ᐅᑭᐅᖅᑕᖅᑐᕐᒧᑦ ᐊᑐᐊᒐᓕᕆᓂᕐᒧᑦ ᑐᙵᕕᖕᒧᑦ ᐊᕕᒃᓯᒪᔪᒥ ᑲᑎᒪᓂᖅ: ᑰᒡᔪᐊᖅ, ᒫᓂᑑᐸ, ᐅᓇ ᓇᐃᓈᖅᓯᒪᔪᖅ ᐅᑭᐅᖅᑕᖅᑐᒥ ᐊᑐᐊᒐᒃᓴᒧᑦ ᐊᕙᓗᒃᓴᖓᓄᑦ ᑲᑎᒪᑎᓪᓗᒋᑦ ᑰᒡᔪᐊᖅ, ᒪᓂᑑᐸ ᑕᐃᑲᓂ ᐅᒃᑑᐸ 4, 2017

ᐃᓗᐃᑦᑑᓗᓂ ᐸᕐᓇᐃᓂᖅ ᐊᒻᒪᓗ ᐱᔪᓐᓇᕐᓂᕐᓂᒃ ᓴᓇᓂᖅ

• ᐊᔾᔨᒌᙱᑦᑑᑎᑦ ᐃᓱᒪᒃᓴᖅᓯᐅᕈᑎᒋᔭᖃᕆᐊᖃᖅᑐᑦ ᐱᔾᔪᑎᒋᓪᓗᒍ ᓴᓇᔭᐅᓂᖏᑦ ᐊᖏᔫᑎᑦ. ᖄᒃᑲᓐᓂᐊᒍᑦ ᑮᓇᐅᔭᖅᑖᖅᑎᑦᑎᓂᐅᑉ, ᐊᖏᔫᑎᓂᒃ ᐱᕈᖅᑎᑦᑎᓇᓱᐊᕐᓂᖅ ᐃᓗᐃᑦᑑᔪᓂᒃ ᐸᕐᓇᐃᓂᖃᕆᐊᖃᖅᐳᑦ ᐃᓚᒋᔭᖃᖅᑐᓂᒃ ᐱᔪᓐᓇᕐᓂᕐᒥᒃ ᓴᓇᓂᕐᒥᒃ, ᐃᓱᒪᒃᓴᖅᓯᐅᑦᑎᐊᕐᓂᕐᒥᒃ ᐊᒻᒪᓗ ᐃᓕᓐᓂᐊᕐᓂᕐᒥᒃ ᓄᓇᓕᖕᓄᑦ. ᑕᒪᓐᓇ ᐊᕕᒃᓯᒪᔪᒧᑦ ᐸᕐᓇᒃᓯᒪᑦᑎᐊᕐᓂᖅᓴᐅᑎᑦᑎᓛᖅᑐᖅ ᐃᓚᐅᖃᑕᐅᔭᕆᐊᒃᓴᖅ ᐱᓕᕆᐊᒃᓴᕐᒥ ᐊᒻᒪᓗ ᐋᖅᑭᒃᓯᒪᓂᖅᓴᐅᑎᑦᑎᓛᖅᖢᑎᒃ ᐸᖅᑭᔭᕆᐊᒃᓴᖅ ᒪᑭᒪᑎᑦᑎᔭᕆᐊᒃᓴᕐᓗ ᐊᖏᔫᑎᓂᒃ.
• ᐱᔪᓐᓇᕐᓂᕐᓂᒃ ᓴᓇᓂᖅ ᐊᒻᒪᓗ ᐃᓱᒪᒃᓴᖅᓯᐅᑦᑎᐊᕐᓂᖅ ᐊᒃᑐᐊᓪᓗᓂ ᐊᖏᔫᑎᓂᒃ ᐱᕈᖅᑎᑦᑎᓇᓱᐊᕐᓂᕐᒥᒃ ᓴᙱᒃᑎᒋᐊᖅᑎᑦᑎᓛᖅᑐᖅ ᓄᓇᓕᖕᓂᒃ ᓇᐅᒃᑯᓗᒃᑖᖅ, ᐊᒻᒪᓗ ᐅᑭᐅᖅᑕᖅᑐᕐᒥ ᐊᕕᒃᓯᒪᔪᓂᒃ ᐱᕈᖅᑎᑦᑎᒃᑲᓐᓂᕈᓐᓇᖅᑎᑦᑎᓗᓂ ᐃᓅᖃᑎᒌᖕᓂᕐᒥ ᑮᓇᐅᔭᓕᐅᕈᓐᓇᕐᓂᕐᒥᒡᓗ ᐱᕙᓪᓕᐊᑎᑦᑎᓂᕐᒥᒃ ᓄᓇᓕᖕᒥᓂ.

ᐊᖕᖏᓂᖅᓴᑦ ᐊᒃᑐᐊᔭᑎᒃ

• ᐊᖏᔫᑎᑦ ᐊᒃᑐᐊᓂᖃᖅᑐᑦ ᐊᓯᖏᓐᓄᑦ ᑲᒪᒋᔭᐅᑲᐅᑎᒋᔭᕆᐊᖃᖅᑐᓂᒃ, ᓲᕐᓗ ᓂᕿᒃᓴᖃᑦᑎᐊᕐᓂᖅ, ᐆᒻᒪᖅᑯᑏᑦ, ᐃᒡᓗᓕᕆᓂᖅ ᐊᒻᒪᓗ ᐊᒃᑐᐊᔪᓐᓇᕐᓂᖅ.
• ᐃᒡᓗᓕᕆᓂᕐᒧᑦ ᐱᔾᔪᑕᐅᔪᑦ ᓄᓇᓕᖕᒥᙶᖅᑐᓂᒃ ᐋᖅᑭᒋᐊᕈᑎᖃᕆᐊᖃᖅᑐᑦ.

ᑲᔪᓯᔪᒥᒃ ᒪᑭᓚᔾᔪᑕᐅᓂᐊᖅᑐᓂᒃ

• ᓴᓇᓂᖅ ᐅᓗᐃᑦᑑᔪᓂᒃ ᐅᑭᐅᖅᑕᖅᑐᕐᒥ ᐊᖏᔫᑎᓂᒃ ᐱᕈᖅᑎᑦᑎᓇᓱᐊᕐᓂᖃᑐᐃᓐᓇᙱᑉᐳᖅ ᓄᑖᓂᒃ ᐱᓕᕆᐊᒃᓴᕐᓂᒃ, ᑭᓯᐊᓂᑦᑕᐅᖅ ᐱᕈᖅᑎᑦᑎᓇᓱᐊᒃᑲᓐᓂᕐᓂᕐᒥᒃ ᐱᑕᖃᖅᐸᒌᖅᑐᓂᒃ ᐊᖏᔫᑎᓂᒃ. ᑲᓇᑕᐅᑉ ᐱᓇᖕᓇᖓᓂᑦ ᑲᓇᖓᖕᓇᖓᓄᑦ ᐊᖅᑯᑎᑯᑖᖓ, ᐆᒃᑑᑎᒋᓪᓗᒍ, ᐊᑐᐊᓯᐊᖅᑕᐅᑐᐃᓐᓇᙱᖦᖢᓂ ᐱᕈᖅᑎᑕᐅᓇᓱᐊᓚᐅᖅᐳᖅ, ᑭᓯᐊᓂ ᓄᑖᕈᕆᐊᖅᑎᑕᐅᖏᓐᓇᕆᐊᖃᖅᐳᖅ.

ᓂᕿᒃᓴᖃᑦᑎᐊᕐᓂᖅ ᐊᒻᒪᓗ ᐆᒪᔪᓐᓇᕐᓂᐅᑉ ᐊᑭᖓ

• ᒐᕙᒪᒃᑯᑦ ᑮᓇᐅᔭᖅᑖᖅᑎᑦᑎᖃᑦᑕᕐᓂᖏᑦ ᐃᓱᒪᒋᔭᖃᕆᐊᖃᖅᑐᑦ ᐊᔾᔨᐅᙱᑦᑐᒥᒃ ᐱᔭᕆᐊᓕᖏᓐᓂᒃ, ᐊᒻᒪᓗ ᐆᒪᔪᓐᓇᕐᓂᕐᒧᑦ ᐊᑭᖓᓂᒃ, ᐅᖓᓯᒃᑐᓂ ᓄᓇᓕᖕᓂ.
• ᓂᕿᒃᓴᖃᑦᑎᐊᕐᓂᖅ ᐊᒻᒪᓗ ᓇᖕᒥᓂᖅ ᓂᕿᖃᕈᓐᓇᕐᓂᖅ ᐱᔾᔪᑕᐅᕐᔪᐊᖅᑑᒃ. ᑲᓇᑕᐅᑉ ᒐᕙᒪᑐᖃᖓ ᐃᑲᔪᖅᓱᓪᓗᐊᖅᑐᑦ ᐅᑭᐅᖅᑕᖅᑐᕐᒥ ᓄᓇᓖᑦ ᓇᖕᒥᓂᖅ ᐱᕈᖅᑎᑦᑎᓇᓱᖃᑦᑕᕐᓂᕐᒥᓂᒃ ᓂᕿᓂᒃ. ᓄᓇᓕᖕᓂ ᑐᙵᕕᖃᖅᑐᑦ ᐱᒋᐊᖅᑎᑕᐅᔪᓂᑦ ᐃᓚᒋᔭᐅᕗᖅ LED ᐃᒪᒃᑯᑦ ᐱᕈᖅᑎᑦᑎᔾᔪᑎᒥᒃ ᓴᓇᔭᐅᕙᓪᓕᐊᔪᒥᒃ ᐊᐸᔅᐅᐊᔭᒃ ᑯᕇ ᐊᓪᓚᓄᑦ.
• ᓂᕿᑦᑎᐊᕙᐅᙱᑦᑐᑦ ᐊᑭᑭᓐᓂᖅᓴᐅᒐᔪᑦᑐᑦ ᓱᕈᕐᓇᖅᑐᓂᑦ, ᓂᕿᑦᑎᐊᕙᐅᔪᓂᑦ. ᐅᑭᐅᖅᑕᖅᑐᕐᒥ ᓂᐅᕕᖅᑏᑦ ᑮᓇᐅᔭᓕᐅᕐᔪᐊᕐᕕᒋᑐᐃᓐᓇᖅᑰᔨᒋᔭᐅᕙᒃᑐᑦ ᓄᓇᓕᖕᓂᑦ. ᓂᖀᑦ ᐊᑭᖏᑦ ᑰᒡᔪᐊᕐᒥ ᐊᑭᑐᓗᐊᖅᑐᑦ, ᐱᓗᐊᖅᑐᒥᒃ ᑕᐃᒪᙵᓂᑦ ᒪᑐᔭᐅᓚᐅᖅᑎᓪᓗᒍ ᓄᓇᒃᑰᕈᑎᑯᑖᒃᑯᑦ ᐃᖏᕐᕋᔾᔪᑎ ᐅᐱᕐᖔᖓᓂ 2017.
• ᐃᓕᖅᑯᓯᑐᖃᖅᑎᒍᑦ ᐊᖑᓇᓱᖃᑦᑕᕐᓂᖅ ᐊᑭᑐᔪᒻᒪᕆᐊᓗᒃ, ᐱᓗᐊᖅᑐᒥ ᖃᓪᓗᓈᓂ ᐊᕕᒃᓯᒪᓂᖏᑕ ᐅᐊᖕᓇᖅᐸᓯᐊᓃᑦᑐᓄᑦ ᓄᓇᓕᖕᓄᑦ.
• ᐃᓚᐅᖃᑕᐅᔪᑦ ᐃᒃᐱᒍᓱᓚᐅᖅᑐᑦ ᐅᑭᐅᖅᑕᖅᑐᕐᒥ ᓂᕿᑦᑎᐊᕙᖃᕐᓂᕐᒧᑦ ᐱᓕᕆᐊᒃᓴᖅ ᐃᑲᔪᖅᓱᕐᓂᖅᓴᐅᔪᖅ ᐃᓕᖅᑯᓯᑐᖃᖅᑎᒍᑦ ᐊᖑᓇᓱᖕᓂᕐᒧᑦ ᐅᑭᐅᖅᑕᖅᑐᕐᒥ ᐊᕕᒃᓯᒪᔪᓄᑦ ᖃᓪᓗᓈᓂ ᐊᕕᒃᓯᒪᔪᑦ ᐅᐊᖕᓇᐸᓯᖏᓐᓄᑦ.

ᓄᓇᓖᑦ ᐊᑦᑕᕐᓇᖅᑐᖃᖅᑕᐃᓕᒪᓂᖏᑦ

• ᓄᓇᓖᑦ ᐊᑦᑕᕐᓇᖅᑐᖃᖅᑕᐃᓕᒪᑎᑕᐅᓂᖅᓴᐅᓂᖏᑦ, ᐃᓚᐅᓪᓗᓂ ᐅᑭᐅᖅᑕᖅᑐᕐᒥ ᓄᓇᓕᖕᓂ ᐋᖓᔮᕐᓇᖅᑐᓂᒃ ᓂᐅᕕᐊᒃᓴᖃᖅᑐᖃᖅᐸᖕᓂᖓ, ᐃᓱᒫᓗᒋᔭᐅᓚᐅᖅᑐᖅ ᐃᓚᐅᖃᑕᐅᔪᓄᑦ.
• ᐃᓱᒪᒃᑯᑦ ᖃᓄᐃᙱᑦᑎᐊᙱᑦᑑᓂᖅ ᐱᔾᔪᑕᐅᕐᔪᐊᒐᔪᒃᐳᖅ ᐱᕋᔭᓂᓕᕆᓂᕐᒧᑦ.
• ᖃᓄᖅ ᐃᑲᔪᖅᑕᐅᔾᔪᑎᒃᓴᖅᑕᖃᙱᓗᐊᖅᐳᖅ ᑎᒍᔭᐅᒪᓚᐅᕐᓂᑰᔪᓄᑦ. ᓅᑎᖅᐸᓪᓕᐊᓂᕐᒧᑦ ᐃᓃᑦ, ᓲᕐᓗ ᐊᓂᓯᒪᕙᓪᓕᐊᓂᕐᒧᑦ ᐊᖏᕐᕋᕆᔭᐅᔪᑦ ᖃᓪᓗᓈᓃᖔᕋᔪᒃᐳᑦ ᐅᑭᐅᖅᑕᖅᑐᕐᒥᐅᑦ ᓄᓇᓕᖏᑕ ᐃᓚᔮᕆᔭᖏᑕᓗ ᐅᖓᓯᒋᔭᕐᔪᐊᕌᓗᐊᓂ. ᐊᓂᓯᒪᕙᓪᓕᐊᓂᕐᒧᑦ ᐊᖏᕐᕋᕆᔭᐅᔪᑦ ᖃᓂᒃᓴᕋᔪᒃᐳᑦ ᑲᑎᙵᐅᖅᖢᑎᒃ ᐱᕋᔭᐅᖃᑎᒌᓄᑦ ᐊᒻᒪ ᓱᕐᕋᖕᓇᖅᑐᖅᑑᒪᕝᕕᐅᕙᒃᑐᓄᑦ, ᑕᒪᓐᓇᓗ ᐅᑎᑐᐃᓐᓇᕈᑕᐅᓕᕈᐊᒃᐸᒃᖢᓂ.

ᐋᓐᓂᐊᖃᕐᓇᙱᑦᑐᓕᕆᓂᖅ

• ᐅᑭᐅᖅᑕᖅᑐᕐᒥᐅᑦ ᐊᒃᓱᕈᕐᓇᕈᑎᖃᖅᐸᒃᐳᑦ ᓘᒃᑖᓄᑦ, ᐋᓐᓂᐊᓯᐅᖅᑎᓄᑦ, ᐃᓗᐊᖅᓴᖅᑕᐅᓂᒃᑯᓪᓗ ᐱᔨᑦᑎᖅᑕᐅᔪᓐᓇᕆᐊᒃᓴᖅ.
• Type 2 ᓱᑲᖃᓗᐊᕐᓂᐅᔪᖅ ᐃᓅᓯᑦᑎᐊᕆᖕᓂᕐᒧᑦ ᐊᒃᓱᕈᕈᑕᐅᕗᖅ ᐅᑭᐅᖅᑕᖅᑐᕐᒥ ᓄᓇᖃᖅᑳᖅᑐᓄᑦ ᐆᒃᑑᑎᒋᓪᓗᒋᑦ ᐅᐹᔅᑯᐊᔭᒃ ᑯᕇ ᐊᓪᓚᓄᑦ.

ᓱᕈᓯᓛᑦ ᐃᓕᓐᓂᐊᕐᓂᕆᔭᖓᑦ ᐃᓅᓯᖃᖃᑎᒌᑦᑎᐊᕐᓂᕐᒧᓪᓗ ᐊᑐᖅᑕᐅᔪᒃᓴᑦ

• ᓱᕈᓯᓛᑦ ᐃᓕᓐᓂᐊᕐᓂᕆᔭᖓᑦ ᐊᓯᖏᓪᓗ ᓱᕈᓯᓛᕐᓄᑦ ᐃᑲᔪᖅᓱᐃᔾᔪᑕᐅᕙᒃᑐᓄᑦ ᐱᓪᓗᐊᑕᖁᑎᒋᔭᐅᕗᖅ ᐅᑭᐅᖅᑕᖅᑐᕐᒥᐅᓄᑦ.
• ᐊᑐᖅᑕᐅᔪᒃᓴᖅᑕᖃᙱᓗᐊᖅᐳᖅ ᐊᕐᓇᓄᑦ ᐃᓕᓐᓂᐊᒃᑲᓐᓂᕋᓱᒃᑐᓄᑦ ᐃᖅᑲᓇᐃᔭᖅᑐᓄᓪᓗ. ᑕᒪᒃᑯᐊ ᐊᕐᓇᑦ ᓄᑕᖅᑭᕆᔨᓪᓗᐊᑕᐅᒐᔪᒃᐳᒃ ᐊᒻᒪ ᐃᑲᔪᖅᓱᖅᑕᐅᙱᓗᐊᕐᓂᖅ ᐸᐃᕆᔨᒃᓴᒧᑦ ᐊᒃᑐᐃᓯᒪᒻᒪᕆᒃᐸᒃᐳᖅ ᐃᓚᒋᔭᐅᖃᐅᑕᐅᑦᑎᐊᕆᐊᒃᓴᖅ ᒪᑭᒪᓇᓲᑎᓄᑦ ᐊᒻᒪ ᓯᕗᒧᐊᒃᐹᓪᓕᖅᑎᑦᑎᔭᕆᐊᒃᓴᖅ ᐃᓕᓐᓂᐊᕐᓂᕆᔪᓐᓇᖅᑕᒥᖕᓂᒃ.
• ᐃᓅᓯᖃᖃᑎᒌᒍᑎᓄᑦ ᐃᓕᖅᑯᓯᕐᓅᖓᔪᓄᓪᓗ ᐱᔨᑦᑎᕋᐅᑎᑦ ᓴᙱᒃᑎᑦᑎᒋᐊᖅᐹᓪᓕᕈᑕᐅᓪᓗᐊᕐᒪᑕ ᓄᓇᖃᖅᑳᖅᑐᑦ ᐃᓚᔮᕇᖕᓂᕆᔭᖏᓐᓂᒃ ᐅᖃᐅᓯᖏᓐᓂᒡᓗ, ᐊᒻᒪ ᑕᐃᒫᖑᑦᑎᐊᓪᓗᐊᖅᖢᑎᒃ ᐃᓕᖅᑯᓯᕆᔭᕐᒧᑦ.

ᑐᐊᕕᕐᓇᖅᑐᓕᕆᓂᕐᒧᑦ ᐸᕐᓇᐅᒪᓂᖅ

• ᑲᑎᒪᖃᑕᐅᔪᑦ ᐃᓱᒫᓘᑎᖃᓚᐅᖅᐳᖅ ᑐᐊᕕᕐᓇᖅᑐᓕᕆᓂᕐᒧᑦ ᐸᕐᓇᐅᒪᓂᕐᒥᒃ, ᐱᔾᔪᑎᖃᓪᓗᐊᑕᖅᖢᑎᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ. ᑲᑎᒪᖃᑕᐅᔪᑦ ᐃᓚᖏᑦ ᖃᐅᔨᔪᒪᔭᖃᓚᐅᕐᒪᑕ ᖃᓄᐃᑦᑐᓂᒃ ᑐᐊᕕᕐᓇᖅᑐᓕᕆᓂᕐᒧᑦ ᐸᕐᓇᐅᑎᑕᖃᓚᐅᕋᓗᐊᕐᓂᕐᒪᖔᑦ ᖄᒥᕐᔪᐊᕐᓂᖅᑕᖃᖅᑎᓪᓗᒍ ᓄᓇᒃᑰᕈᑎᑯᑖᒃᑯᑦ ᐃᖏᕐᕋᔾᔪᑎᒥᒃ ᓱᕋᒻᒪᒍᑕᐅᓚᐅᖅᑐᒥᒃ 2017 ᐅᐱᕐᖔᖓᓂ.
• ᐱᔭᒃᓴᕆᔭᑦ ᐱᓕᕆᐊᒃᓴᖃᖃᑕᐅᔪᓄᑦ, ᐃᓚᒋᔭᐅᔭᐅᖃᓯᐅᑎᓪᓗᑎᒃ ᐱᓕᕆᐊᒃᓴᖃᖃᑎᖃᕐᓂᖅ ᑲᓇᑕᐅᑉ ᒐᕙᒪᒃᑯᖏᑦᑕ ᐱᓕᕆᕝᕕᖏᑦ ᐊᒻᒪ ᓄᓇᖃᖅᑎᐅᔪᑦ ᓄᓇᓕᖕᓂ ᑲᒪᒋᔭᖃᕐᓂᐊᕐᓗᑎᒃ ᑐᐊᕕᕐᓇᖅᑐᓕᕆᓂᕐᒧᑦ ᐸᕐᓇᐅᑎᐅᔪᓂᒃ ᐅᖃᐅᓯᐅᓚᐅᖅᐳᖅ.

ᒐᕙᒪᐅᖃᑎᒌᑦ ᖃᓄᐃᓕᐅᖃᑎᒌᖕᓂᖏᑦ

• ᓄᓇᖃᖅᑳᖅᑐᑦ ᒐᕙᒪᖁᑎᖏᑦ ᐱᕙᓪᓕᖅᐸᓪᓕᐊᑎᓪᓗᒋᑦ ᐱᕈᖅᐸᓪᓕᐊᑎᓪᓗᒋᓪᓗ, ᑲᓇᑕᐅᑉ ᒐᕙᒪᖓᑦ ᐃᓱᒪᒋᔭᖃᖃᓯᐅᔾᔨᓯᒪᔭᕆᐊᖃᕐᓂᐊᖅᐳᑦ ᑎᑭᐅᑎᕝᕕᒋᔪᒥᒋᔭᖏᑦ ᖃᓄᐃᓕᐅᒐᒃᓴᖅᑖᕆᕙᓪᓕᐊᔭᖏᓪᓗ ᐃᖕᒥᖕᓂᑦ ᐊᐅᓚᑦᑎᔨᐅᕙᓪᓕᐊᓕᖅᑐᓂᖅ ᓄᓇᖃᖅᑳᖅᑑᔪᓂᑦ.
• ᑲᑎᒪᖃᑕᐅᔪᑦ ᐃᓱᒪᒋᔭᖃᓚᐅᕐᒪᑕ ᐱᓕᕆᖃᑎᒌᖕᓂᖅᓴᖅᑕᖃᓪᓗᐊᕈᓱᒃᖢᑎᒃ ᐊᔾᔨᒌᙱᑦᑐᑦ ᒐᕙᒪᐅᔪᑦ ᑲᒪᒋᔭᐅᓪᓗᐊᖅᑐᓂᒃ ᓲᕐᓗ ᓂᕿᒃᓴᐃᓪᓕᐅᕐᓂᖅ. ᒐᕙᒪᐅᔪᑦ ᐅᔾᔨᕈᓱᖕᓂᖅᓴᐅᔭᕆᐊᖃᕐᒪᑕ ᐱᓕᕆᐊᒃᓴᖁᑎᒋᔭᐅᔪᓂᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ, ᖃᓪᓗᓈᓂᑦ ᐊᕕᒃᑐᖅᓯᒪᔪᑦ ᒐᕙᒪᒃᑯᖏᓐᓄᑦ, ᓄᓇᓖᑦ ᒐᕙᒪᒃᑯᖏᓐᓄᑦ ᐊᒻᒪ ᓄᓇᖃᖅᑳᖅᑑᑦ ᐊᐅᓚᑦᑎᔨᒋᔭᖏᓐᓄᑦ, ᐊᑑᑎᖃᕐᓂᖅᓴᐅᖁᓪᓗᒋᑦ ᐊᒻᒪ ᐊᓯᒥᑦ ᑲᒪᒋᔭᖏᓐᓂᒃ ᐱᓕᕆᐊᖃᖅᑕᐃᓕᖁᓪᓗᒋᑦ.

ᐃᑲᔪᖅᓱᐃᓂᖅ, ᐱᔪᒥᒍᓱᒃᑎᑦᑎᓂᖅ ᐊᒻᒪ ᐱᕈᖅᐸᓪᓕᐊᑎᑦᑎᓂᖅ ᐅᑭᐅᖅᑕᖅᑐᕐᒥ ᓇᖕᒥᓂᕆᔭᕐᓂᒃ

• ᑲᑎᒪᖃᑕᐅᔪᑦ ᐅᖃᐅᓯᖃᓚᐅᖅᐳᑦ ᖃᓄᖅ ᐱᓕᕆᕝᕕᖃᖅᑐᓂᒃ ᐅᑭᐅᖅᑕᖅᑐᕐᒧᐊᖅᑎᑦᑎᔭᒃᓴᐅᖕᒪᖔᑦ, ᐊᒻᒪ ᖃᓄᖅ ᑲᔪᓰᓐᓇᖅᑎᑦᑎᔭᕆᐊᒃᓴᖅ ᐅᑭᐅᖅᑕᖅᑐᕐᒦᓕᐊᓂᒃᑐᓂᒃ.
• ᐋᖅᑭᒃᑕᐅᔪᖃᕐᓗᓂ ᓇᖕᒥᓂᕆᔭᕐᓂᒃ ᐆᒻᒪᕈᐃᕝᕕᖕᓂᒃ ᐊᒻᒪ ᖃᓄᐃᓕᐅᕈᓯᖅᑖᓵᖃᕐᕕᖕᓂᒃ ᐅᑭᐅᖅᑕᖅᑐᕐᒥ ᑲᓲᒪᓂᖃᕐᓗᑎᒃ ᓇᖕᒥᓂᖃᖅᑎᐅᔪᓄᑦ ᑕᒪᑐᒨᓇ ᒪᑭᒪᔾᔪᑎᒃᓴᑦ ᐱᕙᓪᓕᖅᐹᓪᓕᐅᑕᐅᓂᐊᕐᓗᓂ.
• ᐃᑭᐊᖅᑭᕕᒃᑎᒍᑦ ᑲᓲᒪᔭᖃᕈᓐᓇᕐᓂᖅ ᐅᑭᐅᖅᑕᖅᑐᕐᒧᑦ ᑭᙴᒪᓇᓪᓚᕆᒃᐳᖅ. ᑲᑎᒪᖃᑕᐅᔪᑦ ᐅᔾᔨᕆᔭᖃᖅᓯᒪᕗᑦ ᑲᓲᒪᖃᑎᖃᕋᓂ ᐅᑭᐅᖅᑕᖅᑐᕐᒥᐅᑦ ᐃᓚᐅᖃᑕᐅᕝᕕᖃᕈᓐᓇᙱᑦᑎᐊᖅᐳᑦ ᖃᕋᓴᐅᔭᑎᒍᑦ ᒪᑭᒪᔾᔪᓯᐅᔪᓄᑦ.
• ᑭᒃᑯᔨᒫᓅᖓᔪᑦ ᐊᑐᐊᒐᐃᑦ ᑲᔪᖏᖅᓴᕈᑕᐅᔮᕈᓐᓃᕐᒪᑕ ᐅᑭᐅᖅᑕᖅᑐᕐᒥ ᓄᓇᓕᖕᓂ ᐱᕙᓪᓕᖅᐸᓪᓕᐊᔪᑎᓄᑦ ᑮᓇᐅᔭᐃᔭᕆᐊᒃᓴᖅ. ᐊᑐᖅᑕᐅᔭᕆᐊᖃᖅᑐᓕᐅᕐᓂᖅ ᓵᙵᔭᖃᕐᓂᖅᓴᐅᕙᓪᓕᐊᑐᐃᓐᓇᕐᒪᑦ ᑎᑭᓯᒪᓚᐅᑲᒃᑕᑐᐃᓐᓇᖅᑐᓂᒃ ᐃᖅᑲᓇᐃᔭᖅᑎᖃᑎᖃᕆᐊᒃᓴᖅ, ᐱᕈᖅᑎᑦᑎᕙᓪᓕᐊᓇᓱᒐᑎᒃ "ᓄᓇᓕᓕᐊᖑᓯᒪᔪᕐ"ᒥᒃ ᐃᖅᑲᓇᐃᔮᖃᕐᕕᒋᔭᐅᑉ ᖃᓂᒋᔮᓂ.

ᒪᑭᒪᔾᔪᑎᑦ ᐃᔅᓵᕿᓂᖓ ᐃᕐᖓᖅᓯᒪᓂᖓ

• "ᒪᑭᒪᔾᔪᑎᓂᑦ ᐃᔅᓵᕿᓂᕆᔭᖅ" ᐊᔪᖅᓴᕐᓇᕈᑎᕐᔪᐊᖑᕗᖅ ᐅᑭᐅᖅᑕᖅᑐᕐᒥ. ᖃᓄᐃᓕᐅᕈᓯᖅᑖᓵᖅᑕᖃᕐᓂᖅᓴᐅᔭᕆᐊᖃᖅᐳᖅ ᖃᓄᖅ ᐊᒃᖢᐃᔾᔪᑎᑖᕆᔭᖅ ᐅᑭᐅᖅᑕᖅᑐᕐᒥ ᐅᑭᖅᑕᖅᑐᕐᒦᖏᓐᓇᖅᑎᑕᐅᔪᓐᓇᕐᒪᖔᑦ; ᐅᓄᓗᐊᖅᑐᓄᑦ ᖃᓄᓪᓗᓈᓄᙵᐃᔾᔪᑎᒋᔭᐅᕙᖕᒪᑦ ᐊᑐᖅᑎᙱᖔᖅᖢᒍ ᐅᑭᐅᖅᑕᖅᑑᑉ ᓄᓇᓕᖏᓐᓂ. ᐃᓱᒪᒋᖃᓯᐅᑎᔭᒃᓴᐅᖕᒥᕗᑦ ᑖᒃᔅᑎᒍᑦ ᐱᔭᖃᕈᒪᔾᔪᑎᒃᓴᑦ ᓇᖕᒥᓂᖁᑎᒋᔭᑦ ᑮᓇᐅᔾᔭᒍᑎᒋᔭᓪᓗ ᐅᑭᐅᖅᑕᖅᑑᑉ ᓄᓇᓕᖏᓐᓃᖏᓐᓇᖁᓪᓗᒋᑦ

ᖃᓄᐃᓕᐅᕈᓐᓇᕐᓂᕐᒥᒃ ᐱᕈᖅᐹᓪᓕᖅᑎᑦᑎᓂᖅ ᐊᒻᒪ ᐊᔪᙱᓐᓂᕆᔭᕐᓂᒃ ᐱᕙᓪᓕᖅᐹᓪᓕᖅᑎᑦᑎᓂᖅ

• ᓄᓇᓖᑦ ᐸᕐᓇᐅᒪᓂᕆᔭᖓ ᓇᓗᓇᐃᖅᑕᐅᓚᐅᖅᐳᖅ ᑕᕝᕙᓪᓗᐊᑕᐅᓂᖓᓂᒃ ᐱᑕᖃᕆᐊᖃᓪᓚᕆᒃᖢᓂᓗ ᓄᓇᓕᖕᓄᑦ ᐊᑐᖅᑕᐅᔪᓐᓇᕐᒪᑦ ᑎᒍᓯᓂᖅᓴᐅᔪᓐᓇᕐᓂᕐᒧᑦ ᒪᑭᒪᔾᔪᑕᐅᓕᕈᓐᓇᖅᑐᓂᒃ. ᐃᒪᐃᒻᒪᑦ, ᐃᓛᓐᓂᑦ ᓄᓇᓕᖕᒥᐅᑦ ᓴᓇᔪᓐᓇᕋᔭᖅᑑᒐᓗᐊᖅ ᐱᓕᒻᒪᒃᓴᖅᓯᒪᒋᓗᐊᕐᒪᑕ ᐊᔪᕈᓐᓃᖅᓴᖅᓯᒪᙱᓗᐊᕐᒪᑕᓘᓐᓃᑦ ᐃᓚᐅᖃᑕᐅᔭᕆᐊᒃᓴᖅ ᐱᓕᕆᐊᒃᓴᕐᔪᐊᙳᖅᓯᒪᔪᓂ ᐊᕕᒃᑐᖅᓯᒪᕝᕕᖏᓐᓃᑦᑐᓂ, ᑕᐃᒪᐃᓐᓂᑯᐊᓄᑦ ᐱᓕᕆᐊᒃᓴᕐᒥᒃ ᐊᐅᓚᑦᑎᔪᖅ ᑎᑭᑎᑦᑎᖔᓕᖅᐸᒃᐳᑦ ᖃᓪᓗᓈᓂᙶᖅᑐᓂᒃ.
• ᐊᔪᙱᓐᓂᕆᔭᕐᒥᒃ ᐱᕙᓪᓕᖅᐹᓪᓕᖅᑎᑦᑎᓂᖅ ᐃᓕᓐᓂᐊᖅᑕᐅᔪᓄᑦ ᐃᓚᒋᔭᐅᖃᓯᐅᑎᓯᒪᓪᓗᐊᕐᒪᑦ ᐊᒃᓱᙳᖅᐹᓪᓕᐊᓕᓵᕐᓂᖏᓐᓂᑦ
• ᐃᓄᖕᓄ ᖃᓄᐃᓕᐅᕈᓐᓇᕐᓂᕆᔭᖅ ᐊᔪᕈᑕᐅᒍᐊᖕᒪᑦ ᐅᑭᐅᖅᑕᖅᑐᕐᒥ ᓄᓇᓖᑦ ᒪᑭᒪᔾᔪᑎᒃᑯᑦ ᐱᕈᖅᐸᓪᓕᐊᓂᖏᓐᓄᑦ.
• ᑲᑎᒪᖃᑕᐅᔪᑦ ᐃᓱᒪᒋᔭᖃᕐᒪᑕ ᐅᒃᑯᐊᖅᓯᒪᑎᑦᑎᔾᔪᑎᑕᖃᕆᐊᒃᓴᖏᓂᒃ ᐊᑐᐊᒐᖅᑎᒍᑦ ᐱᓕᕆᐊᒃᓴᑎᒍᓪᓗ ᐅᑭᐅᖅᑕᖅᑐᕐᒥ ᐊᒃᖢᐃᔾᔪᑎᑖᖑᔪᓐᓇᖅᑐᓄᑦ, ᐃᓚᒋᔭᐅᓪᓗᑎᒃ ᐊᑐᐊᒐᐃᑦ ᐱᓕᕆᐊᒃᓴᐃᓪᓗ ᐃᑲᔪᖅᓱᐃᙱᑦᑐᑦ ᐃᓚᐅᖃᑕᐅᑎᑦᑎᓇᓱᙱᑦᑎᐊᒻᒪᕆᒃᑐᓪᓘᓐᓃᑦ ᓄᓇᖃᖅᑳᑑᔪᓂᒃ ᐃᓕᓐᓂᐊᕐᕕᐊᓘᑉ ᐅᖓᑖᓄᑦ ᐃᓕᓐᓂᐊᒃᑲᓐᓂᕈᒪᓂᕐᒥ ᐱᓕᕆᐊᕆᔭᒧᓪᓗ ᐱᓕᒻᒪᒃᓴᒃᑲᓐᓂᕈᒪᓂᕐᒥᒃ.

ᑰᒡᔪᐊᕐᒥ ᐃᒪᓕᕆᓂᕐᒧᑦ ᖃᐅᔨᓴᕐᕕᒃ

• ᑰᒡᔪᐊᕐᒥ ᐃᒪᓕᕆᓂᕐᒧᑦ ᖃᐅᔨᓴᕐᕕᒋᔭᖅ ᖃᐅᔨᓴᕐᕕᓪᓗᐊᑕᕆᔭᐅᔪᓐᓇᖅᐳᖅ ᐅᑭᐅᖅᑕᖅᑐᕐᒥ.

ᐃᓕᓐᓂᐊᕐᓂᖅ ᐊᒻᒪ ᖃᓄᐃᓕᐅᕈᓐᓇᕐᓂᕐᒥᒃ ᐱᕈᖅᐹᓪᓕᖅᑎᑦᑎᓂᖅ

• ᑲᑎᒪᖃᑕᐅᔪᑦ ᐅᖃᐅᓯᖃᓚᐅᖅᐳᑦ ᐱᕐᔪᐊᖑᓂᕆᔭᖓᓂᒃ ᖃᓄᐃᓕᐅᕈᓐᓇᕐᓂᕐᒥᒃ ᐱᕈᖅᐹᓪᓕᖅᑎᑦᑎᓂᖅ ᐊᒻᒪ ᐊᔪᙱᓐᓂᕆᔭᕐᓂᒃ ᐱᕙᓪᓕᖅᐹᓪᓕᖅᑎᑦᑎᓂᖅ, ᓂᓪᓕᐅᑎᒋᔭᖃᓗᐊᙳᐊᖅᖢᑎᒃ ᐊᔪᕈᑕᐅᑎᓯᒪᔭᑦ ᐃᕐᓂᒃᖠᓕᖅᑕᐅᓪᓗᐊᕐᓂᖏᓐᓂᒃ ᐊᒻᒪ ᐱᕕᒃᓴᖃᕐᓂᖅᓴᐅᓕᖅᑎᑕᐅᓗᑎᒃ ᖃᓄᐃᓕᐅᕈᓐᓇᕐᓂᐅᑎᓯᒪᔭᑦ ᓄᓇᖃᖅᑳᖅᑐᑦ ᑎᑭᐅᑎᓂᖅᓴᐅᔪᓐᓇᖅᓯᓂᐊᕐᒪᑕ ᐱᕚᓪᓕᐅᑎᒃᓴᓄᑦ.
• ᑲᑎᒪᖃᑕᐅᔪᑦ ᐅᖃᐅᓯᖃᓚᐅᖅᐳᑦ ᐅᑭᐅᖅᑕᖅᑐᕐᒥ ᓯᓚᑦᑐᖅᓴᕐᕕᒡᔪᐊᖅᑕᖃᓕᓪᓗᐊᕐᓂᖓᓂᒃ, ᐅᑭᐅᖅᑕᖅᑐᕐᒥᓪᓚᕆᒃ ᐃᓗᓪᓕᖅᓱᖅᑕᒥᒃ ᑐᕌᖓᓗᓂ ᐅᑭᐅᖅᑕᖅᑐᕐᒥᐅᓄᑦ ᐃᖅᑲᓇᐃᔭᖅᑎᖃᐅᕐᓂᖅᓴᐅᓗᓂᓗ ᐅᑭᐅᖅᑕᖅᑐᕐᒥᐅᓂᒃ. ᑲᓛᖦᖠᑦ ᓄᓈᓃᑦᑐᖅ ᓯᓚᑦᑐᖅᓴᕐᕕᒡᔪᐊᖅ ᐅᖃᐅᓯᐅᓚᐅᖅᐳᖅ ᐊᒻᒪ ᒫᓂᑑᐸᐅᑦ ᓯᓚᑦᑐᖅᓴᕐᕕᒡᔪᐊᖓᑕ ᐅᑭᐅᖅᑕᖅᑐᕐᒥ ᓯᓚᑦᑐᖅᓴᐊᑕ ᐊᑑᑎᖃᕐᓂᕆᔭᖓ, ᐱᐅᓯᒋᐊᖅᑕᐅᔪᓐᓇᕆᐊᒃᓴᖓᓂᒃ ᓇᓪᓕᖅᑑᑎᓂᖅᓴᐅᓕᖅᑎᑕᐅᓗᓂᓗ ᐊᓯᖏᓐᓄᑦ ᐃᓕᓐᓂᐊᒃᑲᓐᓂᕐᕕᐅᓲᓄᑦ ᑲᓇᑕᐅᑉ ᐅᑭᐅᖅᑕᖅᑐᐊᓃᑦᑐᓄᑦ, ᓲᕐᓗ ᓄᓇᕗᒻᒥ ᓯᓚᑦᑐᖅᓴᕐᕕᒃ.

ᒪᒃᑯᒃᑐᑦ

• ᑭᒡᒍᑎᖃᕐᕕᒋᓇᓱᒃᖢᒍ ᖃᓄᖅ ᒪᒃᑯᒃᑐᑦ ᐱᔪᒪᓂᖃᓕᖅᑎᑕᐅᔪᓐᓇᕐᒪᖔᑕ ᖃᐅᔨᓴᕐᓂᓕᕆᓂᕐᒥᒃ, ᐅᖃᖅᑐᖃᓚᐅᖅᐳᖅ, "ᖃᐅᔨᓴᕐᓂᖅ". ᐃᓚᖏᑦ ᑕᐅᒎᓯᖅᓯᖔᕆᐊᖃᕈᓱᓚᐅᖅᐳᑦ "ᐅᑭᐅᖅᑕᖅᑐᕐᒥᒃ ᖃᐅᔨᒪᔭᖃᕐᓂᖅ" ᐊᕕᒃᓯᒪᔪᓐᓃᖅᑎᑕᐅᓂᐊᕐᒪᑎᒃ ᖃᐅᔨᓴᕐᓂᖅ ᐊᒻᒪ ᓄᓇᖃᖅᑳᖅᑐᑦ ᖃᐅᔨᒪᓂᑐᖃᕆᔭᖏᑦ.
• ᐱᕐᔪᐊᖑᓂᕆᔭᖓ ᐃᓚᐅᖃᑕᐅᑎᑦᑎᓂᖅ ᒪᒃᑯᒃᑐᓂᒃ ᖃᐅᔨᓴᕐᓂᓕᕆᓂᕐᒧᑦ, ᐃᓚᒋᖃᓯᐅᑎᓪᓗᒍ ᐃᓚᐅᖃᑕᐅᓂᖅ ᑲᑎᖅᓱᐃᓂᕆᔭᕐᒥ ᓇᐅᑦᑎᖅᓱᐊᖃᕐᓂᕐᒥᓗ ᑐᖅᑯᖅᑕᐅᓯᒪᔪᒃᓴᓂᒃ ᐊᐅᓪᓚᐅᒪᖃᑕᐅᓯᒪᓂᒃᑯᑦ ᐊᓯᖏᑎᒍᓪᓗ ᖃᐅᔨᓴᕈᓯᐅᔪᒃᑯᑦ ᐅᖃᐅᓯᐅᓚᐅᖅᐳᑦ.
• ᐱᔪᒥᒋᔭᖃᓕᖅᑎᑦᑎᓐᓇᖅᐳᖅ ᒪᒃᑯᒃᑐᑦ ᐅᑭᐅᖅᑕᖅᑐᕐᒥᐅᑦ ᖃᐅᔨᓴᕐᓂᓕᕆᔪᒪᓂᕐᒧᑦ ᖃᐅᔨᓴᕈᓯᐅᔪᑦ ᐃᓕᖅᑯᓯᕆᔭᖏᓐᓄᑦ ᑐᕌᖓᓂᖅᓴᐅᑎᑕᐅᒍᑎᒃ.
• ᐃᓚᐅᖃᑕᐅᑎᑦᑎᓂᖅ ᒪᒃᑯᒃᑐᓂᒃ ᑐᑭᓯᕚᓪᓕᐅᑕᐅᔪᓐᓇᖅᑐᖅ ᖃᐅᔨᓴᕐᓂᓕᕆᓂᖅ ᖃᐅᔨᓴᖅᑕᖃᕐᓂᕐᓗᑎ ᖃᐅᑕᒫᖅᓯᐅᑎᖏᓐᓂᒃ ᒪᒃᑯᒃᑐᓄᑦ ᐅᑭᐅᖅᑕᖅᑐᕐᒥᐅᓄᑦ, ᐃᓱᒪᔪᓐᓃᖅᑎᔾᔫᒥᓇᓱᒃᖢᒋᑦ ᖃᐅᔨᓴᕐᓂᓕᕆᓂᖅ ᑯᒃᓴᓇᖅᑑᔭᕆᐊᒃᓴᖓᓂᒃ ᐊᒻᒪ ᑲᒪᒋᔭᐅᑐᐃᓐᓇᓲᖑᔭᕆᐊᒃᓴᖓᓂᒃ "ᐊᓯᓐᓄᑦ".
• ᐃᓕᓐᓂᐊᕐᕕᖕᒥ ᐃᓕᓐᓂᐊᕈᓯᕆᔭᐅᔪᑦ ᖃᐅᔨᔭᐅᑦᑎᐊᒃᑲᓐᓂᕆᐊᖃᖅᐳᑦ ᐱᓕᕆᐊᒃᓴᖅᑕᖃᕋᓗᐊᕐᒪᖔᑕ ᒪᒃᑯᒃᑐᑦ ᐅᑭᐅᖅᑕᖅᑐᕐᒥᐅᑦ ᖃᐅᔨᓴᕐᓂᓕᕆᔪᒪᔾᔪᑎᒃᓴᖏᓐᓂᒃ.
• ᐃᓚᓕᐅᔾᔨᓯᒪᖃᑦᑕᕐᓂᖅ ᖃᐅᔨᓴᕐᓂᓕᕆᓂᕐᒥᒃ ᓄᓇᖃᖅᑳᖅᑐᓪᓗ ᖃᐅᔨᒪᓂᑐᖃᕆᔭᖏᑦ ᐱᔪᒥᐱᔭᖃᕈᑕᐅᔪᓐᓇᕋᔭᖅᐳᖅ ᒪᒃᑯᒃᑐᑦ ᐅᑭᐅᖅᑕᖅᑐᕐᒥᐅᑦ ᖃᐅᔨᓴᕐᓂᓕᕆᔭᕆᐊᒃᓴᖅ.

ᖃᐅᔨᒪᓂᑐᖃᖅ ᖃᐅᔨᓴᖅᑎᒻᒪᕇᑦ ᖃᐅᔨᓴᖅᐸᖕᓂᑦ

• ᑲᑎᒪᖃᑕᐅᔪᑦ ᐅᖃᐅᓯᖃᓚᐅᖅᐳᑦ ᓄᓇᖃᖅᑳᖅᑐᓄᑦ ᖃᐅᔨᒪᔭᑐᖃᖃᕐᓂᕆᔭᖅ ᐊᑐᖅᑕᐅᓂᖅᓴᐅᔪᓐᓇᕐᓂᕆᔭᖓᓂᒃ, ᖃᓄᕐᓗ ᐊᑑᑎᖃᕈᓐᓇᕐᒪᖔᑦ. ᓄᓇᖃᖅᑳᖅᑐᑦ ᖃᐅᔨᒪᔭᑐᖃᖃᕐᓂᕆᔭᖓ ᒐᕙᒪᒃᑯᓐᓄᑦ ᖃᐅᔨᓴᕐᓂᓕᕆᓂᕐᒧᓪᓗ ᐃᓕᓴᐃᔨᐅᔪᓄᑦ ᐅᒃᐱᕆᐅᕚ? ᐊᑐᖅᑕᐅᔭᕌᖓᑦ ᖃᐅᔨᒪᓂᕆᔭᖅ ᐱᖃᖅᑎᐅᔪᓂᒃ ᑐᙵᕕᖃᕐᓂᒃᑯᑦ ᐅᕝᕙᓘᓐᓃᑦ ᒐᕙᒪᑐᖃᒃᑯᓐᓂᑦ ᑐᙵᕕᖃᕐᓂᒃᑯᑦ? ᐃᓚᓕᐅᔾᔨᓯᒪᓂᖅ ᓄᓇᖃᖅᑳᖅᑐᑦ ᖃᐅᔨᒪᔭᑐᖃᖃᕐᓂᕆᔭᖓᓂᒃ ᒐᕙᒪᒃᑯᑦ ᐃᓱᒪᓕᐅᕆᓂᕆᔭᖏᓐᓄᑦ ᖄᖏᓐᓇᑯᓗᐊᒎᖓᒍᐊᒃᐸ, ᐅᕝᕙᓘᓐᓃᑦ ᐊᑐᖅᑕᐅᕙᒃᐸ ᓄᓇᖃᖅᑎᐅᔪᓂᒃ ᐃᓱᒻᒪᒃᓯᒋᐊᕈᑕᐅᓲᖑᕙ ᒐᕙᒪᒃᑯᑦ ᖃᓄᐃᓕᐅᕐᓂᕆᔪᒪᔭᖏᓐᓄᑦ ᐃᑲᔪᖅᓱᐃᔾᔪᑕᐅᓕᕋᓱᒃᓯᒪᓪᓗᓂ?
•  "ᐅᑭᐅᖅᑕᖅᑐᕐᒥ ᖃᐅᔨᓴᕐᓂᓕᕆᓂᖅ" ᐃᓱᒪᒋᔭᐅᒐᔪᖕᒪᑦ ᓄᓇᒨᓕᖓᔪᓄᑐᐊᖅ ᖃᐅᔨᓴᕐᓂᓕᕆᓂᕐᒨᖓᔭᕆᐊᒃᓵᓂᒃ, ᑭᓯᐊᓂᓕᑦᑕᐅᖅ ᐃᓅᖃᑎᒌᒍᓯᕐᓄᑦ ᖃᐅᔨᓴᕐᓂᓕᕆᓂᖅ ᐱᕐᔪᐊᖑᖕᒥᖕᒪᑦ, ᐱᓗᐊᖅᑐᒥᒃ ᓄᓇᓖᑦ ᑐᖅᑯᑕᐅᓯᒪᔪᐱᓗᐊᖅᑐᒥᒃ ᓄᓇᓖᑦ ᑐᖅᑯᑕᐅᓯᒪᔪᒃᓴᓂ ᐱᓯᒪᑦᑎᔭᕆᐊᖃᖅᐸᖕᒥᖕᒪᑕ ᐃᓅᓯᖃᖃᑎᒌᒍᓯᕐᓄᑦ ᐊᒃᓱᕉᑕᐅᔪᓂᒃ ᓲᕐᓗ ᐃᓅᓯᕐᒥᖕᓂᒃ ᑭᐱᓯᕙᒃᑐᑦ ᐱᓪᓗᒋᑦ.

ᑭᒡᓕᒋᑎᑕᖅ ᐅᖃᐅᓯᖅᑕᕐᒧᑦ "ᐅᑭᐅᖅᑕᖅᑐᖅ"

• ᑭᒡᓕᓕᐊᕆᓯᒪᑎᑕᕐᓂᒃ ᓄᓇᑖᕈᑎᒋᓯᒪᔭᑦ ᐅᖃᐅᓯᐅᓚᐅᕆᕗᑦ ᐃᓚᒋᔭᐅᓪᓗᑎᒃ ᒫᓂᑑᐸ ᑕᓂᓱᓕᓃ ᓄᓇᑖᖅᓯᒪᓂᕆᔭᖓᑦ ᓄᓇᕗᒻᒥ. ᑕᒪᓐᓇ ᐃᓚᖏᓐᓄᑦ ᑕᐅᑐᒃᑕᐅᓚᐅᖅᐳᖅ ᐆᒃᑑᑎᑦᑎᐊᕙᐅᔭᕆᐊᒃᓴᖓᓂᒃ ᒫᓂᑑᐸᒥ ᓄᓇᖃᖅᑳᖅᑐᑦ ᐃᓚᒋᔭᐅᔭᕆᐊᒃᓴᖏᓐᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓄᑦ.

ᐊᕙᑎᒨᖓᔪᑦ ᐱᔾᔪᑕᐅᔪᑦ ᐊᒻᒪᓗ ᓄᓇᓖᑦ

• ᓄᓇᓕᖕᒥᐅᑕᕐᓂᒃ ᐃᓚᐅᖃᑕᐅᑎᑦᑎᓂᖅ ᑐᙵᕕᒋᔭᐅᔪᖅ ᐱᐅᖅᓱᐊᕐᓂᕐᒧᑦ ᐊᒻᒪᓗ ᐊᕙᑎᒥᒃ ᓴᐳᒻᒥᓂᕐᒧᑦ.
• ᐱᔪᓐᓇᕐᓂᖅ ᐊᑐᖅᑐᒃᓴᓂᒃ ᖃᐅᔨᒃᑲᐃᔾᔪᑎᓂᒃ ᐱᓴᕋᐃᓐᓇᕐᓂᒃᑯᑦ ᐱᒻᒪᕆᐅᔪᖅ ᓄᓇᓕᖕᒥᐅᑦ ᐃᓚᐅᖃᑕᐅᔪᓐᓇᕐᓂᖏᓐᓄᑦ.
• ᐃᓱᒪᓕᐅᕐᓂᕐᒥ ᐱᑕᖃᕆᐊᓕᒃ ᖃᓄᐃᓕᐅᖃᑦᑕᕐᓂᑰᔪᓂᒃ ᐱᔾᔪᑕᐅᔪᓂ.
• ᐃᓐᓇᑐᖃᐃᑦ ᒪᒃᑯᒃᑐᓪᓗ ᐱᒻᒪᕆᐅᔪᒥᒃ ᖃᓄᐃᓕᐅᕆᐊᖃᕐᓂᖃᖅᐳᑦ ᐊᕙᑎᐅᑉ ᓴᐳᒻᒥᔭᐅᓂᖓᓂ. ᓄᓇᐃᓐᓇᕐᒥ ᐱᓕᕆᖃᕐᓂᖅ ᐱᒻᒪᕆᐅᔪᖅ ᐃᓕᓐᓂᐊᖅᑎᑦᑎᓂᕐᒥᒃ ᒪᒃᑯᒃᑐᓂᒃ ᐅᑭᐅᖅᑕᖅᑐᒥ ᐊᕙᑎᐅᑉ ᒥᒃᓵᓄᑦ ᐊᒃᑐᐊᓂᕐᒥᓂᒡᓗ ᐊᕙᑎᒧᑦ.
• ᒪᒃᑯᒃᑐᓄᑦ ᐅᓇᑕᖅᑐᒃᓴᔭᙳᐊᓄᑦ ᐱᓕᕆᐊᖅ ᒪᒃᑯᒃᑐᓄᑦ ᓄᓇᒥᒃ ᐊᒃᑐᐊᓂᖃᖅᑎᑦᑎᑦᑎᐊᖅᓯᒪᔪᖅ ᓄᓇᖃᖅᑳᖅᑐᓪᓗ ᖃᐅᔨᒪᔭᖏᑦ ᓯᕗᓕᕇᒃᑐᓄᑦ ᓅᑕᐅᔪᓐᓇᖅᑎᖦᖢᓂᒋᑦ. ᑖᓐᓇ ᐱᐅᓛᖑᔪᒥᒃ ᐱᓕᕆᔾᔪᓯᐅᕙᖅ ᐊᑐᖅᑕᐅᓇᓱᖁᔭᐅᓪᓗᐊᖅᖢᓂ ᐃᔾᔪᐊᖅᑕᐅᓪᓗᐊᖅᖢᓂᓗ.
•  "ᑮᓇᐅᔭᓕᐅᕋᓱᐊᖔᓕᕐᓂᖅ ᐊᕙᑎᒥᒃ ᓴᐳᒻᒥᓇᓱᖕᓂᒃᑯᑦ" ᓄᑖᓂᒃ ᐱᕕᒃᓴᖃᓕᖅᑎᑦᑎᔪᓐᓇᖅᑐᑦ ᑮᓇᐅᔭᓕᐅᕐᕕᒃᓴᖅᑕᖃᕐᓂᖅᓴᐅᓂᕐᒧᑦ ᐊᒻᒪᓗ ᐱᕙᓪᓕᐊᑎᑦᑎᓂᕐᒧᑦ.
• ᐱᓕᕆᖃᑎᒌᖕᓂᕐᒥᒃ ᐱᕙᓪᓕᐊᑎᑦᑎᓂᖅ ᐱᒻᒪᕆᐅᔪᖅ ᓄᓇᓕᖕᒥᐅᑦ ᐊᒻᒪᓗ ᓄᓇᖃᖅᑳᖅᑐᑦ ᖃᐅᔨᒪᔭᖏᑦ ᐃᓚᐅᑎᑕᐅᓂᖏᓐᓄᑦ ᖃᐅᔨᓴᕐᓂᕐᒥ, ᐊᒻᒪᓗ "ᑭᒃᑯᑐᐃᓐᓇᐃᑦ ᖃᐅᔨᓴᕈᓐᓇᕐᓂᖏᓐᓂᒃ"ᐱᕙᓪᓕᐊᑎᑦᑎᓂᕐᒧᑦ ᓄᓇᓕᖕᒥᐅᑕᐃᓪᓗ ᐃᓚᐅᑎᑕᐅᓂᖏᓐᓄᑦ ᖃᐅᔨᓴᕐᓂᕐᒥ ᖃᓄᐃᓕᐅᕈᑕᐅᔪᓂ.

ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐊᒻᒪᓗ ᖃᓄᐃᓕᐅᕐᓂᖅ ᐅᑭᐅᖅᑕᖅᑑᑉ ᐊᕙᑎᐊᑕ ᐊᓯᔾᔨᖅᐸᓪᓕᐊᓂᖓᓄᑦ

• ᐅᖃᓪᓚᖃᑎᒌᖕᓂᕐᒥ ᐅᖃᓪᓚᖃᑎᒌᒍᑕᐅᕐᔪᐊᓚᐅᖅᐳᖅ ᐅᑭᐅᖅᑕᖅᑐᕐᒥ ᐊᒃᑐᖅᑕᐅᑐᐃᓐᓇᕆᐊᖃᖅᑐᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᖃᓄᕐᓗ ᐅᑭᐅᖅᑕᖅᑐᕐᒥ ᓄᓇᓖᒃ ᐸᕐᓇᒃᓯᒪᔪᓐᓇᕐᒪᖔᑕ ᑕᒪᒃᑯᓄᖓ ᑲᒪᒋᔭᖃᕆᐊᒃᓴᖅ ᓄᑖᖑᔪᓄᑦ ᐊᔪᐃᓐᓈᕈᑕᐅᔪᓄᑦ ᐱᕕᒃᓴᐅᔪᓐᓇᖅᑐᓄᓪᓗ.
• ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᑲᓇᑕᐅᑉ ᐅᑭᐅᖅᑕᖅᑐᐊᑕ ᐃᒪᕕᖏᓐᓂᒃ ᐊᑐᖅᑕᐅᔪᓐᓇᕐᓂᖅᓴᐅᕙᓪᓕᐊᑎᓪᓗᓂᒋᑦ, ᓄᓇᕐᔪᐊᕐᒥ ᐱᔪᒪᓂᖅᑕᖃᕐᓂᖅᓴᐅᓕᖅᑐᖅ ᐅᑭᐅᖅᑕᖅᑐᕐᒥ ᐅᒥᐊᕐᔪᐊᖅᑕᖃᕐᓂᖅᓴᐅᓕᖅᖢᓂᓗ. ᐃᓚᐅᖃᑕᐅᔪᑦ ᐅᖃᓚᐅᖅᑐᑦ ᐱᐅᓯᕚᓪᓕᖅᑎᑕᐅᔭᕆᐊᖃᕐᓂᖓᓂᒃ ᓇᐅᑦᑎᖅᓱᖃᑦᑕᕐᓂᖅ ᐅᒥᐊᕐᔪᐊᕐᓂᒃ ᑲᓇᑕᐅᑉ ᓯᓚᑖᓂᙶᖅᑐᓂᒃ ᑲᓇᑕᐅᑉ ᐃᑲᕋᓴᒃᑰᖅᑐᑦ.
• ᓄᓇᕐᔪᐊᕐᒥᙶᖃᑎᒌᒃᑐᓄᑦ ᐊᖏᖃᑎᒌᒍᑎ ᐊᑑᑎᖃᑦᑎᐊᕈᓐᓇᖅᑐᖅ ᑲᓇᑕᐅᑉ ᓯᓚᑖᓂᙶᖅᑐᑦ ᐅᒥᐊᕐᔪᐊᑦ ᐅᖏᕐᕋᔪᑦ ᐅᑭᐅᖅᑕᖅᑑᑉ ᐃᒪᕙᖏᓐᓂᒃ ᒪᓕᒋᐊᖃᕐᓂᖏᓐᓂᒃ ᐱᓕᕆᔾᔪᓯᕐᓂᒃ ᒪᓕᒃᑕᐅᔭᕆᐊᓕᖕᓂᒡᓗ ᓴᐳᒻᒥᔪᓂᒃ ᐱᓪᓗᐊᑕᐅᔪᓂᒃ ᐃᒃᐱᒍᓱᒃᓴᕋᐃᑦᑐᓂᒡᓗ ᐅᑭᐅᖅᑕᖅᑐᕐᒥ ᐆᒪᔫᖃᑎᒌᖕᓂᐅᔪᓂᒃ.
• ᐅᑭᐅᖅᑕᖅᑐᕐᒥ ᓄᓇᓖᑦ ᐸᕐᓇᒃᓯᒪᔭᕆᐊᖃᖅᑐᑦ ᖃᓄᐃᓕᐅᕐᓂᕐᒧᑦ ᐊᒃᑐᐊᓂᕐᓗᐃᑐᐃᓐᓇᕆᐊᖃᕐᓂᖓᓂᒃ ᐅᒥᐊᕐᔪᐊᖅᑕᖃᕐᓂᖅᓴᐅᓕᕐᓂᖓᓂᑦ ᑲᓇᑕᐅᑉ ᐅᑭᐅᖅᑕᖅᑐᐊᑕ ᐃᒪᕕᖏᓐᓂ, ᓲᕐᓗ ᐅᖅᓱᐊᓗᖕᒥᒃ ᑯᕕᔪᖃᕐᓂᖅ.
• ᑲᓇᑕ ᑐᕌᕆᔭᖃᑐᐃᓐᓇᕆᐊᖃᙱᑦᑐᖅ ᓱᕈᖅᑕᐃᓕᑎᑦᑎᓂᕐᒥᒃ, ᑭᓯᐊᓂᑦᑕᐅᖅ ᖃᐅᔨᓵᓕᓂᕐᒥᒃ ᐋᖅᑭᒋᐊᖅᑎᑦᑎᓂᕐᒥᒡᓗ.
• ᐃᓚᐅᖃᑕᐅᔪᑦ ᒐᕙᒪᒃᑯᓐᓂ ᐊᕙᑎᒥᒃ ᓯᕗᓪᓕᐅᑎᑦᑏᓐᓇᖁᔨᓚᐅᖅᑐᑦ ᑲᓇᑕᐅᑉ ᓄᓇᕐᔪᐊᕐᒨᖓᔪᒧᑦ ᐅᑭᐅᖅᑕᖅᑐᕐᒧᑦ ᐊᑐᐊᒐᖓᓂ.
• ᑲᓇᑕ ᓄᓇᕐᔪᐊᕐᓕᕆᓂᒃᑰᖓᔪᓂᒃ ᐊᑐᓪᓗᐊᖅᑐᖅ ᐊᓯᖏᓐᓂᒃ ᓄᓇᕐᔪᐊᕐᒥᙶᖅᑐᓂᒃ ᑲᑦᑐᖅᓯᒋᐊᖅᑎᓐᓇᓱᒡᓗᓂᒋᑦ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖏᑦ. ᑲᓇᑕ ᐃᑲᔪᖅᓱᓪᓗᐊᕐᒥᔪᖅ ᐱᒋᐊᖅᑎᑕᐅᔪᓂᒃ ᐃᑲᔪᖅᓱᖅᑐᓂᒃ ᐱᐅᓯᕚᓪᓕᖅᑎᑦᑎᓂᕐᒧᑦ ᐅᑭᐅᖅᑕᖅᑑᑉ ᓄᓇᓕᑦᑕ ᐊᒃᑐᖅᑕᐅᑦᑕᐃᓕᒪᓂᖏᓐᓄᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᕆᔭᖓᓂᑦ.

ᑲᒪᒋᔭᖃᑦᑎᐊᕐᓂᒃᑯᑦ ᒪᑭᒪᐃᓐᓇᖅᑎᑦᑎᓂᒃᑯᓪᓗ ᑮᓇᐅᔭᓕᐊᕆᔭᐅᔪᓐᓇᖅᑐᓂᑦ ᐱᕙᓪᓕᐊᑎᑦᑎᓂᖅ

• ᐳᓚᕋᖅᑐᓕᕆᓂᖅ ᑕᐅᖅᓰᖃᑎᖃᕐᓂᕐᓗ ᐱᕕᒃᓴᑦᑎᐊᕙᐅᓈᕆᓂᕋᖅᑕᐅᓚᐅᖅᐳᑦ ᑮᓇᐅᔭᓕᐊᕆᔭᐅᔪᓐᓇᖅᑐᓂᑦ ᐱᕈᖅᑎᑦᑎᓂᕐᒧᑦ. ᐊᑯᓂᐅᔪᒧᑦ ᒪᑭᒪᐃᓐᓇᖅᑎᑦᑎᓂᒃᑯᓪᓗ ᐱᕈᕐᓂᖅ ᑕᒪᒃᑯᓇᓂ ᑐᙵᕕᖃᖅᐳᖅ ᓴᐳᒻᒥᔭᐅᓂᖓᓂᒃ ᐊᕙᒥᒃ ᐊᒻᒪᓗ ᐱᕈᖅᑐᓂᒃ ᐆᒪᔪᓂᒡᓗ ᐊᑐᖅᑕᐅᕙᒃᑐᓂᒃ ᓄᓇᖃᖅᑳᖅᑐᑦ ᓴᓇᔭᖏᓐᓂ.
• ᐃᓚᐅᖃᑕᐅᔪᑦ ᐊᖏᖃᑎᒌᓚᐅᖅᐳᑦ ᐱᓇᓱᐊᖅᑕᐅᓪᓗᐊᖅᑎᓪᓗᒍ ᑮᓇᐅᔭᓕᐊᕆᔭᐅᔪᓐᓇᖅᑐᓂᑦ ᐱᕙᓪᓕᐊᑎᑦᑎᓂᖅ, ᐃᑲᔫᓯᐊᑦ ᑖᒃᑯᓇᙵᑦ ᐱᒋᐊᖅᑎᑕᐅᔪᓂᑦ ᕿᒥᕐᕈᐊᖅᑕᐅᓪᓗᐊᖅᑐᑦ ᐊᒃᑐᐊᓂᕐᓗᒃᑕᖃᑐᐃᓐᓇᕆᐊᖃᕐᓂᖏᓐᓄᑦ ᐅᑭᐅᖅᑕᖅᑑᑉ ᐊᕙᑎᐊᓄᑦ ᓄᓇᖃᖅᑳᖅᑐᓪᓗ ᐃᓕᖅᑯᓯᖏᓐᓄᑦ.
• ᐱᑕᖃᕐᓂᖅᓴᐅᔭᕆᐊᓕᒃ ᑐᙵᕕᒋᔭᐅᔪᓂᒃ ᖃᐅᔨᒃᑲᐃᔾᔪᑎᓂᒃ ᑐᑭᓯᔭᐅᓂᖅᓴᐅᔪᓐᓇᕐᓂᖓᓄᑦ ᐊᑯᓂᐊᔪᒧᑦ ᐊᒃᑐᖅᑕᐅᔪᑦ ᑮᓇᐅᔭᓕᐊᕆᔭᐅᔪᓐᓇᖅᑐᓂᑦ ᐱᕙᓪᓕᐊᑎᑦᑎᓂᕐᒥᑦ ᐊᒻᒪᓗ ᐊᕙᑎᒥ ᓄᓇᒥᙶᖅᑐᓂᒃ ᐲᖅᓯᓂᕐᒥᒃ.

ᑲᑎᑎᑦᑎᓂᖅ ᐅᑭᐅᖅᑕᖅᑐᕐᒥᐅᑦ ᓄᓇᖃᖅᑳᖅᑐᓪᓗ ᓄᓇᕐᔪᐊᕐᒥ ᐱᓕᕆᖃᑎᒌᖕᓂᐅᕙᒃᑐᓄᑦ

• ᐃᓚᐅᖃᑕᐅᔪᑦ ᐅᖃᓚᐅᖅᐳᑦ ᑲᓇᑕᐅᑉ ᓄᓇᖃᖅᑳᖅᑐᖏᑦ ᓄᓇᕐᔪᐊᕐᒥ ᐃᓚᐅᖃᑕᐅᖃᑦᑕᕐᓂᖏᓐᓂᒃ ᓇᖕᒥᓂᖅ ᐱᔪᓐᓇᕐᓂᕐᒥᒍᑦ ᐅᖃᐅᓯᖃᓚᐅᖅᖢᑎᒡᓗ ᓇᖕᒥᓂᖅ ᓄᓇᖃᖅᑳᖅᑐᑦ ᑭᒡᒐᖅᑐᐃᓂᖅᓴᐅᔭᕆᐊᖃᕐᓂᕐᒥᓂᒃ ᓄᓇᕐᔪᐊᕐᒥᐅᑦ ᐅᑭᐅᖅᑕᖅᑐᕐᒨᖓᔪᓂᒃ, ᓄᓇᖃᖅᑳᖅᑐᓄᑦ ᐱᔾᔪᑕᐅᕙᒃᑐᓂᒃ ᐊᒻᒪᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ ᐱᓕᕆᕙᒃᑐᑦ ᑲᑎᒪᓕᕌᖓᑕ.
• ᐅᖃᖅᑕᐅᓚᐅᖅᐳᖅ ᓄᓇᕐᔪᐊᕐᒥ ᐱᓕᕆᖃᑎᒌᖃᑦᑕᕐᓂᐅᑉ ᑐᑭᖓ ᐃᓚᓕᐅᔾᔭᐅᓪᓗᐊᖅᑐᖅ ᐃᓚᒋᔭᐅᓕᕐᓗᓂ ᓄᓇᕐᔪᐊᕐᒥ ᐱᓕᕆᖃᑎᖃᖅᐸᖕᓂᖏᑦ ᖃᓄᐃᓕᐅᕐᓂᕆᖃᑦᑕᖅᑕᖏᓪᓗ ᑲᓇᑕᒥ ᓄᓇᖃᖅᑳᖅᑐᑦ ᒐᕙᒪᖏᓐᓄᑦ ᑎᒥᖏᓐᓄᓪᓗ. ᑕᒪᑐᒪᓂ ᐃᓚᐅᕗᖅ ᐃᓄᐃᑦ ᓅᖃᑦᑕᕐᓂᖏᑦ ᐊᒻᒪᓗ ᓄᓇᖃᖅᑳᖅᑐᑦ ᓄᓇᓕᖏᑦ ᑕᐅᖅᓰᖃᑎᒌᒃᑐᐃᓐᓇᐅᕙᒃᑐᑦ ᓄᓇᕐᔪᐊᕐᒥ ᑭᒡᓕᒋᔭᐅᔪᓂᑦ ᐅᖓᑖᓅᖅᑐᖃᖅᐸᒃᑎᓪᓗᒍ, ᐊᒻᒪᓗ ᐱᓕᕆᖃᑎᖃᖅᐸᓪᓕᐊᕐᓂᕆᔭᖏᑦ ᑲᓇᑕᒥ ᓄᓇᖃᖅᑳᖅᑐᑦ ᐊᓯᖏᓐᓂᒃ ᓄᓇᕐᔪᐊᕐᒥᙶᖅᑐᓂᒃ.
• ᑲᓇᑕ ᐱᓕᕆᖃᑎᖃᕈᓐᓇᖅᑐᖅ ᓄᓇᕐᔪᐊᕐᒥ ᐃᓚᒋᔭᐅᔪᓂᒃ ᑲᒪᒋᔭᐅᓂᖓᓄᑦ ᐃᓱᒪᒃᓴᖅᓯᐅᑦᑎᐊᖃᑦᑕᕐᓂᖅ ᐅᑭᐅᖅᑕᖅᑐᕐᒥ ᓄᓇᓕᖕᓂ. ᐱᕕᒃᓴᐃᑦ ᐱᓕᕆᖃᑎᒋᔭᐅᓂᖏᓐᓄᑦ ᑕᒪᒃᑭᒃ ᐅᑭᐅᖅᑕᖅᑐᕐᒥ ᐊᒻᒪᓗ ᐅᑭᐅᖅᑕᖅᑐᕐᒦᙱᑦᑐᑦ ᓄᓇᕐᔪᐊᑦ ᓄᑖᙳᖅᐸᓪᓕᐊᔪᑦ ᑲᓇᑕᐅᑉ ᐅᑭᐅᖅᑕᖅᑐᒧᐊᖅᑕᐅᖁᓪᓗᒋᑦ ᐱᐅᓯᕚᓪᓕᖅᑎᑦᑎᔪᓐᓇᖅᑐᑦ ᓂᕿᒃᓴᖃᑦᑎᐊᕐᓂᕐᒥᒃ ᐅᕝᕙᓘᓐᓃᑦ ᐱᕕᒃᓴᖃᖅᑎᑦᑎᓂᖅᓴᐅᓗᑎᒃ ᐊᑐᓕᖅᑭᒍᓐᓇᕐᓂᕐᒧᑦ ᐆᖅᒪᖅᑯᑎᓂᒃ ᐋᖅᑭᒍᑕᐅᔪᓄᑦ.
• ᑲᓇᑕ ᑮᓇᐅᔭᓕᐊᕆᔭᐅᔪᓐᓇᖅᑐᓄᑦ ᐱᓕᕆᖃᑎᒌᖕᓂᕐᒧᑦ ᑲᒪᒋᔭᖃᕈᓐᓇᖅᑐᑦ ᓄᓇᖃᖅᑳᖅᑐᑦ ᓄᓇᓕᖕᓐᓄᑦ ᐊᒻᒪᓗ ᑲᓇᑕᐅᑉ ᓯᓚᑖᓂᙶᖅᑐᓂᒃ ᑲᒻᐸᓂᐅᔪᓄᑦ. ᐆᒃᑑᑎᒋᓪᓗᒍ, ᐅᐸᔅᑯᐃᔭᒃ ᑯᕇ ᐊᓪᓚᐃᑦ ᐃᓚᒋᔭᖃᖅᓯᒪᓕᖅᑐᑦ ᑯᕇᐊᒥᑦ ᑲᒻᐸᓂᐅᔪᒥᒃ ᓴᓇᔭᐅᓂᖓᓄᑦ ᐆᒃᑐᕆᐊᕈᑕᐅᓪᓗᓂ ᐱᓕᕆᐊᖅ LED-ᒃᑯᑎᒍᑦ ᐆᒻᒪᖅᑯᑎᖃᖅᑐᒥᒃ ᐱᕈᖅᑎᑦᑎᕙᒃᑐᒥᒃ ᓰᕐᓈᖅᑐᓂᒃ ᓄᓇᕋᕐᓂᒡᓗ ᓂᕆᔭᐅᔪᒃᓴᓂᒃ ᓄᓇᓕᖕᒥᐅᓄᑦ.
• ᐃᓚᐅᖃᑕᐅᔪᑦ ᒐᕙᒪᒃᑯᓐᓂᑦ ᐊᑐᓕᖃᑦᑕᖁᔨᓚᐅᖅᑐᑦ ᐱᐅᓛᖑᔪᓂᒃ ᐱᓕᕆᔾᔪᓯᕐᓂᒃ ᐅᕝᕙᓘᓐᓃᑦ ᐃᓕᑕᐅᔪᓂᒃ ᐊᓯᖏᓐᓂ ᐅᑭᐅᖅᑕᖅᑑᑉ ᐊᕕᒃᓯᒪᓂᖓᓂᑦ ᐋᖅᑭᒋᐊᖅᑕᐅᓗᑎᒡᓗ ᓈᒻᒪᓕᕐᓂᐊᕐᒪᑕ ᓄᓇᓕᖕᒥᐅᑦ ᐱᔭᕆᐊᖃᖅᑕᖏᓐᓄᑦ. ᑲᓇᑕ ᐱᓕᕆᖃᑎᖃᕋᓱᓪᓗᐊᖅᑐᖅ ᐊᓯᖏᓐᓂᒃ ᐅᑭᐅᖅᑕᖅᑑᑉ ᐊᕕᒃᓯᒪᓂᖓᓂᑦ ᐊᒥᖅᑳᕐᓂᐊᕋᒥᒃ ᐃᑲᔫᑎᒃᓴᓂᒃ ᐊᖏᔫᑎᓂᒡᓘᓐᓃᑦ, ᐊᒻᒪᓗ ᓴᙱᒃᑎᒋᐊᖅᑎᑕᐅᓂᐊᕐᒪᖓ ᑕᒪᐃᓐᓄᑦ ᐱᕈᖅᑎᑕᐅᓇᓱᐊᖅᑐᑦ.
• ᑲᓇᑕ ᓄᓇᕐᔪᐊᕐᒥᙶᖅᑐᓂᒃ ᑲᒻᐸᓂᒋᔭᐅᔪᓂᒃ ᐊᖓᔪᖅᑳᖃᕐᕕᖃᕈᒪᓕᖅᑎᓐᓇᓱᒍᓐᓇᖅᑕᖏᑦ ᐅᑭᐅᖅᑕᖅᑐᕐᒥ.
• ᐃᓚᐅᖃᑕᐅᔪᑦ ᐅᖃᓚᐅᖅᑐᑦ ᒐᕙᒪᑐᖃᒃᑯᑦ ᑐᓴᐅᒪᑎᑦᑎᑦᑎᐊᕐᓂᖅᓴᐅᔭᕆᐊᖃᖃᑦᑕᕐᓂᖏᓐᓂᒃ ᓄᓇᕐᔪᐊᓕᕆᓂᕐᒧᑦ ᓯᕗᓪᓕᐅᑎᑕᒥᓂᒃ ᐊᔪᐃᓐᓈᕆᔭᒥᓂᒡᓗ ᓄᓇᓕᖕᒥᐅᓄᑦ ᑲᓇᑕᐅᑉ ᐅᑭᐅᖅᑕᖅᑐᐊᓂ.

ᐊᑐᓕᖅᑎᑕᐅᓂᖓ ᐅᑭᐅᖅᑕᖅᑐᕐᒧᑦ ᐊᑐᐊᒐᓕᕆᓂᕐᒧᑦ ᑐᙵᕕᐅᑉ ᓄᓇᕐᔪᐊᕐᒨᖓᓂᕆᔭᖓ

• ᕿᓂᖅᑐᖃᓪᓗᐊᖅᑐᖅ ᐋᖅᑭᒃᓯᓂᕐᒥᒃ ᑐᙵᕕᖃᖅᑐᒥᒃ ᐱᓕᕆᔾᔪᓯᕐᒥᒃ ᐃᓕᓴᖅᓯᓪᓗᐊᖅᖢᓂᓗ ᐊᔾᔨᒌᙱᑦᑑᑎᑦ ᐅᑭᐅᖅᑕᖅᑐᕐᒥ ᒪᓕᒐᓕᐅᕈᓐᓇᕐᓂᖃᖅᑐᑦ ᓄᓇᖃᖅᑳᖅᑐᓪᓗ ᑲᑎᙵᐅᖅᑐᑦ ᑲᓇᑕᒥ ᐊᔾᔨᒋᔭᐅᙱᖦᖢᑎᒃ ᐱᔪᒪᔭᖏᓐᓂᒃ ᓯᕗᓪᓕᐅᑎᑕᖏᓐᓂᒃ.
• ᑲᓇᑕ ᓴᙱᒃᑎᒋᐊᖅᑎᑦᑎᓪᓗᐊᖅᑐᖅ ᒐᕙᒪᑐᖃᒃᑯᑦ ᐃᑲᔫᑎᒃᓴᖏᓐᓂᒃ ᓲᕐᓗ ᑲᓇᑕᒥ ᐅᓇᑕᒻᑐᒃᓴᑦ ᐃᑲᔪᖅᓱᐃᓂᖏᑦ ᐱᕙᓪᓕᐊᑎᑦᑎᓂᖏᓪᓗ ᐅᑭᐅᖅᑕᖅᑐᕐᒥ ᐊᕕᒃᓯᒪᔪᓂᒃ (ᐆᒃᑑᑎᒋᓪᓗᒍ, ᑲᓇᑕᒥ ᐅᓇᑕᖅᑐᒃᓴᐃᑦ ᐃᑲᔪᕈᓐᓇᖅᑐᑦ ᓂᕿᓂᒃ ᐊᓯᖏᓐᓂᒡᓗ ᐱᖁᑎᓂᒃ ᐅᓯᔭᐅᓂᖏᓐᓂ).
• ᑲᓇᑕ ᐊᑐᕈᓐᓇᖅᑐᖅ ᐱᑕᖃᖅᐸᒌᖅᑐᓂᒃ ᐃᑲᔫᑎᒃᓴᓂᒃ ᐊᑐᓕᖅᑎᑕᐅᓂᖏᓐᓄᑦ ᓴᖅᑭᑦᑐᒃᓴᑦ ᐊᑐᐊᒐᕐᓄᑦ ᑐᙵᕕᖕᒥᑦ, ᐃᓚᒋᔭᐅᓪᓗᓂ ᐱᓕᕆᖃᑎᒋᔭᐅᓂᖏᑦ ᓄᓇᓕᖕᒥᐅᑕᐃᑦ ᑲᓇᑕᐅᑉ ᐅᑭᐅᖅᑕᖅᑐᐊᑕ ᐃᒪᕕᖏᑦ ᓇᐅᑦᑎᖅᓱᖅᑕᐅᑦᑎᐊᕐᓂᖅᓴᐅᓂᐊᕐᒪᑕ.
• ᑲᓇᑕᐅᑉ ᓯᕗᓕᐅᑎᑕᖓᑕ ᐅᑭᐅᖅᑕᖅᑐᕐᒥ ᑕᑯᔭᒃᓴᐅᖏᓐᓇᕐᓂᕐᒥᒃ ᐱᑕᖃᐃᓐᓇᕐᓂᕐᒥᒡᓗ ᐃᑲᔪᖅᓱᖅᑕᐅᔪᓐᓇᖅᑐᖅ ᐱᓕᕆᐊᒃᓴᖃᕐᓂᖅᓴᐅᒃᐸᑦ ᐱᕕᒃᓴᖃᕐᓂᖅᓴᐅᒃᐸᑕᓗ ᐅᑭᐅᖅᑕᖅᑐᕐᒥᐅᑕᐃᑦ.