᐅᑦᓯᐊᑎᓐᓇᒋᑦ, ᐃᓕᓐᓂᐊᑏᑦ ᐅᑭᐅᕐᑕᑐᒥᐅᑦ ᑭᖑᓯᕐᑐᑦ ᖃᓪᓗᓈᑦ ᐃᓕᓐᓂᐊᑏᑦ ᓴᓂᐊᓂᑦ.
  • ᑲᑎᒪᒋᐊᕐᓯᒪᔪᑦ ᐅᖃᕐᓯᒪᔪᑦ ᓄᓇᕘᒥᐅᑦ ᐱᕙᓪᓕᔭᐅᓚᖓᖕᖏᒋᐊᖏᑦ ᑲᕙᒪᑐᖃᒃᑯᑦ ᐃᓂᓪᓓᒍᑎᒋᓯᒪᔭᖏᓐᓄᑦ ᐃᓚᐅᕕᖃᕈᓐᓇᐅᑏᑦ ᐱᒍᑦᔨᐅᑎᓄᑦ ᒪᓕᒉᑦ ᓯᑎᔫᓗᐊᕐᒪᑕ. ᑲᑎᒪᒋᐊᕐᓯᒪᔪᑦ ᐅᖃᕐᓯᒪᒻᒥᔪᑦ ᐃᖏᕐᕋᐅᑎᓕᕆᓂᕐᒧᑦ ᐃᓂᓪᓚᖓᐅᓰᑦ ᐊᑐᕐᓂᖃᖕᖏᑑᒋᐊᖏᑦ ᖃᓪᓗᓈᓂᒥᐅᓅᓕᖓᓂᕐᓴᐅᒪᑕ.

ᓄᓇᕘᒥᑦ ᐊᑦᔨᐅᖏᑦᑐᐃᑦ ᐃᓂᓐᓚᖓᐅᓰᑦ ᑭᖕᖒᒪᓇᕐᑐᑦ

  • ᑲᑎᒪᒋᐊᕐᓯᒪᔪᑦ ᐅᖃᕐᓯᒪᔪᑦ ᓄᓇᕘᒥᑦ ᑭᖕᖒᒪᓇᕐᑐᓂᒃ ᐃᓂᓪᓚᖓᐅᓯᐅᒋᐊᓕᓐᓂᒃ, ᐃᓚᖃᕐᓱᑎᒃ ᓄᓇᕗᑦ ᐊᖏᓂᖓᓂᑦ ᐅᖓᓯᓐᓂᕇᓐᓂᖏᓐᓂᓗ ᓄᓇᓖᑦ, ᐃᓚᖃᕐᓱᑎᒃ ᐃᓅᓯᐅᑉ ᐊᓯᑦᔨᓯᒪᓕᕐᓂᖓᓂᑦ, ᐱᐅᓯᑐᖃᕐᒥᑦ ᐅᓪᓗᒥᒧᑦ.  ᑕᒪᓐᓇ ᐊᓯᑦᔨᓂᖅ, ᓄᓇᓕᖕᖑᑎᑕᐅᓯᒪᓂᖏᓪᓗ ᐃᓄᐃᑦ, ᑐᑭᓕᒃ ᐊᒥᓱᑦ ᓄᓇᓖᑦ ᐊᑕᐅᑦᓯᑯᑦ ᓄᓇᖕᖑᑎᑕᐅᓯᒪᕗᑦ. ᓄᓇᕘᑦ ᑌᒪᖕᖓᑦ ᐊᑦᓱᕈᕈᑎᖃᖃᑦᑕᑐᖅ "ᑭᖑᓪᓕᕇᑦᑐᓂᒃ" ᐃᓂᓪᓚᖓᐅᓯᑦᓴᓕᐅᕐᓂᒥᒃ ᐃᓪᓗᔪᐊᑦ ᓄᓇᓕᓐᓂ ᓄᑕᐅᖕᖏᑐᕈᕐᐸᓕᐊᑎᓪᓗᒋᑦ ᓄᓇᕘᓕᒫᒥᑦ.
  • ᑲᑎᒪᒋᐊᕐᓯᒪᔪᑦ ᐅᖃᕐᓯᒪᒻᒥᔪᑦ ᓄᓇᕘᑦ ᑭᖕᖒᒪᒋᔭᖏᑦ ᑖᒃᑯᐊᑎᑐᑦ ᓅᑕᐅᓚᐅᕐᓯᒪᔪᑦ ᖁᑦᓯᑐᒧᑦ ᑭᖕᖒᒪᑦᓯᒋᐊᖏᑦ, ᑲᓇᑕᐅᑉ ᑲᕙᒪᖓᓂᑦ ᓱᓪᓕᑐᐃᖁᔨᓕᕐᓱᑎᒃ ᐊᑑᑎᑎᑦᓯᓚᖓᒍᑎᒋᓯᒪᔭᕐᒥᓂᒃ ᑲᔪᓯᑎᑦᓯᖁᔨᑦᓱᑎᒃ ᓴᐳᒻᒥᔭᐅᒋᐊᖃᕐᓂᖏᓐᓂᑦ ᖁᑦᓯᑐᒧᑦ ᓅᑕᐅᒪᔪᐃᑦ.
  • ᑲᑎᒪᒋᐊᕐᓯᒪᔪᑦ ᐅᖃᕐᓯᒪᔪᑦ ᐱᓀᓗᑕᐅᔪᓂᒃ ᑮᓇᐅᔭᕐᑐᑎᑦᓯᒍᓯᐅᓲᓄᑦ ᐃᓪᓗᔪᐊᓕᐅᕐᓂᒧᑦ ᓈᒻᒪᓈᖕᖏᒪᑕ ᐅᑭᐅᕐᑕᑐᒥ ᑭᖕᖒᒪᓇᕐᑐᓄᑦ.
  • ᑲᑎᒪᒋᐊᕐᓯᒪᔪᑦ ᐅᖃᕐᓯᒪᔪᑦ ᐃᓪᓗᔪᐊᖃᑦᓯᐊᕆᐊᖃᕐᓂᖏᑦ ᐱᒻᒪᕆᐅᒋᐊᖓ ᐋᕐᕿᕈᑎᑦᓴᑐᐊᖑᒻᒪᑦ ᐃᓅᓯᐅᑉ ᐃᓂᓪᓚᖓᑦᓯᐊᖏᓐᓂᖏᓐᓄᑦ. ᐆᑦᑐᕋᐅᑎᐅᑦᓱᓂᓗ ᐃᓪᓗᐃᓂᐊᕐᓂᖅ, ᐅᖃᕐᓱᓂᓗ ᐊᒥᓱᐃᑎᒍᑦ ᐃᓅᓯᐅᑉ ᐃᓂᓪᓚᖓᑦᓯᐊᖏᑦᑑᒍᑎᖏᑦ - ᐃᓕᓐᓂᐊᓯᒪᑦᓯᐊᖏᓐᓃᑦ, ᓂᕿᖃᑦᓯᐊᖏᓐᓃᑦ, ᐃᓕᒪᓇᕐᑐᒦᒋᐊᖃᖕᖏᓃᑦ, ᓴᐳᒻᒥᔭᐅᒪᐊᖃᕐᓂᖏᑦ ᐱᓗᑲᓐᓂᐅᔪᓄᑦ, ᐃᓱᒪᐅᑉ ᖃᓄᐃᖕᖏᓯᐊᕆᐊᖃᕐᓂᖓ - ᑕᒪᒃᑯᐊ ᐱᓀᓗᑌᑦ ᓄᐃᓯᒪᔪᑦ ᐃᓪᓗᐃᓂᐊᕐᓂᖅ ᐱᑦᔪᑎᐅᑎᓪᓗᒍ: "ᑐᖕᖓᕕᖃᓪᓚᕆᑦᑐᖅ ᑭᓇ ᖃᕆᐊᖃᕈᓐᓇᒪᖔᑦ"

ᓄᓇᖃᕐᕕᐅᔪᑦ ᐊᑦᔨᒎᒌᖕᖏᑑᓂᖏᑦ

  • ᑲᑎᒪᒋᐊᕐᓯᒪᔪᑦ ᐅᖃᕐᓯᒪᔪᑦ ᓄᓇᖃᕐᕕᐅᔪᓕᒫᑦ ᓄᓇᕘᒥᑦ ᐊᑦᔨᒌᖕᖏᑐᓂᒃ ᑭᖕᖒᒪᒋᔭᓖᓐᓀᑦ, ᑖᒃᑯᐊ ᓄᓇᖃᕐᕕᐅᔪᑦ ᐃᓚᐅᕕᖃᕆᐊᖃᕐᓱᑎᒃ ᐃᓂᓪᓚᑎᕆᖃᑎᐅᓗᑎᒃ ᑭᖕᖒᒪᓇᕐᑐᓂᒃ.
  • ᑲᑎᒪᒋᐊᕐᓯᒪᔪᑦ ᖃᐅᔨᒪᔪᑦ ᐃᓄᐃᑦ ᑲᑐᑦᔨᖃᑎᒌᓐᓂᖏᑦ ᐱᕙᓪᓕᐊᑎᑦᓯᑎᓪᓗᒋᑦ ᓄᑭᑖᓕᐅᒥᑦᑎᓯᑎᓪᓗᒋᓪᓗᒍ ᐊᕐᖁᑎᖃᕐᓗᑎᒃ ᑮᓇᐅᔭᓂᒃ, ᐱᓚᓱᖃᑎᖃᕈᓐᓇᓂᖅ ᑲᓇᑕᐅᑉ ᑲᕙᒪᖓᓂᑦ ᓄᐃᑕᐅᕙᓪᓕᐊᒍᓐᓇᕆᐊᖓ. ᑲᑎᒪᒋᐊᕐᓯᒪᔪᑦ ᐃᓚᖏᑦ ᓈᒻᒪᓴᖕᖏᓂᕋᕐᓯᒪᔪᑦ ᓄᓇᕗᑦ ᑲᕙᒪᖓᑕ ᒪᓕᓪᓗᑯᐊᐱᒋᐊᓕᖏᓐᓂᑦ ᑐᑦᓯᕋᐅᑎᓕᐅᕐᓂᒧᑦ ᑲᓇᑕᐅᑉ ᑲᕙᒪᖓᓂᑦ ᑮᓇᐅᔭᖃᕐᑎᓯᒍᑎᐅᓂᐊᕐᑐᓄᑦ ᐃᓪᓗᔪᐊᓕᐅᕐᓂᒧᑦ.

ᑭᖕᖒᒪᓇᓪᓗᑐᕐᑐᑦ ᐃᓪᓗᔪᐊᑦ

  • ᐅᖄᒍᑎᐅᔪᖅ ᐱᕕᑦᓴᐅᒍᓐᓇᓂᖓ ᓄᓇᓕᐅᖃᑎᒌᑦ ᐱᑐᑦᓯᒪᒋᐊᖃᕐᓂᖏᑦ ᓄᓇᕘᒥ, ᖃᓪᓗᓈᑦ ᓄᓇᖓᓂᑦ ᐱᓯᒪᖕᖏᓂᕐᓴᐅᓗᑎᒃ ᐱᑐᑦᑎᕆᓃᑦ. ᓄᓇᓖᑦ ᐱᑐᑦᓯᒪᓕᐅᒥᓕᕐᐸᑕ ᐃᓅᒐᓱᐊᕐᓂᐅᑉ ᐊᑭᑐᔫᓂᖓᓂᑦ ᐃᑯᓪᓚᑎᑦᓯᒐᔭᕐᑐᖅ ᐃᑭᓪᓕᑎᕆᓗᓂᓗ ᖃᖓᑦᑕᔫᒃᑯᑦ ᑎᑭᑉᐸᑐᓂᒃ ᓄᓇᓕᓐᓄᑦ.
  • ᖃᕆᑕᐅᔭᒃᑯᑦ ᐱᑐᑦᓯᒪᐅᑏᑦ ᐊᕐᖁᑎᖏᑦ ᑭᖕᖒᒪᔭᐅᔪᖅ ᓄᓇᕘᒥᑦ ᓄᑖᑦ ᐱᑐᑦᓯᒪᐅᑏᑦ ᐊᕐᖁᑎᖏᑦ ᓴᓇᔭᐅᒋᐊᓕᑦ.
  • ᑲᑎᒪᒋᐊᕐᓯᒪᔪᑦ ᐅᖃᕐᓯᒪᔪᑦ ᐊᕐᖁᑏᑦ ᑭᖕᖒᒪᓇᕐᓂᖏᓐᓂᑦ, ᒥᕝᕖᑦ ᐋᕐᕿᓱᕐᑕᐅᒋᐊᓪᓛᕆᐊᖃᕐᓂᖏᑦ, ᐄᒐᕐᕖᓗ. ᐱᓇᓱᐊᕐᑕᐅᒐᔭᕐᒥᔪᖅ ᐊᕐᖁᓯᐅᕐᓂᖅ ᑰᑦᔪᐊᕌᓗᒻᒥᑦ ᑭᕙᓪᓕᐅᑉ ᓄᓇᓕᖏᓐᓄᑦ, ᐊᒻᒪᓗ ᐄᒐᕐᕖᑦ ᓄᑕᐅᓯᓕᕐᑎᑕᐅᓗᑎᒃ ᓴᐳᒻᒥᒍᑎᐅᓂᐊᕐᑐᑦ ᐃᖃᓪᓕᐊᑐᓕᕆᕕᖓᓂᑦ ᑭᒻᒥᕈᒻᒥ ᐊᒻᒪᓗ ᓇᐅᔮᓂᑦ, ᑕᓪᓗᕈᑎᐅᑉ ᑕᕿᐅᖓᓄᑦ ᖃᓂᒋᐊᔮᖑᒻᒪᑦ.
  • ᐊᑕᐅᓯᖅ ᐅᓐᓂᑑᑎᖃᕐᓯᒪᔪᖅ ᐱᕕᑦᓴᐅᒐᔭᕐᓂᖓᓂᑦ "ᓯᓐᑦ-ᓗᐊᕋᓐᔅ ᑯᖓ" ᐊᕐᖁᑎᒋᔭᐅᒍᓐᓇᕋᔭᕐᒪᖔᑦ ᑕᓪᓗᕈᑎᐅᑉ ᑕᕆᐅᖓᒎᓯᔪᓄᑦ, ᐃᓕᓐᓂᐊᓯᒪᔪᑦ ᐅᒥᐊᓕᕐᑌᑦ ᐊᖁᖃᑦᑕᕋᔭᕐᑎᓗᒋᑦ ᐅᒥᐊᕐᔪᐊᓂᑦ.
  • ᐅᖄᒍᑎᐅᔪᖅ ᐃᓗᕐᖁᕐᓯᓕᕆᕖᑦ ᓄᐃᑕᐅᒋᐊᖃᕐᓂᖏᑦ, ᐃᓚᒋᔭᐅᑎᓪᓗᒋᑦ ᒫᓐᓇᐅᔪᒃᑯᑦ ᐱᑕᖃᕐᑎᑕᐅᔪᑦ ᑭᕙᓪᓕᖅ ᐃᓄᐃᑦ ᑲᑐᑦᔨᖃᑎᒌᓐᓂᖓᓄᑦ ᓴᓇᒐᔭᕐᑐᓄᑦ ᓄᓇᓕᓐᓂ ᐃᓗᕐᖁᓯᓕᕆᕕᓐᓂᑦ, ᐃᓚᒋᔭᐅᑎᓪᓗᒍ ᐱᕕᑦᓴᐅᑐᐃᓐᓇᕆᐊᓕᒃ ᓄᓇᕘᒥ ᐃᓗᕐᖁᓯᓕᕆᕕᒻᒪᕆᒃ.

ᓲᖑᔪᐃᑦ ᐅᑭᐅᕐᑕᑐᒥᐅᑦ ᐃᓄᖏᑦ ᓄᓇᓕᖏᓪᓗ

ᐃᓕᓐᓂᐊᓂᓕᕆᓂᖅ

  • ᑲᑎᒪᒋᐊᕐᓯᒪᔪᑦ ᐅᖃᕐᓯᒪᔪᑦ ᓄᓇᕘᑦ ᐃᓕᓐᓂᐊᓂᓕᕆᕕᖓ ᓲᖑᓯᐅᒥᒋᐊᖃᕐᓂᖓᓂᑦ, ᐃᓚᒋᔭᐅᑎᓪᓗᒋᑦ ᐳᕐᑐᓂᕐᓴᕆᐊᓪᓚᒥᒃ ᐃᓕᓐᓂᐊᕈᓐᓇᓂᖅ, ᓄᓇᓖᓪᓗ ᐅᑉᐱᕆᔭᖃᕈᓐᓇᕆᐊᖃᕐᓂᖏᓐᓂᑦ ᐃᓕᓐᓂᐊᓂᓕᕆᕕᒻᒥᒃ ᐃᓕᓐᓂᐊᕆᐊᕐᑎᑕᐅᖃᑦᑕᓯᒪᓃᑦ ᑭᖑᓂᖓᒍᑦ.
  • ᐱᒻᒪᕆᐅᓂᖓ ᓲᖑᓯᐅᒥᑎᑦᓯᓂᖅ ᐃᓕᓐᓂᐊᓂᓕᕆᓂᕐᒥᒃ, ᐃᓕᓐᓂᐊᑎᑦᓯᔨᓂᒃ ᐱᓇᓱᑦᑎᑖᕐᓂᑐᐃᓐᓇᐅᖏᑦᑐᑯᑦ ᓄᕐᖃᑎᑦᓯᑌᓕᓂᑐᐃᓐᓇᐅᖏᑦᑐᑯᓪᓗ, ᑭᓯᐊᓂ ᓄᐃᑕᐅᓂᖏᑎᒍᑦ ᐃᓕᓐᓂᐊᑎᓂᒃ ᐃᓱᐊᕐᓭᔩᑦ ᐃᓕᑦᓯᓯᕇᑦᑐᐃᓗ ᓇᐅᑦᓯᑐᕐᑕᐅᒍᓯᖏᓐᓂᒃ. ᑲᑎᒪᒋᐊᕐᓯᒪᔪᑦ ᐃᑉᐱᒋᔭᓖᑦ, ᐃᓕᓐᓂᐊᑎᑦᓯᔨᖃᑦᓯᐊᖏᓐᓂᖅ ᐱᑦᔪᑎᐅᑎᓪᓗᒍ, ᓄᓇᕘᑦ ᓯᕗᒧᐊᕈᓐᓇᓚᖓᖕᖏᑐᖅ ᑕᒪᒃᑯᓂᖓ ᐱᓀᓗᑕᐅᔪᓂᑦ.
  • ᑲᑎᒪᒋᐊᕐᓯᒪᔪᑦ ᓴᐳᒻᒥᔭᐅᓂᕐᓴᐅᒍᒪᔪᑦ ᑲᕙᒪᑐᖃᒃᑯᓄᑦ ᐱᐊᕋᐃᑦ ᐱᓪᓗᒋᑦ ᐯᕐᓯᕕᓐᓃᑐᑦ ᐃᓕᓐᓂᐊᑎᑕᐅᒍᑎᖏᓐᓄᑦ, ᐅᖃᕆᐊᓪᓚᓱᑎᒃ ᐯᕐᓯᕕᓐᓂ ᐃᓕᓐᓂᐊᑎᑕᐅᑲᐱᓐᓂᖅ ᐱᕙᓪᓕᓇᕐᑑᒋᐊᖓ, ᐃᓚᒋᔭᐅᑎᓪᓗᒍ ᐃᓱᒪᒧᑦ ᐱᐅᔫᓂᖓ. ᐃᓕᓐᓂᐊᑎᑕᐅᑲᐱᓐᓃᑦ ᐊᖓᔪᕐᖄᕆᔭᐅᔪᓂᒃ ᐃᑲᔪᕐᓯᒥᔪᖅ, ᐱᓗᐊᕐᑐᒥ ᐊᓈᓇᒋᔭᐅᔪᓄᑦ, ᐱᓇᓱᕝᕕᓂ ᐃᓕᓐᓂᐊᓂᓕᕆᕕᓐᓂᓗ.
  • ᑲᑎᒪᒋᐊᕐᓯᒪᔪᑦ ᐅᖃᕐᑐᐃᓀᑦ ᑖᒃᑯᐊᓕᒫᖅ ᐃᓕᓐᓂᐊᓂᕆᓂᕐᒥᒃ ᐱᒍᑦᔨᐅᑏᑦ ᓴᐳᒻᒥᒍᑏᓪᓗ ᓲᖑᓯᐅᒥᑎᑕᐅᒐᔭᕐᓂᖏᓐᓂᑦ ᑐᖕᖓᕕᓕᕐᑐᑕᐅᓯᒪᒍᑎᒃ ᐃᓄᐃᑦ ᐃᓗᕐᖁᓯᖓᓂᑦ ᐅᖃᐅᓯᖓᓐᓂᓗ.
  • ᑲᑎᒪᒋᐊᕐᓯᒪᔪᑦ ᐅᖄᒍᑎᓖᑦ ᑭᖕᖒᒪᓇᕐᓂᖓᓂᑦ ᐃᓕᓐᓂᐊᕕᕐᔪᐊᖅ ᐃᓄᐃᑦ ᓄᓇᖓᓂᑦ.

ᐃᓄᓕᕐᑌᑦ ᓂᖀᑦ

  • ᑲᑎᒪᒋᐊᕐᓯᒪᔪᑦ ᐅᖃᕐᑐᐃᑦ ᐃᓄᓕᕐᑌᑦ ᓂᖀᑦ ᐱᓇᓱᒐᕐᑖᑎᑦᓯᒍᑎᐅᒍᓐᓇᓂᖓᓂᑦ ᐱᕙᓪᓕᐊᑎᑦᓯᒍᑎᐅᓗᓂ ᒪᑭᑉᐸᓕᐊᒐᓱᐊᕐᓂᒥᒃ ᑮᓇᐅᔭᑎᒍᑦ ᐃᑲᔪᕐᓯᒐᔭᕐᒪᑦ ᐃᓅᓯᐅᑉ ᐃᓂᓪᓚᖓᐅᓯᖓᓂᑦ.
  • ᑲᑎᒪᒋᐊᕐᓯᒪᔪᑦ ᐅᖃᕐᓯᒪᔪᐃᓐᓀᑦ ᐃᓄᓕᕐᑕᓂᒃ ᑭᓯᐊᓂ ᓂᕿᖃᕈᒪᓂᕋᕐᓱᑎᒃ, ᑭᓯᐊᓂ ᑲᕙᒪᑐᖃᒃᑯᑦ ᒪᓕᒐᖏᑦ ᓴᐳᒻᒥᖏᑦᑐᑦ ᐃᓄᓕᕐᑌᑦ ᓂᖀᑦ ᓂᕿᑦᓴᓯᐅᕈᑎᐅᒍᓐᓇᓂᖏᓐᓂᑦ, ᓂᐅᕕᐊᑦᓴᓕᐊᖑᓗᑎᒃ ᓂᕿᒋᔭᐅᒍᓐᓇᓗᑎᓗ. ᑲᑎᒪᒋᐊᕐᓯᒪᔪᑦ ᐅᖃᕆᐊᓪᓚᑐᑦ ᐃᓅᖃᑎᒌᑎᒍᑦ ᐱᕙᓪᓕᓇᕐᑑᒐᔭᕐᓂᖓᓂᑦ ᓄᓇᓖᓪᓗ ᒪᑭᑕᒐᓱᐊᕈᑎᒋᒍᓐᓇᕋᔭᕐᑕᖓᓂᑦ ᐃᓄᓕᕐᑌᑦ ᓂᖀᑦ ᐱᔭᐅᓂᕐᓴᐅᐸᑕ. ᐱᕕᑦᓴᐅᒐᔭᕐᒥᔪᖅ ᐃᓄᓕᕐᑌᑦ ᓂᖀᑦ ᐱᕈᕐᑐᐃᓗ ᑕᐅᕐᓰᒍᑎᐅᒍᓐᓇᕋᔭᕐᓂᖏᓐᓂᑦ ᐊᓯᖏᓐᓄᑦ ᓱᓇᑐᐃᓐᓇᓄᑦ ᓂᐅᕕᐊᑦᓴᓄᑦ ᐱᒍᑦᔨᐅᑎᓄᓪᓗ.
  • ᖃᐅᔨᒪᔭᐅᔪᓂᒃ ᐅᖄᑦᓱᑎᒃ ᐊᑑᑎᓯᒪᔪᓂᒃ ᐃᓄᓕᕐᑌᑦ ᓂᖀᑦ ᐊᐅᓚᑕᐅᓂᕆᓱᖏᓐᓂᑦ, ᐊᑕᐅᓯᖅ ᐅᓐᓂᑑᑎᓕᒃ ᐅᑭᐅᕐᑕᑐᒥ ᓂᕿᑦᓯᐊᓂᒃ ᐊᑭᑭᓪᓕᒋᐊᕆᒍᑎᒃ ᐊᕐᖁᑎᐅᒍᓐᓇᕋᔭᕐᑎᓗᒍ ᐊᐅᓚᑦᓯᓂᕐᒧᑦ ᐃᓄᓕᕐᑕᓂᒃ ᓂᕿᓂᖅ ᓄᓇᕘᑦ ᐃᓗᐊᓂ, ᓄᓇᖃᕐᕕᐅᔪᑦ ᐆᒪᔪᖃᖕᖏᓂᕐᓭᑦ ᐃᓄᓕᕐᑕᓂᒃ ᓂᕿᑖᒍᓐᓇᓯᖃᑦᑕᕋᔭᕐᒪᑕ ᓄᓇᓖᑦ ᐊᓯᖏᓐᓂᑦ. ᑕᒪᓐᓇ ᐱᒍᑦᔨᐅᑎᒃ ᑲᔪᖏᕐᓭᒋᐊᓪᓚᕋᔭᕐᑐᖅ ᐆᒪᔪᕐᓯᐅᓂᕐᒥᒃ ᓴᐳᒻᒥᒍᑎᐅᓗᓂᓗ ᒪᑭᑕᒐᓱᐊᕐᓂᒥᒃ ᐱᕙᓪᓕᐊᑎᑦᓯᓂᕐᒥᒃ ᐊᒻᒪᓗ ᐆᒪᔪᕐᓯᐅᑎᓂᒃ.

ᐃᓪᓗᓕᕆᓂᖅ

  • ᐃᓪᓗᓕᕆᓂᖅ ᐊᑕᐅᓯᐅᖕᖏᑐᓄᑦ ᓂᓪᓕᕈᑎᐅᖃᑦᑕᑐᖅ ᑭᖕᖒᒪᓇᕐᑐᓚᕆᐅᒋᐊᖓ ᐃᓪᓗᐃᓂᐊᕐᓂᓗ ᓇᓗᓀᕐᑕᐅᓱᓂ ᓱᕐᕋᐃᓚᕆᑦᓯᒪᒋᐊᖓ ᐃᓅᓯᐅᑉ ᐃᓂᓪᓚᖓᑦᓯᐊᖏᑦᑑᓕᕐᓂᖓᓂᑦ ᒪᑭᑕᒐᓱᐊᕐᓂᒥᓪᓗ ᐊᑦᓱᕈᕐᓇᑑᑎᑦᓯᒋᐊᖓ.
  • ᑲᑎᒪᒋᐊᕐᓯᒪᔪᑦ ᐅᖄᒍᑎᖃᕐᒥᔪᑦ ᐊᐴᒪᓘᑎᐅᓲᓂᑦ ᐃᓄᓐᓂᒃ ᐱᒍᑦᔨᐅᑎᐅᒐᔭᕐᑐᑦ ᓄᐃᑕᐅᕐᖃᔭᖕᖏᓂᖏᓐᓄᑦ. ᑌᒪᖕᖓᓗ ᐱᒍᑦᔨᐅᑏᑦ ᕿᒥᕐᕈᔭᐅᒋᐊᓪᓛᔪᑦ, ᒫᓐᓇᓯᐅᑎᑐᐃᓐᓀᓗ ᐱᒍᑦᔨᐅᑏᑦ ᓄᐃᑕᐅᓕᐅᒥᔮᕐᑕᓂᖏᑦ ᐊᑦᓱᕈᕐᓇᓂᖓᓗ ᐸᕐᓇᓯᒪᐅᑎᓕᐅᕋᓱᐊᕐᓂᖅ ᓯᕗᓂᕐᒧᑦ ᐱᓇᓱᐊᖃᑎᒋᒐᓱᑦᓱᒍ ᑲᕙᒪᑐᖃᒃᑯᑦ ᑮᓇᐅᔭᓕᕆᒍᓯᖏᑦ ᐊᑦᓱᕈᕐᓇᑐᓂᒃ ᓄᐃᑦᓯᖃᑦᑕᒪᑕ ᐊᑯᓃᕐᑐᒥᒃ ᐸᕐᓇᓯᒪᐅᑎᓕᐅᕋᓱᐊᓕᕐᓱᓂ.
  • ᑲᑎᒪᒋᐊᕐᓯᒪᔪᑦ ᐅᖃᕐᑐᑦ ᐊᒥᓱᓂᒃ ᐆᑦᑐᕋᐅᑎᖃᕆᐊᖓ ᐊᑑᑎᔭᐅᒍᓐᓇᓯᖃᑦᑕᓯᒪᔪᓂᒃ "ᓄᓇᕘᒥᑦ ᓄᐃᑕᐅᔪᓂᒃ" ᐋᕐᕿᕈᑎᑦᓴᓂᒃ ᐃᓅᖃᑎᒌᓄᑦ ᒪᓕᒐᐅᔪᓄᓪᓗ ᐊᑦᓱᕉᓚᕈᑎᐅᓲᓂᑦ, ᑭᓯᐊᓂ ᑮᓇᐅᔭᖃᕐᑎᑕᐅᕐᖃᔭᖕᖏᓂᖏᑦ ᑲᕙᒣᓪᓗ ᓯᑐᓗᐊᕐᓂᖏᑦ ᑕᒪᒃᑯᓂᖓ ᑲᔪᓯᑎᑦᓯᓚᕿᓲᖑᖕᖏᑐᑦ. ᐃᓚᖏᑎᒍᑦ, ᓄᓇᕘᒥ ᐊᑑᑎᑎᑕᐅᒍᓐᓇᓯᓯᒪᔪᑦ ᐅᒃᑯᐊᑕᐅᒋᐊᖃᖃᑦᑕᓯᒪᕗᑦ ᓴᐳᒻᒥᔭᐅᖕᖏᓗᐊᕋᒥᒃ.

ᐃᓅᖃᑎᒌᓄᑦ ᐱᒍᑦᔨᐅᑏᑦ ᑮᓇᐅᔭᖃᕐᑎᓯᓂᕐᓗ

  • ᑲᑎᒪᒋᐊᕐᓯᒪᔪᑦ ᐅᖃᕐᑐᐃᑦ ᐃᒫᒃ ᐃᓂᓪᓚᓯᒪᑦᓯᐊᑐᑦ, ᓯᑎᔫᖕᖏᑐᑦ, ᐊᕐᕌᒍᑕᒫᕐᑕᑐᑦ ᑮᓇᐅᔦᑦ ᐱᒻᒪᕆᐅᓂᖏᓐᓂᑦ.
  • ᑲᑎᒪᒋᐊᕐᓯᒪᔪᑦ ᐅᖃᕆᐊᓪᓚᑐᑦ ᑮᓇᐅᔭᖃᕐᑎᓯᒍᑏᑦ ᐃᓅᖃᑎᖐᓅᓕᖓᔪᑦ ᐊᓯᖏᓪᓗ ᐃᓄᓐᓂᒃ ᓴᐳᑦᔨᒍᑎᑦᓭᑦ ᓄᐃᑕᐅᒋᐊᖃᕆᐊᖏᑦ ᓄᐃᑕᐅᖃᑦᑕᓯᒪᔪᓂᒃ ᐆᑦᑐᕋᐅᑎᕋᕐᓗᑎᒃ ᐊᑯᓃᕐᑐᒥᒃ ᐊᑐᕐᑐᓴᓕᐅᕈᑎᐅᓗᑎᒃ.
  • ᐱᒻᒪᕆᐅᓂᖓ ᓱᓇᐅᓂᖏᓐᓄᑦ ᐋᕐᕿᕈᑎᑦᓭᑦ ᐱᒍᑦᔨᐅᑎᑦᓴᓕᐅᕈᑏᓪᓗ ᐅᖃᕐᑕᐅᒥᔪᖅ. ᑲᑎᒪᒋᐊᕐᓯᒪᔪᑦ ᐅᖄᒻᒥᔪᑦ ᐆᑦᑐᕋᕐᑕᐅᖃᑦᑕᒪᓯᒪᔪᐃᑦ ᐱᕙᓪᓕᐊᑎᑦᓯᒐᓱᐊᕈᑎᐅᑦᓱᑎᒃ ᐋᕐᕿᕈᑎᑦᓴᓄᒃ ᓄᓇᖃᕐᖄᓰᒪᔪᓂᒃ ᓇᓂᓕᒫᕐᑐᓂᒃ ᓵᖕᖓᓯᖕᖏᓗᐊᕐᓯᒪᓂᖏᓐᓂᑦ ᓄᓇᖃᕐᖄᓰᒪᔪᓂᒃ, ᐃᓄᑐᐃᓐᓇᓂᒃ ᐊᒻᒪᓗ ᐊᓪᓚᖓᔪᕐᓂᒃ.
  • ᑲᑎᒪᒋᐊᕐᓯᒪᔪᑦ ᐅᖃᕐᒥᔪᑦ ᐊᒥᓱᐃᑦ ᓄᓇᕘᒥᐅᑦ ᐱᕕᑭᓪᓕᕕᐅᓯᒪᓲᖑᒋᐊᖏᑦ ᐃᓄᓕᕆᔨᒃᑯᑦ ᐱᒍᑦᔨᐅᑎᖏᓐᓄᑦ ᑖᒃᓰᕈᑎᒥᓂᒃ ᑲᒪᓐᓂᖏᓐᓇᒥᒃ, ᐊᐱᕐᓱᓱᑎᓗ ᖃᓄᐃᓘᕈᑎᐅᒍᔭᕐᒪᖔᑦ ᑕᒪᓐᓇ ᓄᓇᕘᒥᐅᑦ ᐃᓄᓕᕆᔭᐅᒍᑎᓂᒃ ᐱᒍᑦᔭᐅᒍᑎᖃᖃᑦᑕᓂᐊᕐᒪᑕ.

ᓄᑭᖃᑦᓯᐊᑐᓂᒃ, ᐱᑦᓴᖑᒍᓐᓇᑐᓕᕆᓂᖅ ᐊᒻᒪᓗ ᐊᑦᔨᒌᖕᖏᑐᓂᒃ ᒪᑭᑕᒐᓱᐊᕈᑎᑦᓴᓕᐅᕐᓂᖅ ᐅᑭᐅᕐᑕᑐᒥ

ᐅᑭᐅᕐᑕᑐᒥ

  • ᐅᑭᐅᕐᑕᑐᒥ ᑐᑦᑕᕕᐅᓱᑦ ᓱᕐᓗ ᑰᑦᔪᐊᕌᓗᒃ, ᒫᓂᑑᐸ, ᑕᑯᓐᓇᑐᕐᔫᔮᕐᑑᒐᓗᐊᑦ ᑕᕐᕋᒧᑦ ᐊᒻᒪᓗ ᐅᑭᐅᕐᑕᑐᒧᑦ ᐊᒃᖁᑎᐅᔮᕐᓱᑎᒃ, ᑲᑎᒪᒋᐊᕐᓯᒪᔪᑦ ᐅᖃᕐᑐᑦ ᑌᒫᒃ ᐃᓱᒪᒍᓯᐅᔪᒥᒃ ᒧᒥᑦᑎᓯᒍᒪᓂᕋᕐᓱᑎᒃ ᐱᕙᓪᓕᐊᑎᑦᓯᓂᒃᑯᑦ ᐅᑭᐅᕐᑕᑐᒥᐅᑦ ᖄᖏᕐᓂᑯᓕᐅᕐᑏᑦ ᑕᑯᓐᓇᕈᓯᖃᕐᓂᐊᓕᕐᑎᓗᒋᑦ ᐃᒻᒥᓂᕿᒍᓐᓇᓂᕐᒥᒃ  ᓯᕿᓂᕐᒥᓗ ᑕᑯᓐᓇᕈᓯᕐᑖᓗᑎᒃ ᑮᓇᐅᔭᓕᐅᕐᕕᐅᒍᓐᓇᕆᐊᖓ ᓂᐅᕕᕐᓂᐊᕕᑐᐃᓐᓇᐅᖏᑦᑑᓗᓂ.
  • ᑲᑎᒪᒋᐊᕐᓯᒪᔪᑦ ᑕᑯᒍᒪᔪᑦ ᓄᓇᕘᓕᒫᒥ ᐱᑦᓴᖑᒍᓐᓇᑐᓂᒃ ᐱᕙᓕᓪᓕᐊᑎᑦᓯᓂᕐᒥᒃ ᐃᓚᐅᓕᕐᑎᓗᒍ ᒪᑭᑕᒐᓱᐊᕐᓂᓄᑦ ᐱᕙᓪᓕᐊᓂᐅᔪᓂᑦ ᒪᓕᒐᓕᐊᖑᓚᖓᔫᑉ ᐅᑭᐅᕐᑕᑐᒧᑦ ᐃᓗᐊᓂ.

ᐱᓇᓱᐊᖃᑎᒌᓐᓃᑦ ᖃᓄᐃᓘᕐᑎᐅᓂᖏᓪ; ᓄᓇᕘᒥ ᒪᑭᑕᒐᓱᐊᕐᓂᒥᒃ ᐱᕙᓪᓕᐊᑎᑦᓯᓂᕐᒧᑦ ᑎᒥᐅᔪᓂᑦ

  • ᑲᑎᒪᒋᐊᕐᓯᒪᔪᑦ ᐅᖃᕐᑐᑦ ᓄᒃᑭᓕᐅᒥᖁᔨᑦᓱᑎᒃ ᐱᓇᓱᐊᖃᑎᒌᓐᓂᖏᓐᓂᑦ ᑲᕙᒪᑐᖃᒃᑯᑦ ᐊᒻᒪᓗ ᓄᓇᕘᒥᐅᑦ ᐋᔩᖃᑎᒌᓪᓗᑎᒃ ᓱᓀᑦ ᐊᑐᕐᒪᖔᑕ ᓱᓀᓪᓗ ᐊᑐᕐᖃᔭᖕᖏᒪᖔᑕ ᒪᑭᑕᒐᓱᐊᕐᓂᒧᑦ ᐱᕙᓪᓕᐊᑎᑦᓯᒍᑎᐅᔪᓂᑦ.
  • ᑲᑎᒪᒋᐊᕐᓯᒪᔪᑦ ᐅᖃᕐᒥᔪᑦ ᐱᑕᖃᖕᖏᓗᐊᕐᓂᖓᓂᑦ ᐱᓇᓱᐊᖃᑎᒋᓐᓂᐅᔪᑦ ᓄᓇᕘᑦ ᑲᕙᒪᖓᑕ ᓯᕗᓪᓕᐅᔭᐅᒋᐊᖃᕐᓂᕋᕐᑕᖏᑦᑕ ᐊᒻᒪᓗ ᒪᑭᑕᒐᓱᐊᕐᓂᒥᒃ ᐱᕙᓪᓕᐊᑎᑦᓯᒍᑎᑦᓭᑦ ᑭᖕᖒᒪᓇᕐᓂᖏᓐᓂᑦ ᓇᓗᓀᕐᑕᐅᓯᒪᔪᑦ ᐃᓄᐃᑦ ᑎᒥᐅᔪᖁᑎᖏᓐᓄᑦ, ᐊᒻᒪᓗ ᑐᑦᓯᕋᐅᑎᖃᕐᓱᑎᒃ ᑲᑐᑦᔨᖃᑎᒌᓕᐅᒥᒋᐊᖃᕐᓂᒥᒃ. ᓄᓇᕘᒥ ᐱᕙᓪᓕᐊᑎᑦᓯᓂᕐᒧᑦ ᑎᒥᐅᔪᑦ, ᐱᓗᐊᕐᑐᒥ, ᐱᕕᑦᓴᖃᕐᓂᓴᐅᒋᐊᖓ ᐱᓇᓱᐊᖃᑎᒌᓐᓂᐅᔪᖅ ᑲᑐᑦᔨᖃᑎᒌᓐᓂᐅᔪᕐᓗ ᓄᓇᕘᑦ ᑲᕙᒪᖓ ᐱᓇᓱᐊᖃᑎᐅᒍᓂ ᓴᓇᓂᕐᒨᓕᖓᔪᓄᑦ.
  • ᐊᒻᒪᓗᒋᐊᓪᓚᖅ, ᐅᖃᕐᑕᐅᓚᕆᒻᒥᓱᓂ ᑲᑎᒪᔪᓄᑦ ᐊᑕᐅᓯᐅᓕᕿᖓᓂᕐᓭᑦ, ᐱᓇᓱᐊᖃᑎᒌᓐᓃᑦ ᐱᑕᖃᕆᐊᖃᕐᓂᖏᑦ ᒪᑭᑕᒐᓱᐊᕐᓂᒥᒃ ᐱᕙᓪᓕᐊᑦᓯᓂᕐᓅᓕᖓᔪᓂᑦ ᐱᓇᓱᐊᒐᓖᑦ ᑎᒥᐅᔪᑦ ᐊᓯᖏᓪᓗ ᐊᑦᔨᒌᓕᕐᑎᓗᒋᑦ ᐱᑕᖃᕇᕐᑐᑦ ᐱᒍᑦᔨᐅᑏᑦ ᐱᒋᐅᕐᓴᑎᑦᓯᓂᕐᓄᑦ ᐃᓕᓐᓂᐊᑎᑦᓯᓂᕐᓄᓗ.
  • ᑲᑎᒪᒋᐊᕐᓯᒪᔪᑦ ᐅᖄᒍᑎᓖᑦ ᖃᓄᐃᓘᕐᑎᐅᒋᐊᖃᕐᓂᖏᓐᓄᑦ ᓄᓇᕘᒥ ᐱᕙᓪᓕᐊᑎᑦᓯᓂᕐᒧᑦ ᑎᒥᐅᔪᑦ, ᐅᖃᕐᓱᑎᒃ ᐃᓚᖏᑦ ᑎᒥᐅᔪᑦ ᑐᓄᓗᐊᕐᓯᒪᓕᕐᓂᖏᓐᓂᑦ ᒥᑭᓂᕐᓴᓂᑦ ᖄᖏᕐᓂᑯᓕᐅᕋᓱᐊᕐᑎᓂᒃ, ᓄᓇᓕᓐᓂ ᓄᐃᑕᐅᓯᒪᔪᓂᑦ. ᐃᓱᒪᑦᓴᓯᐅᕈᑎᖃᕐᒥᔪᑦ ᐊᑕᐅᓯᖕᖑᑎᑕᐅᔪᑦᓴᐅᖏᒃᑲᓗᐊᕐᒪᖔᑕ ᓯᑕᒣᑦ ᑎᒥᒻᒪᕇᑦ ᑐᓴᐅᒪᖃᑎᒌᖃᑎᒌᒐᔭᕐᓗᑎᒃ ᓄᓇᕘᑦ ᑲᕙᒪᖓᓂᑦ ᐊᒻᒪᓗ ᑲᓇᑕᐅᑉ ᑲᕙᒪᖓᓂᑦ.

ᐱᒍᓐᓇᓯᑎᑦᓯᕙᓪᓕᐊᓂᖅ, ᓴᐳᒻᒥᓂ ᐃᓕᓐᓂᐊᕕᒻᒥ ᐱᔭᕿᕐᓯᒪᔪᓂᒃ ᐊᒻᒪᓗ ᐱᒋᐅᕐᓴᑐᓂᒃ ᐱᓇᓱᒐᕐᒥᒃ

  • ᑲᑎᒪᒋᐊᕐᓯᒪᔪᑦ ᐅᖃᕐᑐᑦ ᐱᒻᒪᕆᐅᓂᖓᓂᑦ ᐱᒍᓐᓇᓯᑎᑦᓯᕙᓪᓕᐊᒋᐊᖃᕐᓂᖅ, ᓄᓇᕘᒥᓪᓗ ᐱᒍᓐᓇᓯᔭᐅᒪᔪᑦ ᓄᕘᒦᑦᑐᓴᐅᓂᖏᓐᓂᑦ, ᐅᖃᕐᓱᑎᒃ, "ᒪᑭᑕᒐᓱᐊᕐᓂᖅ ᓯᕗᒧᐊᖕᖏᑐᖅ" ᐅᑭᐅᕐᑕᑐᒥᐅᑦ ᖃᓪᓗᓈᓅᖃᑦᑕᑐᐊᕐᒪᑕ.
  • ᓴᐳᒻᒥᔭᐅᓂᖃᖕᖏᓂᖏᑦ ᐋᓐᓂᐊᓯᐅᕐᑎᕈᕐᖃᒦᑦ, ᐱᓇᓱᒐᕐᒥᒃ ᐱᒋᐅᕐᓴᑐᑦ ᐊᓯᖏᓪᓗ ᑲᕙᒪᒃᑯᑦ ᐱᓇᓱᑦᑎᑖᕐᓂᒥᒃ ᐱᕐᖁᓯᖏᑦ ᐱᓀᓗᑦᓰᖃᑦᑕᒪᑕ.

ᐃᓪᓗᓕᕆᓂᖅ

  • ᐃᓪᓗᓕᕆᓂᖅ ᐱᓀᓗᑕᒻᒪᕆᐅᒋᐊᖓ ᓇᓗᓀᕐᑕᐅᓯᒪᔪᖅ ᓄᕐᖃᖓᐅᑎᐅᑦᓱᓂ ᒪᑭᑕᒐᓱᐊᕐᓂᒥᒃ ᐱᕙᓪᓕᐊᑎᑦᓯᓂᕐᒥᒃ ᐊᒻᒪᓗ ᒪᑭᑕᒐᓱᐊᕐᓂᒥᒃ ᐊᐅᓚᑦᔮᕆᒍᑎᑦᓴᓂᒃ ᓄᓇᕘᒥᐅᓄᑦ, ᓄᕐᖃᖓᐅᑎᐅᑦᓱᓂᓗ ᐱᔪᓐᓇᓯᒍᓐᓇᓂᕐᒥᒃ ᐃᓕᓐᓂᐊᕆᐊᓪᓛᓂᕐᒥᓗ. ᖃᐅᔨᒪᔭᐅᔪᖅ ᐳᕐᑐᓂᕐᓴᕆᐊᓪᓚᒥᒃ ᐃᓕᓐᓂᐊᕈᓐᓇᑐᑦ ᐃᑭᓗᐊᕐᑑᒋᐊᖏᑦ, ᐃᓕᓐᓂᐊᑎᑦᓯᕕᖃᖕᖏᓂᕐᒨᖏᑦᑐᖅ ᑭᓯᐊᓂ, ᐃᓪᓖᑦ ᐱᑕᖃᑦᓯᐊᖏᓐᓂᖏᓐᓄᑦ ᐃᓕᓐᓂᐊᑏᑦ ᐊᓂᕐᕋᖑᐊᖏᓐᓂᑦ.
  • ᑌᒫᑦᓭᓇᖅ, ᐃᓪᓗᐃᓂᐊᕐᓂᖅ ᓄᓇᓖᑦ ᐃᓚᖏᓐᓂᑦ ᐱᓇᓱᒐᖃᕐᓂᓴᐅᔪᓂᑦ ᐱᓇᓱᑦᑎᐅᒐᔭᕐᑐᓂᒃ ᓄᕐᖃᖓᑎᑦᓯᒥᔪᖅ. ᑌᒣᒻᒪᑦ, ᐱᓇᓱᑦᑏᑦ ᑎᑭᑉᐸᑐᑦ ᖃᓪᓗᓈᑦ ᓄᓇᖓᓂᑦ ᐱᑦᓱᑎᒃ.
  • ᐃᓪᓗᓕᕆᓂᖅ ᐃᓱᒪᒋᔭᐅᔪᖅ ᐋᕐᕿᓯᒪᐅᑎᑦᓴᐅᕈᑎᐅᒍᓐᓇᕆᐊᖓ, ᐊᑦᔨᒌᓕᕐᑎᑕᐅᒍᓐᓇᒪᑕ ᐱᓇᓱᐊᕋᑦᓴᓕᐊᖑᒪᔪᑦ ᐱᕕᑦᓴᖃᕐᕕᐅᔪᐃᓪᓗ, ᐱᓇᓱᐊᖃᑎᒋᓗᒋᑦ ᐃᓄᐃᑦ ᑎᒥᒻᒪᕆᖏᑦ ᐱᓇᓱᒐᕐᒥᒃ ᐱᒋᐅᕐᓴᖃᑦᑕᓂᐊᕐᒪᑕ ᐃᓄᐃᑦ, ᐱᒍᓐᓇᓯᑎᑦᓯᕙᓪᓕᐊᓃᑦ ᐊᑑᑎᖃᑦᑕᓂᐊᕐᒪᑕ ᓄᓇᓕᓐᓂᓗ ᐱᓇᓱᒉᑦ ᓄᐃᑕᐅᖃᑦᑕᓂᐊᕐᒪᑕ ᐃᓪᓗᐃᑦ ᓴᓇᔭᐅᒪᓕᕐᐸᑕ.
  • ᐊᐴᒪᓘᑎᐅᓲᑦ ᓄᓇᕘᒥ ᐃᓪᓗᓂᒃ ᓴᓇᓂᕐᒥᒃ ᐃᓚᖃᕐᑐᑦ ᑮᓇᐅᔭᕐᑐᕈᑎᐅᒋᐊᖃᕐᓂᖓᓄᑦ ᓴᓇᒍᑎᑦᓴᖃᕆᐊᖃᕐᓂᖓᓄᓪᓗ ᐱᑕᖃᖕᖏᓗᐊᕐᓂᖓᓄᓪᓗ ᓄᓇᖃᕐᑎᓯᓂᖅ.
  • ᐃᓪᓗᐃᓂᐊᕐᓂᖅ ᓄᓇᕘᒥ ᓄᕐᖃᖓᑎᑦᓯᒥᔪᖅ ᒪᑭᑕᒐᓱᐊᕐᓂᒧᑦ ᐱᕙᓪᓕᐊᓂᐅᒐᔭᕐᑐᓂᒃ. ᐃᓪᓗᐃᑦ ᐊᑐᕐᑐᓴᓕᐅᕈᑎᐅᒋᐊᖃᒻᒪᕆᑦᑐᑦ, ᑭᓯᐊᓂ ᑮᓇᐅᔦᑦ ᐊᑐᕐᑕᐅᔪᑦ ᐱᓇᓱᑦᑎᖃᕐᓂᒧᑦ ᓴᓇᒍᑎᖃᕐᑎᓯᓂᕐᒧᓗ (ᑖᒃᓰᔭᕐᑕᐅᒍᑎᖏᓪᓗ ᑕᒪᒃᑯᓇᖕᖓᑦ ᐱᔪᓂᑦ) ᖃᓪᓗᓈᑦ ᓄᓇᖓᓄᑦ ᐅᑎᑐᐃᓐᓇᐸᑦᑐᑦ.

ᐱᓇᓱᑦᑐᓕᕆᓂᖅ

  • ᑲᑎᒪᒋᐊᕐᓯᒪᔪᑦ ᐅᖄᒍᑎᓖᑦ ᑎᐊᕆᑐᐊᕆᒥᐅᑦ ᓄᓇᖃᕐᕕᐅᔪᐃᓪᓗ ᑐᕐᖃᑌᔨᖃᕆᐊᖏᑦ ᑲᒪᒋᔭᓕᓐᓂᒃ ᐱᓇᓱᑦᑐᓕᕆᓂᕐᒥᒃ, ᓄᓇᕘᑦ ᐃᓚᒋᔭᐅᑎᓐᓇᒍ. ᑕᒪᓐᓇ ᓄᕐᖃᖓᑎᑦᓯᔪᖅ ᐱᕙᓪᓕᐊᑎᑦᓯᓂᐅᔪᖅ ᐃᓚᐅᑎᑦᓯᓯᐊᕐᑐᓂᒃ, ᑐᑭᒧᐊᑦᑕᐅᓯᐊᕐᑐᓂᒃ ᓯᕗᓪᓕᐅᔭᐅᒋᐊᓕᓐᓂᒃ ᐱᕙᓪᓕᐊᑎᑦᓯᓂᕐᒥᒃ ᐃᓕᖓᔪᓄᑦ ᐱᓇᓱᑦᑐᓕᕆᓂᕐᒥᒃ ᓄᓇᕘᒥ.
  • ᓄᓇᕘᑦ ᐊᖏᖃᑎᒌᒍᑎᖓᓂᑦ ᐊᓪᓚᑕᐅᓯᒪᔪᖅ 23-ᒥ (ᐃᓄᓐᓂᒃ ᐱᓇᓱᑦᑐᓕᕆᓂᖅ ᓄᓇᕗᑦ ᑲᕙᒪᖓᓂᑦ) ᐅᖄᒍᑎᐅᔪᖅ, ᐃᓕᖓᑦᓱᓂ 207-ᒥ ᑐᓴᕐᑎᓯᒍᑎᓕᐊᖑᔪᕕᓂᕐᒧᑦ ᓄᐃᑕᐅᓯᒪᔪᒧᑦ ᓄᓇᕘᑦ ᑲᕙᒪᖓᓄᑦ ᖃᐅᔨᓴᕐᓂᐅᓱᓂ ᑮᓇᐅᔭᕐᑐᓂᖓᓂᑦ ᑎᐊᕆᑐᐊᕆᐅᑉ ᐊᑑᑎᑎᑦᓯᓯᒪᖕᖏᓂᖓᓄᑦ ᐱᕙᓪᓕᐊᑎᑦᓯᓂᕐᒥᒃ ᑲᕙᒪᐅᑉ ᑭᒡᒐᑐᑦᓯᐊᕆᐊᖃᕐᓂᖓᓂᑦ ᐱᓇᓱᑦᑎᓂᒃ. ᑐᓴᕐᑎᓯᒍᑎᒃ ᖃᐅᔨᒍᑎᐅᓯᒪᔪᖅ ᐃᓄᐃᑦ ᓄᓇᕘᒥᐅᑦ ᐊᓐᓀᓲᖑᒋᐊᖏᑦ $1.2 ᐱᓕᐊᓐᓂᒃ ᑮᓇᐅᑦᔭᓵᕆᒐᔭᕐᑕᖏᓐᓂᑦ ᐊᕐᕌᒍᖏᓐᓂᑦ 2017-2023 ᐊᑐᓕᕐᑎᑕᐅᓯᒪᖕᖏᓂᖓᓄᑦ ᐊᖏᖃᑎᒌᒍᑎᒥᒃ ᐅᖃᕐᑕᐅᓯᒪᔪᑦ 23-ᖓᓃᑦᑐᖅ.
  • ᑲᑎᒪᒋᐊᕐᓯᒪᔪᑦ ᐅᖄᔪᑦ ᓇᐅᓕᒫᓂᑦ ᐱᒍᑦᔨᕕᐅᖕᖏᑐᓂᑦ ᐱᓇᓱᑦᑏᑦ ᐊᒥᓲᓂᕐᓴᐅᒋᐊᖏᑦ ᐃᓄᑐᐃᓐᓀᑦ, ᑭᓯᐊᓂ ᑖᒃᑯᐊ ᐱᓇᓱᑦᑏᑦ ᑮᓇᐅᑦᔭᓴᖕᖏᓂᕐᐸᐅᓱᑎᒃ. ᐅᔭᕋᓐᓂᐊᕖᑦ ᑮᓇᐅᑦᔭᓴᕐᑎᓯᑦᓯᐊᑑᒐᓗᐊᑦ ᐃᓄᑐᐃᓐᓇᓂᒃ, ᑭᓯᐊᓂ, ᑭᓇᓕᒫᒃᑯᑦ ᐅᔭᕋᓐᓂᐊᕕᓐᓂ ᐱᓇᓱᑦᑎᐅᒍᒪᖕᖏᑐᑦ.

ᐱᕕᑦᓴᐅᒍᓐᓇᑐᑦ ᒪᑭᑕᒐᓱᐊᕐᓂᒥᒃ ᐱᕙᓪᓕᐊᑎᑦᓯᓂᕐᒧᑦ

  • ᐅᓐᓂᑑᑎᒋᔭᐅᔪᖅ ᐃᓄᐃᑦ ᓇᒻᒥᓂᖃᕈᑎᒃ ᐃᓘᓐᓇᓕᒫᖏᓐᓂᑦ ᐃᑯᒪᓕᐅᕈᑎᐅᒍᓐᓇᑐᓂᒃ ᑎᐊᕆᑐᐊᕆᒥ ᐊᕐᖁᑎᐅᒍᓐᓇᕆᐊᖓ ᓄᓇᕘᒥᐅᓄᑦ ᐱᕙᓪᓕᖁᑎᑖᖃᑦᑕᓗᑎᒃ ᐱᑦᓴᖑᒍᓐᓇᑐᓂᒃ ᓄᓇᒥᓂ, ᑕᒪᓐᓇᓗ ᐱᕕᑦᓴᖃᕐᑎᓯᒍᑎᐅᒍᓐᓇᕋᔭᕐᓱᓂ ᐱᕙᓪᓕᖁᑎᑖᕐᑕᐅᑎᓂᒃ ᓇᒻᒥᓂᖁᑎᒋᔭᐅᔪᓂᑦ ᐃᓄᓐᓄᑦ ᓄᓇᓂᑦ.
  • ᑲᑎᒪᒋᐊᕐᓯᒪᔪᑦ ᓇᓗᓀᕐᓯᔪᑦ ᑲᕙᒪᑐᖃᒃᑯᑦ ᓴᐳᒻᒥᖏᓗᐊᕐᓂᖏᓐᓂᑦ ᐃᖃᓪᓕᐊᑐᓕᕆᓂᕐᒥᒃ ᓄᓇᕘᒥ, ᐅᖃᕆᐊᓪᓚᓱᑎᓗ ᑲᕙᒪᑐᖃᒃᑯᑦ ᒪᓕᒐᖏᑦ ᐱᐅᖕᖏᑐᒥᒃ ᓱᕐᕋᐃᖃᑦᑕᕆᐊᖓ ᓄᓇᕘᒥᑦ ᓴᐳᒻᒥᒪᑕ ᐃᖃᓪᓕᐊᑎᓂᒃ ᓄᓇᕘᑦ ᓯᓚᑖᓂᑦ ᐱᓯᒪᔪᓂᒃ ᐃᖃᓪᓕᐊᖃᑦᑕᑐᓂᒃ ᓄᓇᕘᑦ ᐃᒪᖏᓐᓂᑦ. ᐅᖃᕐᓱᑎᓗ ᑮᓇᐅᔭᕐᑐᓂᖏᑦ ᑲᓇᑕᐅᑉ ᑲᕙᒪᖓᑕ ᓴᐳᒻᒥᔪᑦ ᓄᓇᖃᕐᖄᓰᒪᔪᑦ ᐃᖃᓪᓕᐊᑐᓕᕆᔨᖏᓐᓂᑦ, ᑭᓯᐊᓂ ᑖᒃᑯᐊ ᑮᓇᐅᔦᑦ ᓇᓪᓕᖏᓪᓘᓃᑦ ᓄᓇᕘᒥᐅᓄᑦ ᐊᑐᕐᑕᐅᖃᑦᑕᖏᑦᑑᒋᐊᖏᑦ.
  • ᑲᑎᒪᒋᐊᕐᓯᒪᔪᑦ ᐅᖃᕐᑐᑦ ᐅᒥᐊᕐᔪᐊᑦ ᐊᖁᐃᒪᔪᓕᕆᔩᑦ ᐊᓯᖏᓪᓗ ᐱᕕᑦᓴᖃᕐᑎᓯᒻᒪᕆᓲᖑᑦᓱᑎᒃ ᓄᓇᕘᑦ ᓄᓇᓕᖏᓐᓂᑦ, ᑭᓯᐊᓂ ᓄᓇᓕᐊᕉᔪᓂᒃ ᐱᕕᑭᓪᓕᑎᕆᓱᑦ ᐊᒥᓱᓄᑦ ᑎᑭᑕᐅᒐᒥᒃ ᐱᕕᑦᓴᖃᕐᑎᓯᒍᑎᑦᓴᓂᒃ ᐱᑕᖃᖕᖏᓗᐊᕐᓂᑯᒥᓄᑦ.
  • ᐊᑕᐅᓯᖅ ᐅᓐᓂᑑᑎᓕᒃ ᑮᓇᐅᔭᓕᐅᕈᑎᑦᓭᑦ  ᐱᕙᓪᓕᐊᑎᑕᐅᒍᓐᓇᕆᐊᖏᑦ ᓄᓇᓕᓐᓂᑦ ᓄᓇᓖᑦ ᐃᑉᐱᒋᔭᐅᑦᓯᐊᓗᑎᒃ ᖃᐅᔨᒪᐅᑎᑦᓭᓗ ᑲᑎᕐᓱᐊᖑᑦᓯᐊᓗᑎᒃ, ᓂᐅᕐᕈᑎᐅᓂᐊᓕᕐᓗᑎᒃ ᑲᕙᒪᓄᑦ ᐃᓕᓐᓂᐊᕕᕐᔪᐊᓄᓪᓗ. ᐱᕕᑦᓴᖃᕐᑎᓯᒍᑎᑦᓭᑦ ᐊᑐᕐᑐᓴᓕᐅᕈᑎᐅᒋᐊᖃᕐᖁᑦ ᓄᓇᓖᑦ ᐱᒍᓐᓇᓯᓂᐊᕐᒪᑕ.
  • ᑲᑎᒪᒋᐊᕐᓯᒪᔪᑦ ᐅᖄᒍᑎᓖᑦ ᐱᕕᑦᓴᐅᒍᓐᓇᑐᓂᒃ ᑮᓇᐅᔭᕐᑐᕈᑎᐅᓗᑎᒃ  ᓄᓇᕘᑦ ᑲᕙᒪᖓᓄᑦ-ᓇᒻᒥᓂᕆᔭᐅᔪᒥᒃ ᖃᖓᑦᑕᔫᓕᕆᓂᕐᒥᒃ, ᖃᖓᑦᑕᐅᑏᑦ ᐊᑭᑐᔫᒻᒪᑕ ᓄᓇᕘᒥᑦ, ᐃᓚᒋᔭᐅᑎᓪᓗᒍ ᐱᒻᒪᕆᐅᓂᖓ ᖃᓄᐃᓘᕐᑎᐅᒋᐊᖃᕐᓂᖓᓄᑦ ᑲᕙᒪᑐᖃᒃᑯᑦ ᓄᐃᑦᓯᓯᒪᒻᒪᑕ ᐃᐊ ᑲᓇᑕᒥᒃ.

ᓱᕐᕋᐃᓯᒪᓂᖓ ᑲᕙᒪᒃᑯᑦ/ᒪᓕᒐᖏᑦ ᑐᑭᑖᕈᑎᖏᓪᓗ

  • ᑲᑎᒪᒋᐊᕐᓯᒪᔪᑦ ᐅᖃᕐᑐᑦ ᑐᑭᑖᕈᑎᐅᔪᑦ ᒪᓕᒐᕐᓅᓕᖓᔪᓄᑦ ᓱᕐᕋᐃᒪᒍᓐᓇᕆᐊᖏᑦ ᐊᑯᓂᕐᑐᒥᒃ ᐃᓱᐃᓪᓕᑎᕆᓲᓂᒃ ᐱᓇᓱᐊᖃᑎᒌᓐᓂᐅᓕᕋᔭᕐᑐᓂᖅ. ᐆᑦᑑᑎᒋᓗᒍ, ᓄᓇᕘᑦ ᐱᓇᓱᐊᖃᑎᖃᕐᓂᖓ ᒫᓂᑑᐸᒥᒃ ᐋᓪᐴᑕᒥᓪᓗ ᓲᖑᔫᓯᒪᔪᖅ ᓂᐅᕕᐊᑦᓭᑦ ᑎᑭᑎᑕᐅᖃᑦᑕᑎᓪᓗᒋᑦ ᑕᒃᑯᓇᖕᖓᑦ. ᑭᓯᐊᓂ, ᒪᓕᒐᐅᑉ ᐊᓯᑦᔨᑕᐅᓂᖓ ᑐᑭᑕᕈᑎᐅᓯᒪᔪᖅ ᓂᐅᕕᐊᑦᓭᑦ ᑎᑭᖃᑦᑕᓂᐊᓕᕐᑎᓗᒋᑦ ᒪᓐᑐᔨᐊᒥᑦ. ᑖᓐᓇ ᑐᑭᑖᕐᓂᐅᔪᖅ ᑲᕙᒪᒧᑦ ᑮᓇᐅᔭᕐᑐᓗᐊᕈᑎᐅᑦᑌᓕᓯᔪᕕᓂᖅ, ᑭᓯᐊᓂ ᓂᐅᕕᕐᓂᐊᕖᑦ ᑮᓇᐅᔭᕐᑐᕖᖕᖓᓯᑎᓪᓗᒋᑦ, ᑎᒥᐅᔪᓂᓪᓗ ᐱᓇᓱᑦᑎᑖᕐᑎᓯᒋᐊᖃᓚᕿᑦᓱᓂ ᒍᐃᒍᐃᑎᑑᕈᓐᓇᑐᓂᒃ ᐱᓇᓱᐊᖃᑎᖃᕈᓐᓇᓯᐊᕐᓂᐊᒪᑕ ᑯᐯᒻᒥᐅᑕᓂᒃ ᐃᓱᐃᓪᓖᓱᓂᓗ ᐱᓇᓱᐊᖃᑎᒌᓐᓂᐅᕙᑦᑐᕕᓂᕐᓂᒃ ᑲᓇᑕᐅᑉ ᐅᐊᓕᓂᖓᓃᑦᑐᓂᒃ.
  • ᑲᑎᒪᒋᐊᕐᓯᒪᔪᑦ ᐃᑉᐱᒍᓱᑦᑐᑦ ᐊᑦᔨᒌᑦᑎᓯᖕᖏᑐᖏᐊᖏᑦ ᑮᓇᐅᔭᖃᕐᑎᓯᒍᑎᐅᔪᑦ ᓄᖕᖑᐊᒥ 60 ᐊᑖᓃᑦᑐᓄᑦ ᓄᓇᖃᕐᖄᓯᒪᔪᓄᑦ ᐱᕙᓪᓕᐊᑎᑦᓯᒍᑏᑦ ᑮᓇᐅᔭᖃᕐᑎᓯᒍᑏᓪᓗ. ᐅᖃᕐᓱᑎᓗ ᓈᒻᒪᓴᖕᖏᓂᕋᐅᑎᒥᓂᒃ ᑮᓇᐅᔭᖃᕐᑎᑕᐅᒍᑎᓂᑦ ᐱᑕᖃᕐᑎᑕᐅᔪᓂᑦ ᑲᓇᑕᒥ ᐅᑭᐅᕐᑕᑐᒥ ᒪᑭᑕᒐᓱᐊᕐᓂᒥᒃ ᐱᕙᓪᓕᐊᑎᑦᓯᕕᖓᓄᑦ, ᐊᒻᒪᓗ ᓱᕐᕋᐃᓯᒪᓂᖓᓂᑦ ᒫᓐᓇᓯᐅᑎᒃᑯᑦ ᑮᓇᐅᔭᖃᕐᑎᓯᒍᑎᐅᔪᓂᑦ.
  • ᐅᖃᕐᑐᑦ ᓄᓇᕘᑦ ᑲᕙᒪᖓ ᐱᒍᑦᔭᐅᒍᑎᒥᓂᒃ ᐱᒻᒪᕆᐅᑎᑦᓯᓂᕐᓴᐅᔪᕆᑦᓱᖏᑦ ᖃᓪᓗᓈᓃᑦᑐᓂᒃ ᐊᑭᑭᓐᓂᐹᕐᓯᐅᓂᒃᑯᑦ ᐱᒍᑦᔨᔫᒐᓗᐊᓂᑦ ᑭᓯᐊᓂ ᓱᓇᒥᑦᑐᓂᒃ ᐱᒍᑦᔨᖃᔭᕋᑎᒃ ᓯᓚ ᐱᑦᔪᑎᐅᑎᓪᓗᒍ.

ᐊᑦᓱᕉᓚᕆᑎᐅᔪᓄᑦ ᐊᓯᖏᑦ

  • ᑲᑎᒪᒋᐊᕐᓯᒪᔪᑦ ᖃᕿᐊᕐᓯᓚᕆᑦᑐᑦ ᑎᒥᐅᔪᑦ ᖄᖏᕐᓂᑯᓕᐅᕐᑏᑦ ᖃᓄᐃᓖᕐᑎᐅᓲᖑᓂᖏᓐᓂᑦ ᓄᓇᕘᒥᑦ. ᑖᒃᑯᐊᓗ ᖄᖏᕐᓂᑯᓕᐅᕐᑏᑦ ᐊᑐᕐᓂᓗᑦᓱᑎᒃ ᓄᓇᕘᒥᑦ.

ᐅᑭᐅᕐᑕᑐᒥ ᓱᑯᐃᒪᔪᓕᕿᓂᖅ ᐊᒻᒪᓗ ᓄᓇᖃᕐᖄᓰᒪᔪᑦ ᖃᐅᔨᒪᐅᓯᖏᑦ

ᓄᓇᖃᕐᖄᓰᒪᔪᑦ ᖃᐅᔨᒪᐅᓯᖏᑦ

  • ᓄᓇᖃᕐᖄᓰᒪᔪᑦ ᖃᐅᔨᒪᐅᓯᖏᑦ ᐱᒻᒪᕆᐅᑎᑕᐅᓂᕐᓴᐅᒋᐊᓕᒃ, ᐃᓚᒋᔭᐅᑎᓪᓗᒋᑦ ᑲᕙᒪᐅᑉ ᐃᓗᐊᓂ. ᖃᐅᔨᒪᔭᐅᒻᒪᑦ ᖃᐅᔨᒪᐅᓰᑦ ᓲᕐᓗ ᑕᑯᒥᓇᕐᑎᓯᒍᑎᑐᐃᓐᓇᐅᒋᐊᖏᑦ ᐅᕝᕙᓗᓘᓐᓃᑦ ᓱᓪᓕᑐᐃᒍᑎᑐᐃᓐᓇᐅᒋᐊᖏᑦ ᓱᑯᐃᒪᔪᓕᕆᔨᒻᒪᕇᑦ ᖃᐅᔨᒪᐅᓯᖏᓐᓂᑦ.
  • ᑭᖕᖒᒪᓇᕐᓂᖓ ᓄᓇᖃᕐᖄᓰᒪᔪᑦ ᖃᐅᔨᒪᐅᓯᖏᑦ ᑲᕙᒪᐅᑉ ᐃᓗᐊᓂ ᐱᑐᑦᓯᒪᒻᒥᔪᖅ ᐃᓄᐃᑦ ᐱᓇᓱᑦᑐᓴᓕᐊᖑᓯᒪᓂᖏᓐᓄᑦ ᐊᖏᖃᑎᒌᒍᑎᒥᒃ ᐅᖃᕐᑕᐅᓯᒪᔪᖅ 23-ᒥ ᒪᓕᓪᓗᒍ (ᐃᓄᓐᓂᒃ ᐱᓇᓱᑦᑐᓕᕆᓂᖅ ᑲᕙᒪᐅᑉ ᐃᓗᐊᓂ).
  • ᑲᑎᒪᒋᐊᕐᓯᒪᔪᑦ ᐅᖃᕐᑐᖅ ᓄᓇᖃᕐᖄᓰᒪᔪᑦ ᖃᐅᔨᒪᐅᓯᖏᑦ ᐃᒻᒥᒎᕐᑐᓚᕆᒻᒥᒃ ᑎᒥᖁᑎᖃᕆᐊᖃᕐᓂᖏᓐᓂᑦ.
  • ᓄᓇᖃᕐᖄᓰᒪᔪᑦ ᖃᐅᔨᒪᐅᓯᖏᑦ, ᐅᖃᕐᑕᐅᔪᖅ, ᓲᕐᓗ ᑐᓴᐅᒪᔭᐅᔪᒍᓗᑐᐃᓐᓇᐅᓕᕐᓗᑎᒃ ᕆᐊᖃᖕᖏᓂᖏᓐᓂᑦ.
  • ᐅᖄᒍᑎᖃᕐᓱᑎᓗ ᐆᑦᑐᕋᐅᑎᖃᕐᓱᑎᒃ ᓱᑯᐃᒪᔪᓕᕆᔩᑦ ᖃᐅᔨᒍᑎᖏᑦ ᓄᓇᖃᕐᖄᓰᒪᔪᐃᓪᓗ ᖃᐅᔨᒪᐅᓯᖏᑦ ᐊᖏᖃᑎᒌᖕᖏᑑᒋᐊᖏᑦ. ᐆᑦᑑᑎᒋᓗᒍ ᓇᓄᐃᑦ ᓯᓂᑦᑎᑕᐅᓂᖏᑦ. ᐃᓄᐃᑦ ᐃᓄᑐᙯᑦ ᖃᐅᔨᒪᐅᓯᓖᑦ ᓯᓂᑦᑎᓯᓂᖅ ᓇᓅᑉ ᓂᕿᖓᓂᑦ ᒪᒣᓪᓕᑎᕆᓲᖑᒋᐊᖓ, ᓱᑯᐃᒪᔪᓕᕆᔩᑦ ᐅᖃᕐᑎᓗᒋᑦ ᓱᕐᕋᑕᐅᒪᖕᖏᒋᐊᖓ. ᐊᑕᐅᓯᕐᓗ ᐅᖃᕐᓯᒪᒻᒪᑦ, "ᐅᑉᐱᕈᓱᒃᑯᖓᓕ ᑌᒃᑯᓂᖓ ᓂᕿᖓᓂᑦ ᐆᑦᑐᓗᑐᕐᓯᒪᔪᓂᒃ".
  • ᐱᓇᓱᐊᖃᑎᒌᓐᓂᓴᐅᑉᐸᑕ ᓱᑯᐃᒪᔪᓕᕆᔩᑦ ᓄᓇᖃᕐᖄᓯᒪᔪᐃᓪᓗ ᖃᐅᔨᒪᐅᓯᓕᕆᔨᖏᑦ ᐱᕕᑦᓴᓕᐅᕈᑎᑦᓴᓯᐊᖑᒋᐊᖓ ᐱᓇᓱᐊᖃᑎᒌᑦᓯᐊᕈᓐᓇᓂᕐᒥᒃ.
  • ᐅᖃᕐᓱᑎᓗ ᓴᓇᔭᐅᓯᒪᓂᖓ ᑲᓇᑕᒥ ᐅᑭᐅᕐᑐᒥ ᖃᐅᔨᕐᕕᐅᑉ, ᐱᕙᓪᓕᐊᑎᑦᓯᒍᑎᐅᓗᓂᓗ ᒥᑭᔪᒥᒃ ᐅᒥᐊᑲᓪᓚᓂᒃ ᒥᑦᓯᒪᑕᓕᒻᒥ ᐃᖃᓗᓐᓂᓗ ᐃᑲᔪᕐᓯᓚᕆᒐᔭᕐᑐᖅ ᐊᑐᕐᑕᐅᓕᐅᒥᑎᑦᓯᒍᑎᐅᓗᓂ ᐃᓄᐃᑦ ᖃᐅᔨᒪᐅᓯᖏᓐᓂᑦ.

ᖃᐅᔨᓴᕐᓂᖅ ᓄᓇᓖᓪᓗ

  • ᑲᑎᒪᒋᐊᕐᓯᒪᔪᑦ ᐅᖃᕐᑐᑦ ᐱᑐᑦᓯᒪᖏᓗᐊᕐᓂᖏᓐᓂᑦ ᑲᕙᒪᑐᖃᒃᑯᑦ ᖃᐅᔨᓴᕐᑎᖏᑦᑕ ᐊᒻᒪᓗ ᖃᐅᔨᓴᕐᓂᒧᑦ ᐱᒍᑦᔨᐅᑏᑦ, ᐃᓚᒋᔭᐅᑎᓪᓗᒍ ᑲᓇᑕᒥ ᐅᑭᐅᕐᑕᑐᒥ ᖃᐅᔨᕐᓴᕕᒃ ᐃᓚᒋᔭᐅᑎᓪᓗᒋᑦ ᑲᓇᑕᒥ ᓄᓇᕐᔪᐊᖓᑕ, ᓄᓇᓕᐊᕈᐃᓪᓗ.
  • ᐅᖃᕐᓱᑎᓗ ᓄᓇᓖᑦ ᖃᐅᔨᓴᕈᑎᕕᓂᑦ ᑐᓴᕐᑎᓯᒍᑎᐅᓲᖑᖕᖏᒋᐊᖏᑦ ᓄᓇᓕᓐᓄᑦ ᖃᐅᔨᓴᕐᕕᐅᓯᒪᔪᓄᑦ, ᓄᓇᓖᓪᓗ ᐅᑉᐱᕆᔭᖃᖕᖏᒋᐊᖏᑦ ᖃᐅᔨᓴᕐᑎᓂᒃ.

ᒪᓕᒐᓕᕆᓃᑦ ᖃᐅᔨᓴᕐᓂᓗ

  • ᐆᑦᑑᑎᖃᕐᓱᑎᒃ ᖃᐅᔨᓴᕐᑕᐅᓯᒪᓂᖏᓐᓂᑦ ᓄᓇᐃᑦ ᖃᑦᓯᐅᓕᕐᓂᖏᓐᓄᑦ, ᐃᓚᖏᑦ ᑲᑎᒪᒋᐊᕐᓯᒪᔪᑦ ᐅᖃᕐᑐᐃᑦ ᐱᑕᖃᒻᒪᕆᒋᐊᖓ "ᑐᑭᒧᐊᒍᑎᒦᑦᑐᓂᒃ", ᒪᓕᒐᓕᕆᔨᓄᑦ ᑎᓕᔭᐅᒪᐅᑎᖃᕐᓱᑎᒃ ᖃᐅᔨᓴᕐᑎᑕᐅᔪᓂᒃ ᐅᑭᐅᕐᑕᑐᒥ.

ᐃᓅᖃᑎᖐᓂᑦ ᓱᑯᐃᒪᔪᓕᕆᓂᖅ

  • ᑲᑎᒪᒋᐊᕐᓯᒪᔪᑦ ᐅᖃᕐᑐᑦ ᐱᒻᒪᕆᐅᓂᖓᓂᑦ ᐃᓅᖃᑎᒌᑦ ᓱᑯᐃᒪᔪᓕᕆᔭᐅᓂᖏᑦ ᐅᑭᐅᕐᑕᑐᒥ, ᐅᖃᕐᓱᑎᒃ Jane Glassco Northern Fellowship ᐱᒍᑦᔨᐅᑎᑦ ᐊᐅᓚᑕᐅᔪᖅ Walter and Duncan Gordon Foundation ᐱᐅᔫᒋᐊᖓ ᖃᐅᔨᓴᕐᓂᐅᔪᑦ ᐃᓗᐊᓂ.

ᐊᕙᑎᒥᒃ ᓴᐳᒻᒥᓂᖅ ᓄᖑᐃᓐᓇᑎᑦᓯᑌᓕᓂᕐᓗ ᐅᑭᐅᕐᑕᑐᒥ ᐊᑦᔨᒌᖕᖏᑐᓂᒃ ᐱᕈᕐᑐᓂᒃ ᐆᒪᔪᓂᓪᓗ

ᓯᓚᐅᑉ ᐊᓯᑦᔨᐸᓪᓕᐊᓂᖓ

  • ᑲᑎᒪᒋᐊᕐᓯᒪᔪᑦ ᓄᐃᑕᐅᖁᔨᑦᓱᑎᒃ ᓄᓇᓕᓐᓂ ᐋᕐᕿᕈᑎᑦᓴᓂᒃ ᓯᓚᐅᑉ ᐊᓯᑦᔨᐸᓪᓕᐊᓂᖓ ᐱᑦᔪᑎᒋᑦᓱᒍ, ᐊᕙᑎᓕᕆᓂᕐᒥᒃ ᐱᕙᓪᓕᐊᑎᑦᓯᓂᕐᒥᓗ. ᓯᓚᐅᓪᓗ ᐊᓯᑦᔨᐸᓪᓕᐊᓂᖓ ᐊᑑᑎᓪᓚᕆᒋᐊᖓ ᓄᓇᕘᒥ, ᐋᕐᕿᕈᑎᑦᓭᑦ ᓄᓇᕘᒥᑦ ᐱᓯᒪᒋᐊᖃᕐᑐᕆᔭᐅᔪᑦ.

ᓄᖑᐃᓐᓇᑎᑦᓯᑌᓕᓂᖅ ᐊᕙᑎᓕᕆᓂᕐᓗ/ᐆᒪᔪᓂᒃ ᐊᐅᓚᑦᓯᓂᖅ

  • ᑲᑎᒪᒋᐊᕐᓯᒪᔪᑦ ᐅᖃᕐᑐᑦ ᓄᓇᕘᑦ ᐱᑦᓯᐊᓂᖏᓐᓂᑦ ᐊᕙᑎᓕᕆᓂᕐᒥᒃ ᐆᒪᔪᓕᕆᓂᕐᒥᓗ ᐊᐅᓚᑦᓯᒍᑎᐅᔪᓂᑦ, ᐅᖃᕐᓱᑎᓗ ᓄᓇᕘᒥᐅᑦ ᓄᓇᖃᕐᓂᒥᓂᒃ ᐱᒻᒪᕆᐅᑎᑦᓯᓂᖏᓐᓂᑦ.
  • ᐃᓗᓕᕐᑕᕆᔭᐅᒋᐊᖃᓪᓚᕆᓐᓂᖓ ᐃᓄᐃᑦ ᐃᓗᕐᖁᓯᖓᑕ ᐱᕐᖁᓯᖓᑕᓗ ᐅᖄᒍᑎᐅᒻᒪᕆᑦᑐᖅ ᐊᕙᑎᓕᕆᓂᐅᑉ ᐃᓗᐊᓂ. ᑲᑎᒪᒋᐊᕐᓯᒪᔪᑦ ᐅᖃᕐᒥᔪᑦ ᑐᑭᓯᓂᕐᓗᑕᐅᒪᓲᖑᓂᕐᒥᓂᒃ ᓄᖑᐃᓐᓇᑎᑦᓯᑌᓕᔨᐅᖕᖏᑐᓂᕋᕐᑕᐅᓱᑎᒃ ᐆᒪᔪᕐᓯᐅᑎᐅᒻᒪᑕ. ᕋᓗᐊᕐᑎᓗᒍ, ᐅᖃᕐᑕᐅᔪᖅ ᓄᖑᐃᓐᓇᑎᑦᓯᑌᓕᒐᓱᐊᕐᓂᖅ ᓄᑕᖑᒐᓗᐊᕐᑎᓗᒍ ᖃᓪᓗᓈᓄᑦ, ᐱᕐᖁᓯᑐᖃᕆᔭᐅᔪᕐᓕ ᐃᓄᑐᐃᓐᓇᓄᑦ ᑌᒪᖕᖓᓂᐊᕐᔪᒃ.
  • ᐅᖃᕐᑐᐃᑦ ᐱᒻᒪᕆᐅᓂᖓᓂᑦ ᓄᖑᐃᓐᓇᑎᑦᓯᑌᓕᓂᖅ ᓄᕐᕋᓂᒃ ᑐᒃᑐᓂᒃ ᑭᕙᓪᓕᒥ, ᐱᓗᐊᕐᑐᒥ ᐱᕙᓪᓕᐊᑎᑦᓯᔪᖃᕈᒪᖃᑦᑕᓕᕐᑎᓗᒍ ᓄᕐᕋᓕᐅᕕᐅᓲᓂᑦ ᓄᓇᕘᒥᑦ.

ᓄᓇᕐᔪᐊᒥᐅᖑᖃᑎᒌᑎᒍᑦ ᓱᕐᕋᑕᐅᓂᖅ

  • ᑲᑎᒪᒋᐊᕐᓯᒪᔪᑦ ᐅᖃᕐᑐᑦ ᓱᕐᕋᑕᐅᒪᓂᖏᓐᓂᑦ ᓄᓇᕐᔪᐊᒥᐅᖑᖃᑎᒌᑦ ᐃᓚᐅᕕᖃᕐᐸᑐᑦ ᓄᓇᕘᑦ ᓄᓇᓕᖏᓐᓄᑦ ᐅᑭᐅᕐᑕᑐᒥᓪᓗ ᐊᕙᑎᓕᕆᓂᕐᒥᒃ, ᐃᓚᒋᔭᐅᑎᓪᓗᒍ ᐆᑦᑐᕋᐅᑎᒃ ᐅᔮᓯᐊᒥᐅᑦ ᖄᓲᖏᑦᑕ ᑲᑕᓚᐅᕐᓂᕕᓂᖏᑦ ᖁᑦᓯᑑᑉ ᕿᑭᕐᑕᖏᑦᑕ ᐃᒪᖏᓐᓄᑦ ᒣ 2016-ᖑᑎᓪᓗᒍ.

ᐊᓯᐊᒎᕐᑐᓂᒃ ᐃᑯᒪᓕᐅᕐᓂᖅ

  • ᑲᑎᒪᒋᐊᕐᓯᒪᔪᑦ ᐅᖃᕐᑐᑦ ᐱᑕᖃᖕᖏᓗᐊᕐᓂᕋᐃᑦᓱᑎᒃ ᒪᓕᒐᐅᔪᓂᒃ ᐊᓯᐊᒎᕐᑐᓂᒃ ᐃᑯᒪᓕᐅᕈᑎᑦᓴᓅᓕᖓᔪᓄᑦ, ᐱᓗᐊᕐᑐᒥ ᖁᓪᓕᖅ ᐃᑯᒪᓕᐅᕐᑏᑦ ᑎᒥᖓᓂᑦ, ᐅᕐᓱᐊᓗᒃ ᐊᑐᕐᑕᒪᕆᐅᑎᓪᓗᒍ ᓄᓇᕘᒥᑦ ᐃᑯᒪᖃᕐᑎᓯᓂᕐᒧᑦ.
  • ᐊᓯᐊᒎᕐᑐᐃᑦ ᐃᑯᒪᓕᐅᕈᑏᑦ ᐃᓚᖃᕈᓐᓇᑐᑦ ᐊᓄᕆᒧᑦ ᐃᑯᒪᓕᐅᕐᓂᒥᒃ, ᐱᓗᐊᕐᑐᒥ ᑭᕙᓪᓕᐅᑉ ᓄᓇᖓᓂᑦ, ᐊᓄᕆᓯᑎᐅᒻᒪᑦ.

ᐅᑭᐅᕐᑕᑐᖅ ᐃᓘᓐᓈᒎᕐᑐᒥᒃ ᖃᓄᐃᓕᖓᓂᖓ

ᑕᕐᕋᒥᑦ-ᑕᕐᕋᒧᑦ ᐊᒻᒪᓗ ᐃᓄᐃᑦ ᐊᐅᓚᑦᔭᕆᐊᕐᓂᖏᑦ

  • ᓲᖑᓯᐅᒥᑎᑦᓯᓂᖅ ᑕᕐᕋᒥᑦ-ᑕᕐᕋᒧᑦ ᑲᑐᑦᔨᖃᑎᒌᓐᓂᒥᒃ ᖃᓪᓗᓈᓂᑦ ᐱᓯᒪᖕᖏᖔᕐᑐᓂᒃ ᓄᐃᑦᓯᓗᑎᒃ. ᐊᑕᐅᓯᖅ ᐅᖃᕐᑐᖅ ᐆᑦᑐᕋᐅᑎᖃᕐᓱᓂ ᐃᓕᓐᓂᐊᕈᑎᓂᒃ, ᐊᑐᕐᑕᐅᓲᓂᑦ ᐱᓯᒪᑦᓱᑎᒃ ᐋᓪᐴᑕᒥᑦ. ᐅᖃᕐᓱᓂᓗ ᓄᓇᕘᑦ ᐊᑐᕈᓐᓇᑐᑦᓴᐅᒋᐊᖓ ᐊᑯᑭᑦᑐᒥᐅᑦ ᐃᓕᓐᓂᐊᕈᑎᖏᓐᓂᑦ ᑐᖕᖓᕕᖃᕐᓂᓴᓂᒃ. ᑲᓇᑕ ᐃᓕᑦᓯᕕᖃᕈᓐᓇᒪᑦ ᐊᓯᖏᓐᓂᑦ ᐃᓄᐃᑦ ᓄᓇᖃᕐᕕᒋᒻᒥᔭᖏᓐᓂᑦ, ᐃᓪᓗᓕᕆᓂᕐᒥᒃ, ᐃᖏᕐᕋᐅᑎᓕᕆᓂᕐᒥᒃ, ᐱᑐᑦᓯᒪᐅᑎᓕᕆᓂᕐᒥᒃ/ᐊᒻᒪᓗ ᐃᓱᒪᐅᑉ ᖃᓄᐃᖕᖏᓯᐊᕆᐊᖃᕐᓂᖓᓄᑦ ᐱᓇᓲᑎᐅᓲᓂᑦ.
  • ᐅᖃᕐᒥᔪᐃᑦ ᑕᐅᕐᓰᓕᐅᒥᖃᑦᑕᑐᑦᓴᐅᓂᖏᓐᓂᑦ ᐃᓄᐃᑦ ᓄᓇᖃᕐᕕᖃᑎᒌᖕᖏᑐᐃᑦ (ᓄᓇᕘᑦ, ᐊᑯᑭᑦᑐᒥᐅᑦ) ᐱᓇᓱᐊᖃᑎᒌᓕᐅᒥᓗᑎᒃ, ᑕᐅᕐᓰᖃᑎᖐᓪᓗᑎᒃ ᐱᓇᓱᐊᕈᑎᒋᕙᑦᑕᖏᑦ ᓱᓇᐅᓂᖏᓐᓄᑦ ᑲᔪᖏᕐᓴᐅᑎᖃᑎᒌᓪᓗᑎᓗ. ᑕᒪᒃᑯᐊ ᐊᕝᕕᐊᑕᐅᕙᑦᑐᑦ ᖃᖓᑦᑕᐅᑏᑦ ᐊᑭᑐᔫᓂᖏᓐᓄᑦ, ᐃᑳᕈᓐᓇᐅᑎᖃᕆᐊᖃᕐᓂᒧᑦ, ᐱᓇᓱᒍᓐᓇᐅᑏᓪᓗ ᓯᑎᓗᐊᕐᓂᖏᓐᓄᑦ, ᐱᖁᔦᓪᓗ ᓄᕐᖃᖓᑎᑦᓯᔪᑦ ᐊᐅᓚᑕᐅᒍᓐᓇᓂᖏᓐᓄᑦ ᐱᕈᕐᑐᐃᑦ ᓂᖀᓪᓗ, ᐱᖁᔦᓪᓗ ᐱᕕᑭᓪᓕᑎᕆᔪᑦ ᐱᓇᓱᒍᓐᓇᓂᕐᒥᒃ ᓇᓪᓕᐊᓂ ᓄᓇᐅᔪᓂᑦ. ᑲᑎᒪᐊᕐᓯᒪᔪᑦ ᐅᖃᕐᒥᔪᑦ ᐱᓇᓱᐊᕐᑕᐅᔪᕕᓂᕐᒥᒃ ᐱᑭᐊᓚᓱᕐᓱᐊᖅ ᓄᐃᑕᐅᓯᒪᔪᑦ ᐃᓄᐃᑦ ᓄᓇᕐᔪᐊᒥᐅᖑᖃᑎᒌᑦ ᑎᒥᖓᓄᑦ ᖃᐅᔨᓴᕐᓂᐅᓱᓂ ᖃᓄᐃᓘᕐᑎᐅᒐᔭᕐᓂᖏᓐᓄᑦ ᐅᑭᐅᕐᑕᑐᒥ ᐃᒪᕐᐱᒃ ᐱᓇᓱᐊᖃᑎᒌᒍᑎᐅᓗᓂ ᓄᓇᕘᒥᐅᓄᑦ ᐊᑯᑭᑦᑐᒥᐅᓄᓪᓗ.

ᑲᓇᑕᒥᒃ ᐊᕐᓵᑕᐅᑦᑌᓕᑎᑦᓯᓂᖅ ᐊᒻᒪᓗ ᑲᓇᑕᐅᒥ ᐅᑭᐅᕐᑕᑐᒥᐅᑦ ᓯᕗᓕᕐᓂᖏᑦ

  • ᑲᑎᒪᒋᐊᕐᓯᒪᔪᑦ ᐃᑉᐱᒍᓱᑦᑐᑦ ᑲᓇᑕ ᐊᑐᕐᓯᒪᑐᐃᓐᓇᒋᐊᖓ ᓄᓇᖃᕐᖄᓰᒪᔪᓂᒃ ᐊᕐᓵᑕᐅᑦᑌᓕᒍᑎᖃᕐᓱᑎᒃ ᑲᓇᑕᐅᑉ ᓄᓇᖓᓂᑦ ᓱᒃᑯᓕᕋᓗᐊᕐᐸᑕ ᐃᓅᖃᑎᒋᑎᒍᑦ, ᐃᓕᓐᓂᐊᓂᒃᑯᑦ ᐃᓗᓯᒃᑯᑦ ᒪᑭᑕᒐᓱᐊᕐᓂᑯᓪᓗ ᐃᓄᑐᐃᓐᓀᑦ. ᐅᖃᕐᑕᐅᔪᖅ ᑲᓇᑕ ᐊᑐᕐᓂᕐᓴᐅᒋᐊᖃᕐᓂᖓᓂᑦ ᐃᓄᑐᐃᓐᓇᓂᒃ ᐊᒻᒪᓗ ᐊᑐᕐᑐᓴᓕᐅᕐᓗᑎᒃ ᐊᑯᓃᕐᑐᒥᒃ ᐃᓄᐃᑦ ᐊᕐᓵᑕᐅᑎᑦᓯᑌᓕᔨᐅᒻᒪᑕ ᐅᑭᐅᕐᑕᑐᒥᒃ, ᐃᓚᒋᔭᐅᑎᓪᓗᒍ ᐱᕕᑦᓴᖃᕐᑎᑕᐅᒋᐊᓪᓚᕆᐊᖃᕐᓂᖏᑦ ᐅᑭᐅᕐᑕᑐᒥ ᐅᓇᑕᕐᑎᓭᑦ ᐊᒻᒪᓗ ᓄᓇᔫᒥ ᐅᐃᒪᓇᕐᑐᓕᕆᔩᑦ.
  • ᐅᖄᒍᑎᖃᕐᓱᑎᓗ ᖃᐅᔨᓯᒪᔭᕐᒥᓂᒃ ᐱᑐᑦᓯᒪᖕᖏᑑᒋᐊᖏᑦ ᖃᓄᐃᑦᑐᒦᓐᓂᖏᑦᑕ ᐅᑭᐅᕐᑕᑐᒥᐅᑦ ᐃᓄᐃᓪᓗ, ᑲᓇᑕᐅᓪᓗ ᖃᓄᐃᓘᕐᑎᐅᓂᕋᕐᓂᖓ ᓄᓇᕐᔪᐊᒥᐅᖑᖃᑎᒌᑦ ᑲᑎᒪᕕᕐᔪᐊᖓᓂᑦ. ᐅᖃᐅᓯᖏᑦ ᑲᓇᑕᐅᑉ ᐊᖓᔪᕐᖄᖓᑕ ᑐᕈᑑᑉ ᓄᓇᕐᔪᐊᒥᐅᖑᖃᑎᒌᑦ ᑲᑎᒪᕕᕐᔪᐊᖓᓄᑦ ᓯᑉᑎᒻᐱᕆ 2017-ᒥ, ᓇᓗᓀᕐᓯᓚᕆᑦᑐᖅ ᐱᐅᖕᖏᑐᒥᒃ ᓱᕐᕋᐃᓂᕆᓯᒪᔭᖏᓐᓂᑦ ᖃᓪᓗᓈᑦ ᑎᑭᒻᒪᑕ ᓄᓇᖃᕐᖄᓰᒪᔪᑦ ᓄᓇᖏᓐᓄᑦ ᐅᑭᐅᕐᑕᑐᒥᐅᓄᓪᓗ, ᐃᑉᐱᒋᔭᐅᓕᓚᐅᔪᖅ ᐋᕐᕿᒋᐊᕈᑎᑦᓴᐅᓕᕐᑐᒥᒃ ᐱᑕᖃᓕᕆᐊᖓ.
  • ᐱᓇᓱᐊᖃᑎᒌᓐᓂᑰᓕᖓᔪᓄᑦ, ᑲᑎᒪᒋᐊᕐᓯᒪᔪᑦ ᐅᖃᕐᑐᑦ ᐱᑐᑦᓯᒪᖕᖏᑐᒋᐊᖏᑦ ᓄᓇᓖᑦ ᓯᕗᓪᓕᐅᔭᐅᒋᐊᖃᕐᑐᔭᖏᑦ ᐊᒻᒪᓗ ᑲᓇᑕᐅᑉ ᐊᐅᓚᑦᔭᕆᐊᕈᑎᒋᒋᓕᐊᖏᑦ ᐅᑭᐅᕐᑕᑐᒧᑦ ᓄᓇᕐᔪᐊᒥᐅᖑᖃᑎᒌᑦ ᓯᕗᕌᓂᑦ. ᐅᖃᕐᓱᑎᓗ ᑭᖕᖒᒪᓇᕐᓂᖓᓂᑦ ᑲᕙᒪᓕᕆᒍᓯᐅᒋᐊᓖᑦ ᒪᓕᒐᖃᑦᓯᐊᕆᐊᖃᕐᓂᓗ ᓱᓇᑐᐃᓐᓀᑦ ᓱᕐᕋᐃᖃᑦᑕᑐᐃᑦ ᐃᓄᐃᑦ ᓄᓇᓕᖏᓐᓂᑦ ᐊᐅᓚᑦᔭᕆᐊᕈᑎᐅᑦᓯᐊᕆᐊᖃᕐᒪᑕ. ᑲᓇᑕᐅᑉ ᐅᑭᐅᕐᑕᑐᒧᑦ ᒪᓕᒐᓕᐊᕆᓂᐊᕐᑕᖓᓂᑦ.
  • ᐊᒻᒪᓗᒋᐊᓪᓚᖅ ᐅᖄᒍᑎᖃᕐᒥᓱᑎᒃ ᐃᓄᐃᑦ ᑭᒡᒐᑐᕐᑎᖃᕆᐊᖃᕐᓂᖏᓐᓂᑦ ᓄᓇᕐᔪᐊᒥᐅᖑᖃᑎᒌᑦ ᓵᖏᓐᓂᑦ. ᐅᖃᕐᑕᐅᓱᓂ ᐃᓄᐃᑦ ᐃᓚᐅᕕᖃᕋᓗᐊᕐᐸᑕ ᓄᓇᕐᔪᐊᒥᐅᖑᖃᑎᒌᑦ ᒪᓕᒐᓕᐅᕐᓂᖏᓐᓄᑦ, ᐅᓐᓂᑑᑎᓕᐊᖏᑦ ᐊᑐᓕᕐᑎᑕᐅᓲᖑᖕᖏᑐᑦ ᐃᓚᐅᓕᕐᑎᑕᐅᒐᑎᓗ ᑲᓇᑕᐅᕐ ᐊᐅᓚᑦᔭᕆᐊᕈᑎᖏᓐᓄᑦ ᓄᓇᕐᔪᐊᒥᐅᖑᖃᑎᒌᑦ ᓵᖏᓐᓂᑦ. ᐅᓐᓂᑑᑎᐅᒻᒥᔪᖅ ᑲᓇᑕ ᕿᒥᕐᕈᑐᑦᓴᐅᒋᐊᖓ ᖃᓄᐃᓘᕈᑎᑦᓴᓂᒃ ᓴᐳᒻᒥᒋᐊᕈᑎᑦᓴᓂᒃ ᐊᑌᓐᓇᓕᒫᓕᕐᑐᒥᒃ ᐃᓚᐅᕕᖃᕐᓂᐊᓂᖏᓐᓄᑦ ᐅᑭᐅᕐᑕᑐᒥ ᑲᑎᒪᔨᖏᓐᓄᑦ.
  • ᐅᖃᕐᒥᔪᐃᑦ ᐃᓱᒫᓘᑎᒥᓂᒃ ᐅᒥᐊᕐᔪᐊᑦ ᐊᒥᓲᓗᐊᓕᕐᓂᖏᓐᓄᑦ, ᐱᓗᐊᕐᑐᒥ ᒥᑭᓂᕐᓭ ᐅᒥᐊᑦ ᑕᓪᓗᕈᑎᐅᑉ ᐃᒪᖓᓂᑦ. ᐅᖃᕐᑕᐅᓱᓂᓗ ᐃᓄᐃᑦ ᐃᓚᐅᕕᖃᕐᓂᓴᐅᒋᐊᖃᕐᓂᖏᓐᓂᑦ ᑲᒪᓇᓱᐊᓂᕐᒥᒃ, ᐊᑐᓕᕐᑎᓯᓂᒃᑯᑦ ᒪᓕᒐᕐᓂᒃ ᓇᒻᒥᓂᖁᑎᖃᕐᓗᑎᓗ ᑭᓯᑕᐅᒍᑎᖏᓐᓂᑦ ᐅᒥᐊᑦ ᐊᐅᓚᔪᐃᑦ. ᐅᖃᕐᑐᖃᕐᒥᔪᖅ ᓄᐃᑕᐅᔪᑦᓴᐅᓂᖓᓂᑦ ᐋᕐᕿᓯᒪᐅᑎᑦᓴᖅ ᐊᑭᓕᕐᑐᐃᑎᑦᓯᒍᑎᐅᓂᐊᕐᑐᖅ ᐅᒥᐊᓂᒃ ᑕᓪᓗᕈᑎᐅᑉ ᐃᒪᖓᒎᕐᑐᓂᒃ. ᐊᓯᖏᓪᓗ ᐅᖃᕐᑎᓗᒋᑦ ᑲᓇᑕ ᓴᐳᒻᒥᓂᕐᓴᐅᒍᓐᓇᕆᐊᖓ ᓄᓇᓖᑦ ᐊᑑᑎᑎᒐᓱᐊᕐᑕᖏᓐᓂᑦ.
  • ᑫᓪᓚᑐᕐᑕᐅᒋᐊᖃᕐᓂᓗ ᑭᖕᖒᒪᓇᕐᑐᑦ ᒪᓕᒐᓕᐊᖑᓯᒪᔪᓄᑦ ᓄᓇᕗᑦ ᐊᖏᖃᑎᒌᒍᑎᖓᓂᑦᑐᓄᑦ ᐊᑐᓕᕐᑎᓯᒪᑦᓯᐊᕆᐊᓕᓐᓄᑦ ᐅᒥᐊᑦ ᐅᓄᕐᓯᕙᓪᓕᐊᓂᐊᕐᒪᑕ ᐅᑭᐅᕐᑕᑑ ᐃᒪᖏᓐᓂᑦ. ᐱᓇᓲᑎᑦᓴᒋᐊᓪᓓᓗ ᑭᖕᖒᒪᕐᒥᓱᑎᒃ ᑲᕙᒪᐅᔪᓂᑦ ᐃᓚᐅᓕᐅᒥᒋᐊᖃᕐᒪᑕ ᑕᒪᒃᑯᓂᖓ ᐊᑐᓕᕐᑎᓯᔨᐅᖃᑎᐅᓗᑎᒃ.

ᑕᐅᕐᓰᓃᑦ

  • ᐊᐴᒪᓘᑎᐅᓲᑦ ᓄᓇᕐᔪᐊᒥᐅᖑᖃᑎᒌᑎᒍᑦ ᑕᐅᕐᓰᒍᓐᓇᓂᕐᓄᑦ ᐱᕕᑭᓪᓕᓭᔪᑦ ᒪᑭᑕᒐᓱᐊᕐᓂᒥᒃ ᐱᕙᓪᓕᐊᑎᑦᓯᓂᐅᓕᕋᔭᕐᑐᓂᒃ. ᐆᑦᑑᑎᓗᒍ, ᐊᒥᕆᑫᑦ ᓄᓇᖓᑕ ᐃᒪᕐᒥᐅᑕᖏᓐᓂ ᓴᐳᒻᒥᓂᕐᒧᑦ ᐱᖁᔦᑦ ᐱᕕᑭᓪᓕᑎᕆᒻᒪᑕ ᐊᖁᐃᒪᔨᓂᒃ ᐅᒥᐊᕐᔪᐊᑰᕐᐸᑐᓂᒃ ᕿᓯᔭᕐᓂᒃ ᓂᐅᕕᕐᖃᔭᖕᖏᑑᑎᑦᓯᓱᓂ ᓄᓇᓖᑦ ᓴᓇᓯᒪᔭᖏᓐᓂᑦ ᐆᑦᑑᑎᒋᓗᒍ ᑲᖏᕐᑐᒑᐃᒻᒥᐅᓂᒃ, ᐱᖁᔭᖅ ᓄᕐᖃᖓᑎᑦᓯᒪᑦ ᐊᒥᕆᑫᑦ ᓄᓇᖓᓅᕐᑕᐅᖃᔭᖕᑑᑎᑦᓯᓂᕐᒥᒃ ᕿᓯᔭᕐᓂᒃ ᐊᒻᒪᓗ ᐊᓯᖏᓐᓄ ᓄᓇᕐᔪᐊᒥ ᓄᓇᓕᕐᓚᐅᔪᓄᑦ. ᑲᕙᒪᒃᑯᑦ ᐊᐅᓚᑦᔭᕆᐊᕈᑎᖃᕆᐊᓪᓚᕆᐊᓖᑦ ᑫᓪᓚᑐᐃᓗᑎᒃ ᓂᐅᕕᐊᑦᓴᐅᒍᓐᓇᑎᑦᓯᓕᕐᓗᑎᒃ ᕿᓯᔭᕐᓂᒃ. ᐅᖃᕐᓱᑎᓗ ᖃᖓᑦᑕᐅᑏᑦ ᐊᑭᑐᔫᓂᖏᓐᓄᑦ ᓄᓇᕘᑦ ᐃᓗᐊᓂ ᓄᕐᖃᖓᑎᑦᓯᒍᑎᐅᓚᕿᑦᓱᓂ ᐱᕕᖃᕐᑎᓯᒍᑎᐅᒍᓐᓇᕋᔭᕐᑐᓂᒃ ᓄᓇᕐᔪᐊᒥᐅᖑᖃᑎᒌᑎᒍᑦ ᓄᓇᒥᐅᑕᓂᒃ ᓂᐅᕐᕈᓭᒍᓐᓇᓂᕐᒥᒃ.

ᓴᐳᑦᔨᓯᒪᓂᖅ ᐃᓕᒪᓇᕐᑐᒦᑦᑎᓯᑦᑌᓕᓂᕐᓗ

  • ᑲᑎᒪᒋᐊᕐᓯᒪᔪᑦ ᐅᖃᕐᑐᑦ ᓄᐃᑕᐅᓕᐅᒥᖁᔨᑦᓱᑎᒃ ᑲᓇᑕᐅᑉ ᐅᓇᑕᕐᑎᖏᓐᓂᑦ ᓄᓇᕘᒥᑦ, ᐱᓇᓱᐊᖃᑎᒌᓕᐅᒥᓕᕐᓗᑎᓗ ᑲᓇᑕᐅᑉ ᐅᓇᑕᕐᑎᖏᑦᑕ ᐊᒻᒪᓗ ᓄᓇᓖᑦ ᐱᒍᑦᔨᕕᐅᔪᐃᓪᓗ, ᐆᑦᑑᑎᒋᓗᒍ ᓄᓇᕘᒥᑦ ᐃᓕᓐᓂᐊᕕᕐᔪᐊᖓ, ᐃᓚᐅᑎᓪᓗᒍ ᑲᓇᑕᒥ ᐊᕐᓵᑕᐅᑎᑦᓯᑌᓕᔩᑦ.
  • ᐅᖃᕐᓱᑎᓗ ᐱᕕᑦᓴᐅᒍᓐᓇᕋᔭᕐᓂᖓᓂᑦ ᓄᓇᓖᑦ ᐃᓚᐅᓂᖃᕐᐸᑕ ᑲᓇᑕᒥ ᐅᓇᑕᕐᑏᑦ ᐅᒥᐊᕐᔪᐊᖏᑦ, ᐅᒥᐊᕐᔪᐊᑦ  ᐅᑭᐅᕐᑕᑐᒥᑦ ᑲᒪᓇᓱᐊᓂᖏᑦ ᐱᓇᓱᐊᖃᑎᖃᕋᔭᕐᒪᑕ ᓄᓇᓕᓐᓂᑦ ᐅᑭᐅᕐᑕᑐᒥ. ᐅᖃᕐᒥᔪᐃᑦ ᑲᑐᑦᔨᖃᑎᒌᓪᓚᕆᒋᐊᖃᕐᓂᖏᓐᓂᑦ ᐱᕕᑦᓴᓯᐅᖃᑎᒌᓗᑎᒃ ᐃᓕᓐᓂᐊᑎᑦᓯᒍᑎᑦᓴᓂᒃ, ᐱᒍᓐᓇᓯᑎᑦᓯᒍᑎᑦᓴᓂᒃ ᐊᒻᒪᓗ ᖃᐅᔨᒪᐅᓯᐅᔪᓂᒃ ᑕᐅᕐᓰᖃᑎᒌᓐᓂᒥᒃ.
ᐅᓪᓗᖓᓂ ᐋᖅᑭᒋᐊᖅᑕᐅᔪᖅ:
sasasas