ᖃᐅᔨᒋᐊᖅᑕᐅᓂᖓ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᐅᑉ

ᑎᑎᕋᖅᑕᐅᒋᐊᓐᖓᖅᑐᖅ ᑭᖑᓪᓕᖅᐹᖅ ᐅᓂᒃᑳᓕᐅᕈᑦ

ᐱᓕᕆᐊᖑᔫᑉ ᓈᓴᐅᑖ 1570-7/09090

ᐄᐳᕈ 19, 2011

ᖃᐅᔨᒋᐊᕐᕕᒃ, ᐱᓕᕆᔪᓐᓇᓂᕐᒥᒃ ᐆᑦᑐᖅᓯᕕᖓᑦ ᐊᒻᒪ ᖃᐅᔨᒋᐊᒃᑲᓂᕐᕕᒃ
ᖃᐅᔨᓴᖅᑎᑦ ᐊᒻᒪ ᖃᐅᔨᒋᐊᖅᑎᑦ

ᐅᓂᒃᑳᓕᐅᕈᑦ ᓇᐃᓈᖅᓯᔾᔪᑦ

ᖃᐅᔨᒋᐊᕐᕕᒃ, ᐱᓕᕆᔪᓐᓇᓂᕐᒥᒃ ᐆᑦᑐᖅᓯᕕᖓᑦ ᐊᒻᒪ ᖃᐅᔨᒋᐊᒃᑲᓂᕐᕕᖓᑦ ᐃᓄᓕᕆᔨᑐᖃᒃᑯᑦ ᑲᓇᑕᒥ ᐱᓕᕆᐊᕆᓚᐅᖅᑕᖓᑦ ᖃᐅᔨᒋᐊᓚᐅᖅᐳᑦ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᒻᒥᒃ. ᑖᓐᓇ ᐱᔾᔪᑎᖃᓚᐅᖅᑐᖅ ᖃᐅᔨᒋᐊᕐᓂᖅ ᐊᑦᑐᖅᑕᐅᓯᒪᓐᖏᑦᑐᒥᒃ ᐃᓱᒪᑖᕋᓱᐊᕐᓂᕐᒥᒃ ᐱᓪᓗᒋᑦ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᐅᑉ ᑲᔪᓯᑦᑎᐊᖅᓯᒪᓂᖏᑦ ᐱᔪᓐᓇᖅᓯᓪᓗᑎᒃ ᓴᖅᑭᖅᑎᒐᓱᐊᖅᑕᒥᓐᓂᒃ, ᐱᓗᐊᖅᑐᒥᒃ ᐅᑭᐅᓂ 2005–2006-ᒥᑦ 2009-2010-ᒧᑦ; ᑲᔪᓯᑦᑎᐊᕐᓂᖏᑦ ᐱᒋᐊᖅᑎᑦᑎᓂᒃᑯᑦ ᐱᓕᕆᖃᑎᒌᒍᑎᓂᒃ ᐱᐊᓚᓂᖅᐹᒃᑯᑦ ᐊᖑᒪᓇᓱᐊᖅᑐᒋᑦ ᓴᓇᐅᒐᓕᐅᖅᑎᑦ ᐱᔭᕆᐊᖃᖅᑕᖏᑦ; ᐊᒻᒪᓗᑦᑕᐅᖅ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᐅᑉ ᐋᖅᑭᓱᖅᓯᒪᓂᖓᑕ ᐊᒻᒪ ᐱᔭᒃᓴᐅᑎᑕᐅᓂᖓᑕ ᒪᓕᒃᑎᒋᓂᖓᓂᒃ ᒐᕙᒪᒃᑯᑦ ᓯᕗᓪᓕᐅᔾᔭᒃᓴᖏᓐᓂᒃ ᐅᑭᐅᖅᑕᖅᑐᒥ ᐊᒻᒪ ᐱᒋᐊᖅᑎᑕᐅᓯᒪᔪᑦ ᐱᐅᓂᖅᐹᑦ ᐱᓕᕆᔾᔪᓰᑦ ᐃᓕᖅᑯᓯᒃᑯᑦ ᓴᓇᐅᒐᓕᕆᔨᓄᑦ ᑎᒥᐅᔪᓄᑦ.

ᖃᐅᔨᒋᐊᖅᑕᐅᓂᖓ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᐅᑉ ᐱᓕᕆᐊᖑᓚᐅᖅᑐᖅ ᑐᓴᐅᒪᓗᑎᒃ ᐃᓱᒪᓕᐅᖅᑐᖃᖃᑦᑕᖁᓪᓗᒍ ᐱᔾᔪᑎᖃᖅᑐᓂᒃ ᑲᔪᓯᓂᖓᓂᒃ ᐊᑐᐃᓐᓇᐅᒪᔫᑉ ᐱᔪᓐᓇᕐᓂᖃᖅᑎᑕᐅᓂᖓᑕ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᐅᑉ: "ᐱᓕᐅᑕᐅᓯᒪᔪᑦ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᒻᒧᑦ ᐱᔾᔪᑎᖃᖅᑐᑦ ᐃᑲᔪᕐᓂᕐᒥᒃ ᐃᓄᓐᓂᒃ ᓴᓇᐅᒐᓕᐅᖅᑎᓂᒃ ᐊᒻᒪ ᓴᓇᔨᓂᒃ ᐅᑯᓇᓐᖓᑦ ᓄᓇᑦᓯᐊᖅ, ᓄᓇᕗᑦ, ᑯᐸᐃᑉ ᑕᕐᕋᖓ ᐊᒻᒪ ᓛᐸᑐᐊ ᐱᔪᓐᓇᖅᓯᕙᓪᓕᐊᑎᑕᐅᓂᖏᓐᓄᑦ ᐊᒻᒪ ᓂᐅᕐᕈᑎᒃᓴᐅᑎᑕᐅᓂᖏᓐᓄᑦ ᓴᓇᐅᒐᖏᑕ". ᑖᓐᓇ ᐱᔪᓐᓇᕐᓂᖃᖅᑎᑕᐅᓂᖅ ᓄᑖᓐᖑᖅᑎᑕᐅᔪᒫᕐᓂᐊᖅᐳᖅ ᒫᑦᓯ 31, 2012-ᒥ.

ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᒃ ᑮᓇᐅᔭᓕᐅᖅᑎᐅᒐᓂ, ᐃᓄᓐᓄᑦ ᓯᕗᓕᐅᖅᑕᐅᓪᓗᓂ ᑎᒥᐅᕗᖅ ᐊᐅᓚᓯᒪᓕᖅᑐᖅ ᑕᐃᒪᓐᖓᑦ 1989-ᒥᓂᑦ ᐃᑲᔪᖅᓱᕋᓱᒃᑐᓂ ᐃᓄᓐᓂᒃ ᓴᓇᐅᒐᓕᐅᖅᑎᓂᒃ ᐊᒻᒪ ᐱᕙᓪᓕᐊᑎᑕᐅᓂᖏᓐᓂᒃ ᐊᒻᒪ ᐱᐅᒋᔭᐅᓂᖏᓐᓂᒃ ᐃᓄᐃᑦ ᓴᓇᐅᒐᖏᑕ. ᑕᐃᒫᒃ, ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᒃ ᐃᓄᓐᓂᒃ ᐱᔪᓐᓇᖅᓯᕙᓪᓕᐊᑎᑦᑎᓇᓱᐊᖅᐳᖅ ᐃᓅᓯᕐᒥᒃ ᐊᒻᒪ ᑮᓇᐅᔭᓕᐅᕈᑎᓂᒃ ᐱᕙᓪᓕᐊᔪᓕᕆᓂᕐᒥᒃ ᐊᒻᒪ ᐃᓄᐃᑦ ᐊᐅᓚᑦᑎᓂᖓᓐᓂᒃ. ᐃᓄᓕᕆᔨᑐᖃᒃᑯᑦ ᑲᓇᑕᒥ ᐱᑎᑦᑎᐸᑉᐳᑦ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᒻᒥᒃ ᐊᕐᕌᒍᑕᒫᑦ ᐱᓕᐅᑎᓂᒃ $458,000-ᓂᒃ ᐊᐅᓚᓂᕐᒧᑦ ᐊᒻᒪ ᐊᓪᓚᕝᕕᓕᕆᓂᖅ ᐊᑭᓕᐅᑎᒃᓴᓂᒃ.

ᖃᐅᔨᒋᐊᕐᓂᕐᒥ ᐱᓕᕆᔾᔪᓯᕆᔭᐅᔪᖅ ᐃᓚᖃᓚᐅᖅᐳᖅ ᑎᑎᖅᑲᓂᒃ ᐊᒻᒪ ᑎᑎᕋᖅᑕᐅᓯᒪᕕᓐᓂᒃ ᖃᐅᔨᒋᐊᒃᑲᓂᕐᓂᕐᒥᒃ; ᐅᖃᓕᒫᒐᓕᐊᖑᓯᒪᔪᓂᒃ ᖃᐅᔨᒋᐊᒃᑲᓂᕐᓂᕐᒥᒃ; ᐊᐱᖅᓱᖅᑕᐅᓂᖏᓐᓂᒃ ᐃᓄᓕᕆᔨᑐᖃᒃᑯᑦ ᑲᓇᑕᒥ ᐊᒻᒪ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᒻᒥ ᐱᓕᕆᔾᔪᑎᓕᕆᔨᓂᒃ ᐃᖅᑲᓇᐃᔭᖅᑎᓂᒃ, ᑭᒡᒐᑐᖅᑎᖏᓐᓂᒃ ᐊᓯᖏᑕ ᑲᓇᑕᒥ, ᐊᕕᑦᑐᖅᓯᒪᓂᖏᓐᓂ ᖃᓪᓗᓈᓂ/ᐅᑭᐅᖅᑕᖅᑐᒥ, ᐅᕝᕙᓘᓐᓃᑦ ᐊᕕᑦᑐᖅᓯᒪᔪᓂ ᒐᕙᒪᒃᑯᑦ, ᐃᓕᓐᓂᐊᕐᓂᓕᕆᕖᑦ, ᓴᓇᐅᒐᓕᕆᔨᑦ ᑎᒥᐅᔪᑦ, ᓴᓇᐅᒐᒃᑯᕖᑦ, ᓂᐅᕕᖅᑏᑦ, ᐊᒻᒪ ᓴᓇᐅᒐᓕᐅᖅᑎᑦ; ᐊᒻᒪ ᓂᐅᕐᕈᔪᖃᖃᑦᑕᖅᑐᓂ ᓄᓇᓕᓐᓄᑦ ᐊᑐᓂᑦ ᑎᓴᒪᒪᐃᓐᓄᑦ ᐃᓄᐃᑦ ᓇᔪᖅᑕᖏᓐᓄᑦ (ᓄᓇᕗᑦ, ᐃᓄᕕᐊᓗᐃᑦ, ᓄᓇᑦᓯᐊᕗᑦ ᐊᒻᒪ ᓄᓇᕕᒃ). ᓱᓕᑦᑕᐅᖅ, ᐊᐱᖅᓱᖅᑐᖃᖃᑦᑕᓚᐅᕆᕗᖅ ᐅᑯᓇᓂ ᔭᓗᓇᐃ, ᐃᖃᓗᐃᑦ ᐊᒻᒪ ᕚᓕ.

ᑕᒪᕐᒥᑲᓴᒃ ᑲᑎᖅᓱᒐᕐᓂᒃ ᓄᐊᑦᑎᓂᖅ ᐱᓕᐊᖑᓚᐅᖅᐳᖅ ᖃᐅᔨᒋᐊᕐᕕᐅᑉ, ᐱᓕᕆᔪᓐᓇᓂᕐᒥᒃ ᐆᑦᑐᖅᓯᕕᖓᑦᑕ ᐊᒻᒪ ᖃᐅᔨᒋᐊᒃᑲᓂᕐᕕᐅᑉ ᐃᖅᑲᓇᐃᔭᖅᑎᖏᓐᓄᑦ ᐃᓚᒋᔭᐅᓐᖏᑦᑐᑑᓪᓗᓂ ᐅᖃᓕᒫᒐᓕᐊᖑᓯᒪᔪᓂᒃ ᖃᐅᔨᒋᐊᒃᑲᓐᓂᕆᐊᓐᖓᕐᓂᖅ ᑕᐃᓐᓇᓕ ᐱᓕᕆᐊᖑᓚᐅᖅᑐᓂ ᑎᑭ ᒐᔅᒪᓐ ᐱᓕᕆᖃᑎᒌᓄᑦ. ᐳᕆᐅᕆ ᖃᐅᔨᓴᖅᑎᐅᖃᑎᒌᑦ ᐃᑲᔪᓚᐅᖅᐳᑦ ᐊᐱᖅᓱᕈᑎᓂᒃ ᕿᒥᕐᕈᓂᒃᑯᑦ, ᖃᐅᔨᔭᐅᔪᓂᒃ ᓇᓗᓇᐃᔭᐃᓂᒃᑯᑦ, ᐊᒻᒪ ᑎᑎᕋᖅᑕᐅᒋᐊᓐᖓᓂᒃᑯᑦ ᑭᖑᓪᓕᖅᐹᒥᒃ ᐅᓂᒃᑳᓕᐅᕈᑎᒥᒃ.

ᐱᒻᒪᕆᐅᓂᖏᑦ ᖃᐅᔨᔭᐅᔪᑦ ᐊᒻᒪ ᐃᓱᒪᑖᕆᔭᐅᔪᑦ ᖃᐅᔨᒋᐊᕐᓂᕐᒥᑦ ᐅᑯᐊᖑᕗᑦ:

ᐃᓕᖓᑎᒋᓂᖏᑦ

ᐃᓄᐃᑦ ᓴᓇᐅᒐᓕᐅᖅᑎᑦ ᐃᓗᐊᓃᑦᑐᑦ ᐊᒻᒪ ᓯᓚᑖᓃᑦᑐᑦ ᑲᓇᑕᐅᑉ ᐅᑭᐅᖅᑕᖅᑐᖓᑕ ᐊᒥᓱᑦ ᐋᖅᑭᒃᑕᐅᓯᒪᓐᖏᑦᑐᓂᒃ ᐱᔭᕆᐊᖃᐅᖅᐳᑦ, ᐱᒋᐊᖅᓯᒪᔪᓂᒃ ᐊᑐᐃᓐᓇᖃᕆᐊᓐᖓᕐᓂᕐᒥᑦ ᓱᓇᒃᑯᑖᓂᒃ ᑎᑭᐅᒪᔪᓂᒃ ᐱᔭᕆᐊᑐᔪᓄᑦ ᑐᓴᐅᒪᖃᑎᒌᔾᔪᑎᓄᑦ ᐊᑦᑐᐊᔾᔪᑕᐅᔪᓐᓇᖅᑐᓄᑦ ᐃᓕᖅᑯᓯᒃᑯᑦ ᓴᓇᔪᓕᕆᓂᓕᒫᕐᒧᑦ. ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᒃ ᑐᓴᐅᒪᕗᑦ ᑕᒪᒃᑯᓂᖓ ᐱᔭᕆᐊᖃᖅᑕᐅᔪᓂᒃ ᐊᒻᒪ ᐱᓇᓱᐊᒐᖅᐳᑦ ᑲᒪᒋᔭᖃᕈᑎᒃᓴᓂᒃ ᐱᔾᔪᓯᖃᕐᓗᑎᒃ ᐊᑑᑎᖃᖅᑐᓂᒃ ᓴᓇᐅᒐᓕᐅᖅᑎᓄᑦ ᐊᒻᒪ ᐃᓕᖓᑦᑎᐊᖅᑐᓂᒃ ᐃᓄᐃᑦ ᐃᓕᖅᑯᓯᖓᓐᓄᑦ. ᑕᐃᒫᒃ, ᑐᕌᓕᖅᑎᒍᓐᓇᕐᒪᑦ ᐃᒻᒥᓂᒃ ᐊᓐᓂᖅᑐᓂᖅᓴᓄᑦ ᑐᕌᒐᖏᓐᓄᑦ ᒐᕙᒪᖏᑕ ᑲᓇᑕᐅᑉ ᐱᓪᓗᒍ ᐃᓕᖅᑯᓯᕐᒥᒃ ᓴᖅᑭᔮᖅᑎᑦᑎᓂᖅ ᐊᒻᒪ ᑮᓇᐅᔭᓕᐅᕈᑎᓂᒃ ᐱᕙᓪᓕᐊᑎᑦᑎᓂᖅ ᓄᓇᖃᖅᑳᖅᓯᒪᔪᓄᑦ, ᐊᒻᒪ ᐊᒥᓱᓄᑦ ᐃᓄᓕᕆᔨᑐᖃᒃᑯᑦ ᑲᓇᑕᒥ ᑐᕌᒐᖏᓐᓄᑦ ᐱᔾᔪᑎᓴᖃᓕᖅᐸᓪᓕᐊᔾᔪᑎᒃᓴᓂᒃ ᐊᒻᒪ ᖃᓄᐃᒍᑎᖃᓐᖏᓕᐅᒥᔾᔪᑎᒃᓴᓂᒃ ᐅᑭᐅᖅᑕᖅᑐᒥ.

ᐱᓕᕆᔾᔪᑎᐅᑉ ᐋᖅᑭᓱᖅᓯᒪᓂᖓ

ᐋᖅᑭᓱᖅᓯᒪᓂᖓ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᐅᐅᑉ ᓇᓗᓇᐃᖅᓯᔾᔪᑕᐅᓯᒪᕗᖅ ᑕᒪᐅᔪᓂᒃ ᐱᓇᓱᒍᓯᕐᓂᒃ ᐱᓕᕆᔾᔪᑎᒃᑯᑦ ᐱᔪᓐᓇᖅᓯᓇᓱᐊᖅᑐᑎᖏᑦ ᑮᓇᐅᔭᓕᐅᕈᑎᑎᒍᑦ, ᐃᓅᓯᒃᑯᑦ, ᐊᒻᒪ ᐃᓕᖅᑯᓯᒃᑯᑦ ᑐᕌᒐᖏᑦ ᐃᓄᓐᓄᑦ ᓴᓇᐅᒐᓕᐅᖅᑎᓄᑦ ᐊᒻᒪ ᓴᓇᐅᒐᖏᓐᓄᑦ, ᑭᓯᐊᓂ ᐊᐅᓚᖃᑎᖃᑦᑎᐊᕋᑎᒃ ᓱᓕᕆᐊᒃᓴᒐᓚᓐᓂᒃ, ᐱᓗᐊᖅᑐᒥᒃ ᐊᑦᑎᐊᑎᑕᐅᓂᖏᓐᓂᒃ ᓱᓕᕆᐊᒃᓴᓚᑦᑖᑦ ᓴᖅᑭᖅᑐᓄᑦ ᓂᕆᐅᒋᔭᐅᔪᓄᑦ ᐊᑑᑎᖃᕐᕕᒋᓂᐊᖅᑐᒋᔭᐅᔪᓄᑦ. ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᐅᑉ ᓱᓕᕆᐊᕆᕙᓚᐅᖅᑕᖏᑦ ᐊᑕᐅᓯᐅᓐᖏᑦᑐᒥ ᐊᕐᕌᒎᓚᐅᖅᑐᒥ ᑕᒪᐃᑕ ᐃᓗᐊᓃᑉᐳᑦ ᐸᐸᑦᑎᕕᐅᑉ ᐱᓕᕆᐊᒃᓴᕆᔪᒫᕐᓂᐊᖅᓯᒪᔭᖏᑕ, ᑭᓯᐊᓂ ᑕᐃᓐᓇ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᒃ ᐱᕚᓪᓕᕋᔭᖅᐳᖅ ᓄᑖᕐᒥᑦ ᖁᓚᐅᑦᑎᓯᒪᔪᒥᑦ ᐋᖅᑭᓱᖅᓯᒪᓂᕐᒥᑦ ᐅᕝᕙᓘᓐᓃᑦ ᐊᑯᓂᐅᔪᒥ ᐸᕐᓇᒍᑎᒥᑦ.

ᐱᖃᑕᐅᓯᒪᔪᑦ ᐊᖏᐅᑎᖃᖅᐳᑦ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᒻᒥᒃ ᐸᐸᑦᑎᕕᒋᔭᐅᓂᖓᓂᒃ, ᐊᐅᓚᓂᖓᓂᒃ ᐃᒻᒥᑰᖅᑐᓂ ᒐᕙᒪᒃᑯᓐᓂᑦ, ᑕᒪᓐᓇ ᐱᑕᖃᕈᑕᐅᔪᓐᓇᕐᓂᖓᓄᑦ ᑕᒪᐅᓂᒃᓴᓂᒃ ᑮᓇᐅᔭᓂᒃ ᐱᕕᒃᓴᐅᔪᓐᓇᖅᑐᓂᒃ, ᐊᒻᒪ ᐱᑕᖃᕈᓐᓇᕈᑕᐅᑐᐃᓐᓇᕆᐊᖃᖅᓱᑎᒃ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᐅᑉ ᓱᓕᕆᐊᖏᓐᓄᑦ ᓇᒥᑐᐃᓐᓇᖅ ᒐᕙᒪᒃᑯᑦ ᐃᓱᒪᒋᔭᐅᕕᒋᑐᐃᓐᓇᕆᐊᓕᖏᓐᓂ ᐅᓚᕕᓴᐃᓱᒋᔭᐅᓗᑎᒃ ᐃᓄᐃᑦ ᐊᐅᓚᑦᑎᓂᖏᓐᓂᒃ. ᐊᒥᓲᓂᖅᐹᑦ ᐱᖃᑕᐅᓯᒪᔪᑦ ᐃᓱᒪᖃᑎᖃᕆᕗᑦᑕᐅᖅ ᑖᓐᓇ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᒃ ᐊᐅᓚᓂᖓᓂᒃ ᐊᔾᔨᐅᖏᑦᑐᒥᒃ ᐃᓂᖓᖅᑐᓂ ᐃᓕᖅᑯᓯᒃᑯᑦ ᓴᓇᔪᓕᕆᓂᕐᒥ, ᐊᒻᒪ ᐱᑕᑭᒍᑕᐅᓪᓗᓂ ᐊᑑᑎᖃᓐᖏᑦᑐᓄᑦ ᐅᕝᕙᓘᓐᓃᑦ ᖃᓕᕇᓄᑦ ᐱᓕᕆᔾᔪᑎᓄᑦ. ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᒃ ᐱᓕᕆᖃᑎᖃᖃᑦᑕᖅᓯᒪᕗᖅ ᐃᓛᓐᓂᒃᑯᑦ ᑕᒪᐅᔪᓂᒃ ᐊᓯᒥᓐᓂᒃ ᑎᒥᐅᔪᓂᒃ – ᐃᓕᓐᓂᐊᕐᓂᓕᕆᔨᑦ, ᓴᓇᐅᒐᓕᐅᖅᑎᑦ, ᐃᓕᖅᑯᓯᓕᕆᔨᑦ, ᐱᓕᕆᕖᑦ, ᐊᒻᒪ ᒐᕙᒪᒃᑯᑦ – ᑭᓯᐊᓂ ᓱᓕ ᐱᒋᐊᖅᑎᑦᑎᔭᕆᐊᖃᕋᓗᐊᖅᑐᓂ ᐊᒥᓱᓂᒃ ᐱᓕᕆᖃᑎᒌᓐᓇᕈᑎᒃᓴᓂᒃ. ᓇᓗᓇᓐᖏᔾᔪᑎᑕᖃᖅᐳᖅ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᐅᑉ ᐃᖅᑲᓇᐃᔭᖅᑎᖏᓐᓂᑦ ᑕᒪᓐᓇ ᓵᓐᖓᕕᐅᑐᐃᓐᓇᕆᐊᖃᕐᓂᖓᓄᑦ ᓯᕗᓂᕐᒥ ᐱᓕᕆᐊᖑᔪᓂ.

ᐊᒥᓱᒐᓚᐃᑦ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᐅᑉ ᓱᓕᕆᐊᖏᑦ ᐊᒻᒪ ᓯᕗᓪᓕᐅᔾᔭᒃᓴᖏᑦ ᑐᑭᐊᓐᓃᖓᕗᑦ ᓇᓗᓇᐃᖅᑕᐅᓯᒪᔪᑦ ᐱᐅᓂᖅᐹᑦ ᐱᓕᕆᔾᔪᓰᑦ ᑎᒥᐅᔪᓄᑦ ᐃᑲᔪᖅᓱᖅᑐᓄᑦ ᓴᓇᐅᒐᓕᕆᓂᕐᒥᒃ ᐊᒻᒪ ᓴᓇᐅᒐᓕᐅᖅᑎᓂᒃ, ᐃᓚᒋᔭᐅᓪᓗᑎᒃ ᓴᓇᔭᐅᖃᑦᑕᕐᓂᖏᑦ ᐃᓄᐃᑦ ᓴᓇᐅᒐᖏᓐᓂᒃ ᐱᔾᔪᑎᖃᖅᑐᑦ ᐅᖃᓕᒫᒐᐃᑦ, ᓵᓐᖓᔾᔪᑕᐅᓪᓗᑎᒃ ᐱᕙᓪᓕᐊᑎᑕᐅᖏᓐᓄᑦ ᓴᓇᐅᒐᐃᑦ ᐊᒻᒪ ᐱᓕᕆᕕᓕᕆᔪᓐᓇᕐᓂᐅᑉ, ᐊᒻᒪ ᐃᑲᔪᖅᓱᕐᓂᕐᒧᑦ ᓴᓇᐅᒐᓕᐅᖅᑎᓄᑦ ᐊᐅᓚᑕᐅᔪᓂᒃ ᐱᓕᕆᕕᓐᓂᒃ ᐃᖅᑲᓇᐃᔮᒃᑯᑦ ᐱᓕᒻᒪᓴᕐᓂᕐᒧᑦ ᐊᒻᒪ ᓂᐅᕐᕈᑎᒃᓴᓕᕆᓂᕐᒧᑦ.

ᐱᐊᓚᓂᖏᑦ ᐊᒻᒪ ᐱᔪᓐᓇᖅᓯᔭᐅᓂᖏᑦ ᓴᖅᑭᐊᔪᑦ

ᐆᑦᑐᖅᑕᐅᓂᖏᑦ ᐊᑦᑐᖅᓯᓂᖃᖅᑐᑦ ᓴᖅᑭᖅᑐᑦ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᐅᑉ ᓱᓕᕆᐊᖏᓐᓂᑦ ᒥᑭᔫᕗᑦ. ᑖᓐᓇ ᐸᐸᑦᑎᕕᒃ ᐋᖅᑭᓱᐃᔾᔪᑎᖃᓐᖏᒻᒪᑦ ᖃᐅᔨᒪᔾᔪᑕᐅᔪᓐᓇᖅᑐᓂᒃ ᓴᖅᑭᔮᖅᑎᑎᔾᔪᑕᐅᔪᓐᓇᕋᔭᖅᑐᓂᒃ ᓴᖅᑭᐊᑎᑕᐅᓇᓱᐊᖅᑐᓄᑦ. ᖃᐅᔨᒪᔾᔪᑕᐅᔪᓐᓇᖅᑐᓂᒃ ᑲᑎᖅᓱᒐᕐᓂᒃ ᐊᑐᐃᓐᓇᐅᔪᖃᑦᑎᐊᓚᐅᓐᖏᓚᖅ ᑕᐃᒃᓱᒪᓂ ᑲᑎᖅᓱᒐᕐᓂᒃ ᓄᐊᑦᑎᔪᖃᖅᑎᓪᓗᒍ, ᐊᓪᓛᑦ ᑲᔪᓯᕙᓪᓕᐊᖏᓐᓇᖅᑐᓄᑦ ᓱᓕᕆᐊᖏᓐᓄᑦ, ᐃᓚᒋᔭᐅᓪᓗᑎᒃ ᐅᖃᐅᓯᒃᓴᕆᔭᐅᔪᑦ ᒥᒃᓵᓄᑦ ᐃᓄᐃᑦ ᓴᓇᐅᒐᓕᐅᖅᑎᑦ ᓂᐅᕕᕐᕕᖓᑦᑕ, ᓂᐅᕕᐊᖑᓯᒪᓪᓚᑖᖅᑐᓂᑦ ᑲᑎᖅᓱᒐᐃᑦ, ᐅᕝᕙᓘᓐᓃᑦ ᐅᖃᐅᓯᒃᓴᕆᔭᐅᔪᑦ ᐱᓪᓗᒍ ᐸᐸᑦᑎᕕᐅᑉ ᐃᓕᖅᑯᓯᖅᓯᐅᑎᓂᒃ ᓴᓇᔪᓕᕆᓂᕐᒧᑦ ᐃᓕᓴᕆᔭᐅᔾᔪᑎᓄᑦ ᐱᓕᕆᔾᔪᑎᖓ. ᐱᑕᖃᓐᖏᓐᓂᖓ ᑐᕚᒃᓴᐅᔪᓂᒃ ᐊᒻᒪ ᓈᓴᐃᔾᔪᑎᒃᓴᐅᔪᓂᒃ ᑲᑎᖅᓱᒐᕐᓂᒃ ᐱᓇᐃᓗᑕᐅᕙᒻᒪᑦ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᒻᒧᑦ ᓱᕐᕋᐅᑎᔪᓂᒃ ᐊᒻᒪ ᐱᐊᓚᔪᓂᒃ ᐃᓱᒪᓕᐅᕈᑎᖃᕈᓐᓇᓂᒃᑯᑦ ᐅᕝᕙᓘᓐᓃᑦ ᐱᓇᓱᐊᕈᒪᓕᖅᑎᑦᑎᔪᓐᓇᓂᒃᑯᑦ ᐊᒻᒪ ᐃᓚᐅᑎᑦᑎᔪᓐᓇᓂᒃᑯᑦ ᐱᓕᕆᖃᑎᒋᔭᐅᔪᓐᓇᖅᑐᓂᒃ ᐊᒻᒪ ᐃᑲᔪᖅᓱᖅᑎᐅᔪᓐᓇᖅᑐᓂᒃ.

ᐱᑕᑭᓐᓂᖓᓄᑦ ᑲᑎᖅᓱᒐᕐᓂᒃ ᐃᓕᖓᔪᓂᒃ ᐱᔪᓐᓇᖅᓯᔭᐅᓂᖏᓐᓄᑦ ᓴᖅᑭᐊᔪᑦ, ᑐᓐᖓᕕᒃᓴᖅᑕᖃᓪᓚᕆᓐᖏᒻᒪᑦ ᓇᓗᓇᐃᖅᓯᔾᔪᑕᐅᔪᓐᓇᖅᑐᓂᒃ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᒃ ᓱᕐᕋᐅᑎᓂᖃᕐᓂᖅᐹᒃᑯᑦ ᐊᑐᖅᓯᒪᔭᕆᐊᖓ ᐊᑐᐃᓐᓇᐅᔪᓂᒃ ᐱᔾᔪᑎᒃᓴᖏᓐᓂᒃ. ᑖᓐᓇ ᐸᐸᑦᑎᕕᒃ ᓱᓕ ᑐᕚᖃᖅᐸᒻᒪ ᐃᓄᓕᕆᔨᑐᖃᒃᑯᑦ ᑲᓇᑕᒥ ᑮᓇᐅᔭᖃᖅᑎᑦᑎᔾᔪᑎᖏᓐᓂᒃ ᐋᖅᑭᐅᒪᑎᒐᓱᐊᖅᑐᒋᑦ ᐊᐅᓚᑎᑕᐅᔪᑦ, ᐊᒻᒪ ᐊᓯᖏᑦ ᑮᓇᐅᔭᓕᐅᕈᑕᐅᔪᑦ ᓱᓕᕆᐊᖏᑦ ᑮᓇᐅᔭᓕᐅᕈᑕᐅᔪᓐᓇᖅᓯᑐᐃᓐᓇᕆᐊᓕᐅᒐᓗᐊᑦ ᐊᓯᕈᕈᓐᓇᖅᓯᓗᓂ ᑕᒪᓐᓇ. ᑭᓯᐊᓂ, ᐃᓚᕚᓪᓕᕈᓐᓇᑐᐃᓐᓇᕆᐊᖃᕐᓂᖏᑦ ᑮᓇᐅᔭᓕᐊᑦ ᐊᑕᖐᓯᒪᔪᒥᑦ ᑮᓇᐅᔭᓂᒃ ᓄᐊᓴᐃᔾᔪᑎᒥᑦ ᐊᑐᖅᑕᐅᓲᒥᑦ ᐊᓯᖏᓐᓄᑦ ᐸᐸᑦᑎᕕᓐᓄᑦ, ᐊᒻᒪ ᐊᑐᖅᑐᖃᕐᓂᖓᓂᑦ ᖃᐅᔨᒪᔾᔪᑎᒃᓴᓂᒃ ᑲᑎᖅᓱᒐᕐᓂᒃ ᓴᖅᑭᔮᖅᑎᑎᔾᔪᑕᐅᔪᓐᓇᖅᑐᓂᒃ ᐊᑦᑐᖅᓯᓂᖏᓐᓂᒃ ᑐᖅᑯᖅᑕᐅᔪᑦ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᒻᒥᒃ, ᖃᐅᔨᒪᔭᐅᓐᖏᓐᓂᕗᑦᑕᐅᖅ.

ᐱᑕᓕᐅᒐᓗᐊᖅ ᑐᕚᒃᓴᐅᒻᒪᕆᓐᖏᑦᑐᓂᒃ ᓴᖅᑭᖅᓯᒪᔪᓂᒃ ᐊᒻᒪ ᑎᑎᖅᑲᒐᓚᓐᓂᒃ ᖃᐅᔨᓇᕈᑕᐅᔪᓂᒃ ᑲᔪᓯᑦᑎᐊᖅᓯᒪᓂᖓᓂᒃ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᐅᑉ ᐊᒻᒪ ᐊᒥᓱᑦ ᐱᖃᑕᐅᓯᒪᔪᑦ ᖁᕕᐊᒋᔭᖃᖅᑐᑎᒃ ᐸᐸᑦᑎᕕᒻᒥᒃ ᑲᔪᓯᑦᑎᐊᖅᓯᒪᓂᖓᓄᑦ ᑐᓴᐅᒪᓕᐅᒥᑎᑦᑎᓂᒃᑯᑦ, ᐱᕚᓪᓕᑎᑦᑎᓂᒃᑯᑦ ᐃᓕᓐᓂᐊᕈᑎᓂᒃ ᐃᓕᖓᔪᓂᒃ ᐃᓄᐃᑦ ᓴᓇᐅᒐᖏᓐᓄᑦ, ᐊᒻᒪ ᐱᑕᖃᖅᑎᑦᑎᓂᒃᑯᑦ ᐱᕚᓪᓕᐅᑎᔪᓂᒃ ᓴᓇᐅᒐᓕᐅᖅᑎᓄᑦ. ᑭᓯᐊᓂ, ᖃᑦᑏᓐᓇᕈᓗᐃᑦ ᐱᖃᑕᐅᓯᒪᔪᑦ ᐅᑉᐱᕈᓱᑦᑎᐊᖏᓐᓂᕗᑦᑕᐅᖅ ᑖᓐᓇ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᒃ ᐱᒻᒪᕆᒐᓚᒃᑯᑦ ᐊᑦᑐᖅᓯᓂᖃᖅᓯᒪᒐᓗᐊᕐᒪᖔᑦ ᐃᓕᖓᔪᓂᒃ ᒫᓐᓇᒫᒃᑯᑦ ᐅᕝᕙᓘᓐᓃᑦ ᐊᑯᓂᐅᔪᒥ ᐱᓇᓱᐊᒐᖏᓐᓄᑦ. ᒪᓕᒃᑐᒋᑦ ᑭᐅᔾᔪᑎᖏᑦ ᓴᓇᐅᒐᓕᐅᖅᑎᑦ ᑐᓴᐅᒪᓐᓂᖏᑦᑐᑦ ᐸᐸᑦᑎᕕᐅᑉ ᐱᓕᕆᐊᖓᓂᒃ, ᐅᕝᕙᓘᓐᓃᑦ ᐃᓱᒪᔪᒥᓃᑦ ᐃᓚᐃᓐᓇᖏᓐᓄᑦ ᐊᕕᑦᑐᖅᓯᒪᔪᑦ ᑐᕌᖓᔭᕆᐊᖓ, ᓱᓕ ᐱᒻᒪᕆᒐᓚᓐᓂᒃ ᐱᓕᕆᐊᒃᓴᖅᑕᖃᖅᐳᖅ ᐱᔪᓐᓇᖅᓯᔭᐅᑦᑎᐊᕈᓐᓇᖁᓪᓗᒍ ᐱᓕᕆᐊᒃᓴᖓ ᑲᓇᑕᓕᒫᕐᒥ ᐃᓄᐃᑦ ᓴᓇᐅᒐᓕᐅᖅᑎᑦ ᑎᒥᖓᑦᑕ.

ᐊᑐᓕᖁᔭᐅᔪᑦ

1. ᓇᓗᓇᐃᖅᓯᒪᑦᑎᐊᖁᓪᓗᒍ ᑐᕌᖅᑕᖅ ᐊᒻᒪ ᐃᓚᓕᐅᔾᔭᐅᑦᑎᐊᖁᓪᓗᒋᑦ ᒐᕙᒪᒃᑯᑦ ᐱᓕᕆᕕᖏᓐᓂ ᑭᐅᔨᐅᔪᓐᓇᕐᓂᕐᒧᑦ ᐱᓕᕆᔾᔪᑎᑦ, ᐃᓄᓕᕆᔨᑐᖃᒃᑯᑦ ᑲᓇᑕᒥ ᕿᒥᕐᕈᒋᐊᒃᑲᓂᖅᑐᒃᓴᐅᕗᑦ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᐅᑉ ᖃᓄᐃᓕᖓᓂᖓᓂᒃ ᐱᓕᕆᔾᔪᑎᓂ ᐊᐅᓚᓂᖏᓐᓂᒃ ᐋᖅᑭᓱᐃᔾᔪᑎᒥ. ᐊᒻᒪᓗ ᓱᓕ, ᐃᓄᓕᕆᔨᑐᖃᒃᑯᑦ ᑲᓇᑕᒥ ᐃᓱᒪᒃᓴᖅᓯᐅᖅᑐᒃᓴᐅᕗᑦ ᑲᑎᓐᖓᓕᖅᑎᑕᐅᔪᒃᓴᐅᒻᒪᖔᑦ ᐊᑕᐅᓯᖅ ᐱᔪᓐᓇᕐᓂᖃᖅᑎᑕᐅᔪᖅ ᐃᑲᔪᖅᓱᖅᑐᖅ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᒻᒥᒃ ᐱᑕᖃᕇᖅᑐᒧᑦ ᐱᔪᓐᓇᕐᓂᖃᖅᑎᑕᐅᔪᒧᑦ.
   
   
2. ᓇᓗᓇᐃᕆᐊᕐᓗᒍ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᐅᑉ ᐱᓕᕆᐊᒃᓴᖓ ᐊᒻᒪ ᐱᓇᓱᐊᒐᖏᑦ, ᐃᓚᒋᔭᐅᓗᒋᑦ ᓴᖅᑭᐊᑎᑕᐅᓇᓱᐊᖅᑐᑦ; ᐱᖃᑕᐅᓯᒪᔪᑦ ᐊᒻᒪ ᐊᑐᓛᖑᕙᑦᑐᑦ ᐱᔨᑦᑎᕋᐅᑎᖏᓐᓂᒃ.
   
   
3. ᐱᒋᐊᖅᑎᑦᑎᔪᖃᕐᓗᓂ ᐱᓇᓱᒍᓯᕐᒥᒃ ᑐᓴᐅᒪᔭᐅᓕᐅᒥᖁᓪᓗᒋᑦ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᐅᑉ ᐱᔨᑦᑎᕋᐅᑎᖏᑦ ᐊᒻᒪ ᐃᓚᐅᑎᑕᐅᓂᖅᓴᐅᑦᑎᐊᖁᓪᓗᒋᑦ ᐃᓄᐃᑦ ᓴᓇᐅᒐᓕᐅᖅᑎᑦ ᑕᒪᐃᓐᓂ ᐊᕕᑦᑐᖅᓯᒪᔪᓃᑦᑐᑦ.
   
   
4. ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᒃ ᑲᔪᓯᔪᒃᓴᐅᕗᖅ ᐱᕙᓪᓕᐊᑎᑦᑎᓇᓱᓐᓂᖅ ᐱᓕᕆᖃᑎᖃᐃᓐᓇᕐᓂᒃᒥᒃ ᐊᓯᖏᓐᓂᒃ ᓴᓇᐅᒐᓕᕆᓂᕐᒧᑦ ᐊᒻᒪ ᐃᓕᖅᑯᓯᓕᕆᓂᕐᒧᑦ ᐱᔨᑦᑎᕋᐅᑎᓕᕆᔨᓂᒃ ᑎᒥᐅᔪᓂᒃ ᐱᐊᓚᓂᖅᓴᐅᖁᓪᓗᒍ, ᐊᒻᒪ ᐊᑐᕈᓐᓇᖁᓪᓗᒍ ᐱᑕᖃᕇᖅᑐᓂᒃ ᐱᔾᔪᑎᒃᓴᓂᒃ.
   
   
5. ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᒃ ᐱᑕᖃᓕᐅᒥᑎᑦᑎᔪᒃᓴᐅᕗᖅ ᑮᓇᐅᔭᓂᒃ ᓄᐊᓴᐃᕕᒃᓴᓂᒃ ᐱᒋᐊᖅᑎᑦᑎᓂᒃᑯᑦ ᐱᓕᕆᔾᔪᑎᒥᒃ ᐱᑕᖃᓕᖅᑎᑦᑎᓇᓱᐊᕐᓗᑎᒃ ᐊᒻᒪ ᐱᓇᓱᐊᕐᓗᑎᒃ ᐊᓯᒃᑲᓐᓂᖏᓐᓂᒃ ᑮᓇᐅᔭᓂᒃ ᐃᒻᒥᒃᑰᖅᑐᓂᑦ ᐊᒻᒪ ᑯᐊᐳᕇᓴᓂᑦ ᐱᓕᐅᑎᖃᓲᓂᑦ.
   
   
6. ᓇᓗᓇᐃᕆᐊᕐᓗᒋᑦ ᐊᒻᒪ ᑐᓴᖅᑕᐅᑎᒋᐊᕐᓗᒋᑦ ᐱᓕᕆᐊᒃᓴᖏᑦ ᐊᒻᒪ ᑲᒪᒋᔭᕆᐊᖃᖅᑕᖏᑦ ᐃᓄᐃᑦ ᓴᓇᐅᒐᖏᓐᓂᒃ ᐸᐸᑦᑎᕕᐅᑉ ᑲᑎᒪᔨᖏᑕ ᐱᖃᑕᐅᓯᒪᔪᓄᑦ.

ᑐᑭᓯᓂᐊᖅᑕᐅᓯᒪᔪ ᑦ ᐊᑐᕐᓂᖓᓂᒃ ᐃᓄᐃᑦ ᓴᓇᖑᐊᕐᑎᓄᑦ ᐃᑲᔪᕐᑎᑦ

ᑎᓕᔭᐅᓯᒪᓂᕐᒧᑦ ᒪᓕᒐᐃᑦ

(ᐱᓕᕆᐊᖑᓯᒪᔪᑦ ᓈᓴᐅᑎᖓ : 1570-7/09090) 

ᐅᓪᓗᖅ: ᒪᐃ 14, 2010

ᖃᐅᔨᓂᐊᖅᑏᑦ, ᐱᓕᕆᑎᒋᓂᖏᓐᓂᒃ ᐆᒃᑐᕋᐃᔩᑦ ᐊᒻᒪᓗ ᕿᒥᕐᕈᔩᑦ ᐃᖃᓇᐃᔭᕐᕕᖕᒥ
ᖃᐅᔨᓴᖅᑕᐅᓂᖏᓐᓂᑦ ᑮᓇᐅᔭᐃᑦ ᐊᑐᖅᑕᐅᑦᑎᐊᓚᐅᕐᓂᖏᓐᓂᒃ ᐊᒻᒪᓗ ᑲᔪᓯᓯᒪᓂᖏᓐᓂᒃ ᖃᐅᔨᓴᐃᓂᖅ

1.    ᑕᒪᕐᒦᒃ ᑕᑯᓪᓗᒋᑦ

ᑕᕝᕙᓂ ᑎᑎᕋᖅᑕᐅᓯᒪᔪᒥ ᓇᓗᓇᐃᖅᑕᐅᔪᑦ ᑎᓕᔭᐅᓯᒪᓂᕐᒧᑦ ᒪᓕᒐᖏᑦ ᐃᓄᐃᑦ ᓴᓇᖑᐊᕐᑎᑦ ᐃᑲᔪᕐᑎᑦ ᐊᑐᕐᓂᖓᓂᒃ ᑐᑭᓯᓂᐊᖅᑕᐅᓂᖓᓄᑦ (IAF), ᑕᓐᓇ ᐱᓕᕆᕝᕕᖓ ᐃᓄᖕᓄᑦ ᐊᐅᓚᑕᐅᔪᖅ ᐃᑲᔫᑎᒋᔭᐅᓲᖅ ᐃᓄᖕᓄᑦ ᓴᓇᖑᐊᕐᑎᓄᑦ ᐅᑭᐅᖅᑕᖅᑐᒥ. ᑕᒪᓐᓇ ᑐᑭᓯᓂᐊᖅᑕᐅᓯᒪᔪᖅ ᑲᓇᑕᓕᒫᒥ ᑮᓇᐅᔭᓕᕆᓂᕐᒧᑦ ᑲᑎᒪᔩᑦ ᒪᓕᒐᖏᑦ ᒪᓕᒃᑕᐅᓪᓗᒋᑦ ᐊᑐᒐᒃᓴᓕᐊᖑᓯᒪᔪᖅ ᑲᔪᓯᖁᓪᓗᒍᒃ. ᑲᓇᑕᒥ ᑮᓇᐅᔭᓕᕆᓂᕐᒧᑦ ᑲᑎᒪᔩᑦ ᐊᑐᐊᒐᖓ ᑐᑭᓯᓂᐊᕐᓂᕐᒧᑦ ᒪᓕᒡᓗᒍᒃ, ᑐᑭᓯᓂᐊᖅᑕᐅᓂᖓᓂ ᖃᐅᔨᓴᖅᑕᐅᖃᓯᐅᑎᒋᐊᖃᕐᑐᖅ ᐃᑲᔪᕐᑎᑦ ᐊᑑᑎᖃᕐᓂᖏᑦ ᐃᑲᔪᖅᓯᒪᓂᖏ, ᐋᖅᑭᐅᒪᑎᐊᕐᓂᖏᑦ ᐊᒻᒪᓗ ᑮᓇᐅᔭᓂᒃ ᐊᑐᑦᑎᐊᕐᓂᖏᑦ.

2.    ᐊᑐᒐᒃᓴᓕᐊᖑᓯᒪᔪᑦ ᖃᓄᐃᑑᓂᖏᑦ

2.1   ᖃᓄᖅ ᐱᒋᐊᖓᓚᐅᖅᓯᒪᖕᒪᖔᑦ ᐊᖏᓂᖏᓪᓗ/ᐱᓕᕆᐊᖑᓚᐅᖅᑐᑦ

ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎᑦ ᑮᓇᐅᔾᔭᒃᓴᕈᑕᐅᓐᖏᑦᑐᑦ ᐱᓕᕆᕝᕕᓐᖑᖅᑎᑕᐅᓚᐅᖅᓯᒪᔪᑦ 1987ᒥ. ᑕᕝᕙᒃᓴᑐᐊᖑᓪᓗᓂᒃ ᐱᓕᕆᕝᕕᒃ ᑲᓇᑕᒥ ᐃᓄᐃᑦ ᓴᓇᖑᐊᕐᑎᖏᓐᓄᑦ ᑐᕐᕌᖓᔪᖅ ᐊᒻᒪᓗ ᓄᓇᖃᖅᑳᖅᓯᒪᔪᑦ ᓴᓇᖑᐊᕐᑎᖏᓐᓄᑦ ᑐᕐᕌᖓᔪᒥᒃ ᑲᓇᑕᒥ. ᐃᓄᐃᑦ ᓴᓇᖑᐊᕐᑎᖏᓐᓄᑦ ᐱᖁᓯᑐᖃᕐᓂᒃ ᐱᓕᕆᔨᓄᓪᓗ ᓇᖕᒥᓂᕆᔭᐅᔪᖅ ᐊᒻᒪᓗ ᐊᐅᓚᑕᐅᔪᖅ ᑕᕝᕙᓂ ᐱᓕᕆᕝᕕᖓᓂ ᐃᑲᔪᖅᑕᐅᓯᒪᔪᓐᓇᖅᑐᑦ ᓴᓇᖑᐊᖅᑏᑦ ᐱᓕᒻᒪᒃᓴᖅᑎᑕᐅᖃᑦᑕᖅᓱᑎᒃ ᐃᑲᔫᑎᒋᔭᐅᔪᓐᓇᖅᑐᓂᒃ ᓴᖅᑭᑎᔪᓐᓇᖅᓱᑎ, ᑐᓴᒐᒃᓴᓂᒡᓗ ᑐᓂᓯᓲᖑᓪᓗᑎᒃ ᓵᓚᒃᓴᐅᓯᐊᖑᔪᓐᓇᖅᑐᓂᒃ ᐊᒻᒪᓗ ᑮᓇᐅᔭᓂᒃ ᐃᑲᔫᓯᐊᓂᒃ, ᐊᒻᒪᓗ ᖃᐅᔨᖃᑦᑕᐅᑎᓂᕐᒧᑦ ᐊᑐᖅᑕᐅᔪᓐᓇᖅᑐᓂᒃ ᐋᕿᒃᓱᐃᓲᖑᓪᓗᑎᒃ. ᐃᓄᐃᓪᓗ ᓴᓇᖑᐊᖅᑕᖏᑦ ᐱᕙᓪᓕᐊᑎᑕᐅᓂᖏᓐᓄᑦ ᐱᓕᕆᐊᖃᓲᖑᓪᓗᑎᒃ ᐅᑭᐅᖅᑕᖅᑑᑉ ᓄᓇᓕᖏᓂᑦ, ᑲᓇᑕᒥ, ᓄᓇᕐᔪᐊᓕᒫᒥᓗ.

ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎᑦ ᐱᒋᐊᖅᑎᑕᐅᓚᐅᖅᓯᒪᔪᖅ ᑕᒪᑐᒥᖓ ᐱᓕᕆᐊᖃᖅᑐᑦ, ᐃᓚᒋᓗᒋᑦ ᓴᓇᖑᐊᒐᓕᕆᔨᒻᒪᕇᓐᓄᑦ ᐊᒻᒪᓗ ᓂᐅᕈᑎᖃᓲᓄᑦ ᐃᓄᐃᑦ ᓴᓇᖑᐊᖅᑕᖏᑦ ᒪᑭᒪᔾᔪᑎᒃᓴᑦᑎᐊᕙᐅᑎᓪᓗᒋᑦ ᐅᑭᐅᖅᑕᖅᑐᒥ, ᐃᓱᒫᓘᑎᒋᔭᐅᓚᐅᖅᓯᒪᔪᑦ ᐊᑐᕈᓃᖅᐸᓪᓕᐊᓂᖓ ᐱᓕᕆᐊᖃᕈᒪᓚᐅᖅᑐᑦ ᐅᐸᓗᖓᐃᔭᐅᑎᓂᒡᓗ ᐋᖅᑭᒃᓯᔪᒪᓪᓗᑎᒃ ᓴᓇᖑᐊᖅᑕᐅᔪᑦ ᐊᒥᓱᕈᖅᐸᓪᓕᐊᖁᓪᓗᒋᑦ ᐱᐅᔫᑎᐅᓂᐊᖁᓪᓗᒋᓪᓗ. ᐃᑲᔪᕐᑎᑦ ᐱᓕᕆᖃᑎᖃᕐᓂᐊᓚᐅᖅᓯᒪᔪᑦ ᐃᓄᖕᓂᒃ ᓴᓇᖑᐊᕐᑎᓂᒃ ᐊᒻᒪᓗ ᐃᓄᐃᑦ ᓴᓇᖑᐊᕐᑕᖏᓐᓂᒃ ᓴᖅᑭᑎᑦᑎᓲᓂᑦ ᑕᒪᓐᓇ ᓴᓇᖑᐊᕐᓂᖅ ᐅᑭᐅᖅᑕᖅᑐᒥ ᐱᕙᓪᓕᐊᒃᑲᓐᓂᖁᓪᓗᒍᒃ, ᑕᐃᒪᓐᖓᓂᒡᓗ ᐱᒋᐊᕐᓂᖓᓂᑦ ᐱᓕᕇᓐᓇᖅᑐᑦ ᐱᐅᓯᒋᐊᖅᑎᑕᐅᓇᓱᒃᓱᑎ ᐃᓄᖕᓂ ᓴᓇᖑᐊᕐᑕᐅᔪᑦ ᓇᓂᓕᒫᕐᓗ ᓂᐅᕕᐊᒃᓴᐅᔪᓐᓇᖁᓪᓗᒋᓪᓗ.

ᐱᓕᕆᐊᒃᓴᕆᔭᐅᔪᑦ ᐃᑲᔪᖅᑕᐅᓂᖏᓐᓄᑦ ᐃᓄᐃᑦ ᓴᓇᖑᐊᕐᑎᖏᑦ ᑐᑭᓯᐅᒪᔭᐅᓂᖅᓴᐅᓂᖏᓐᓄᓪᓗ ᐃᓄᐃᑦ ᓴᓇᖑᐊᕐᑕᖏᑦ ᓄᓇᕐᔪᐊᓕᒫᒥ ᐃᑲᔪᕐᑎᑦ ᐅᑯᓂᖓ ᑎᓴᒪᓂ ᐱᓕᕆᐊᖃᓲᑦ:

• ᑐᓴᐅᒪᑎᑦᑎᓇᓱᐊᕐᓂᕐᒥᒃ - ᐃᓄᐃᑦ ᓴᓇᖑᐊᕐᑎᓂ ᐃᑲᔪᕐᑎᑦ ᓄᓇᕐᔪᐊᕐᒨᖓᔪᒥ ᐅᖃᓕᒫᒐᓕᐅᓲᑦ ᐃᓄᐃᑦ ᓴᓇᖑᐊᖅᑕᖏᓐᓂᒃ ᑕᑯᒃᓴᐅᑎᑦᑎᓲᒥᒃ, ᐃᓄᐃᑦ ᓴᓇᖑᐊᒐᖏ ᐅᖃᓕᒫᒐᐃᑦ, 3,000ᖏᓐᓃᑦᑐᑦ ᓂᐅᕕᖅᑕᐅᓲᑦ ᑲᓇᑕᒥ ᓄᓇᕐᔪᐊᕐᒥᓗ. ᐊᓯᐊᓂᒡᓗ ᐅᖃᓕᒫᒐᓕᐅᓲᖑᓪᓗᑎ ᐃᓕᓐᓂᐊᕈᑎᒃᓴᓂᒃ ᐊᒻᒪᓗ ᓴᓇᖑᐊᕐᑎᓂᒃ ᐃᑲᔪᓲᖑᓪᓗᑎ ᑐᑭᓯᒋᐊᒃᑲᓐᓂᕋᓱᒃᑎᓪᓗᒋᑦ ᖃᓄᐃᓕᐅᕈᓐᓇᕐᒪᖔᑕ ᓇᖕᒥᓂᖃᕐᓂᖏᓐᓂᒃ ᓇᓗᓇᐃᔭᐃᓂᕐᒧᑦ
  
  
• ᑮᓇᐅᔭᓕᐅᕋᓱᐊᕐᓂᕐᒥᒃ – ᐱᓕᕆᐊᖃᓲᑦ ᑮᓇᐅᔭᓕᐅᕈᑎᒋᔭᐅᔪᓐᓇᖅᑐᓂᒃ ᑐᓴᐅᒪᑎᑦᑎᑲᓐᓂᓲᓂᒡᓗ ᖃᒡᒋᕐᓂᒃ, ᓴᓇᖑᐊᕐᓂᕐᒥᒃ ᐅᕝᕙᓘᓐᓃᑦ ᓯᓚᑖᓂᖔᖅᑐᓂᒃ ᐱᓕᕆᖃᑎᖃᖅᓱᑎ ᓇᖕᒥᓂᖃᖅᑐᓂᒡᓗ ᑮᓇᐅᔭᓕᐅᕈᑎᒋᔭᐅᔪᓐᓇᖅᑐᓂᒃ ᐱᓕᕆᐊᖃᕐᓂᕐᒧᑦ;
  
  
• ᓂᐅᕈᑎᖃᕐᓂᕐᒧᑦ ᐱᕙᓪᓕᐊᑎᑦᑎᓇᓱᐊᕐᓂᕐᒧᓪᓗ ᐱᓕᕆᐊᓂᒃ – ᐃᑲᔪᕐᑎᑦ ᓂᐅᕕᕐᕕᖃᕐᒥᔪᑦ ᓴᓇᖑᐊᒐᓂᒃ ᓂᐅᕕᐊᒃᓴᖃᓲᒻᒥ ᑮᓇᐅᔾᔭᒃᓴᕈᑕᐅᖏᑦᑐᒥᒃ, ᐊᒻᒪᓗ ᖃᕆᓴᐅᔭᒃᑯᑦ ᓂᐅᕕᐊᒃᓴᖃᓲᖑᓪᓗᑎ. 2008ᒥ ᒪᕈᐃᕐᓱᖅᓱᑎ ᖃᕆᓴᐅᔭᒃᑯᑦ ᑕᑯᔭᒐᒃᓴᖃᓚᐅᕐᒥᔪᑦ; ᐃᓄᐃᑦ ᓴᓇᖑᐊᒐᖏ ᐆᒻᒪᒃᑐᑦ, ᑕᐃᑲᓐᓂ ᑕᑯᒃᓴᐅᑎᑕᐅᓚᐅᖅᑐᑦ ᐊᒥᓱᒻᒪᕆᐊᓗᐃᑦ ᐃᓄᐃᑦ ᓴᓇᖑᐊᒐᖏᑦ, ᓴᓇᖑᐊᖅᑎᓪᓗ ᐅᓂᒃᑲᐅᓯᕆᔭᐅᓪᓗᑎᒃ ᐊᐱᖅᓱᖅᑕᐅᓂᖏᓪᓗ ᐊᒻᒪᓗ ᐃᓄᒃᔪᐊᕐᒥ ᖃᓄᐃᓕᐅᖅᑕᐅᖃᑦᑕᕐᓂᑯᓂ ᐅᓂᑳᓕᐅᖅᑕᐅᔪᒥᒃ, 300 ᐊᔾᔨᓐᖑᐊᓂᒃ ᑕᑯᒃᓴᐅᑎᑦᑎᓚᐅᕐᑐᖅ ᓴᓇᖑᐊᖅᑕᐅᔪᓂᒃ, ᐅᓂᒃᑳᓕᐅᖅᑕᐅᔪᓂᒡᓗ ᓴᓇᖑᐊᒐᐃᑦ ᒥᒃᓵᓂᒃ ᐊᒻᒪᓗ ᓂᐱᓕᐅᖅᑕᐅᔪᓂᒃ.
  
  
• ᐱᓕᒪᒃᓴᐃᓂᖅ ᐱᕙᓪᓕᐊᓂᕐᓗ - ᐃᑲᔪᕐᑎᓄᓪᓗ ᐊᐅᓚᑕᐅᒋᓪᓗᓂ ᐃᓄᐃᑦ ᓴᓇᖑᐊᕐᑎᓄᑦ ᓯᓚᑐᖅᓴᕐᕕᒃ, ᐱᖅᑯᓯᑐᖃᕐᓂᒃ ᐊᑐᖅᓱᑎ ᓇᖕᒥᓂᖃᖅᑐᓄ ᑐᕐᕌᖓᔪᒥᒃ ᐃᓕᓐᓂᐊᕈᑎᒃᓴᓕᒃ ᑕᕝᕙᓂ ᐱᖅᑯᓯᑐᖃᕐᓂᒃ ᐊᑐᖅᓱᑎᒃ ᐱᓕᕆᐊᖃᖅᐸᒃᑐᑦ ᓂᐅᕈᑎᖃᕐᓂᕐᒥᒃ, ᑎᑎᕋᖅᓯᒪᔪᒃᑯᑦ ᓇᓗᓇᐃᔭᐃᓂᕐᒥᒃ, ᑕᑯᔭᒐᖃᕐᕕᒻᒥ ᐊᑐᖅᑕᐅᓲᓂ ᐊᒻᒪᓗ ᓱᓇᖑᐊᒐᓕᕆᓂᕐᒥᒃ ᐃᓕᓐᓂᐊᖅᑎᑕᐅᕙᒃᑐᑦ ᓴᓇᖑᐊᒐᓕᕆᓂᕐᒥᒃ ᐃᖅᑲᓇᐃᔮᖅᑖᕈᓐᓇᕐᓂᐊᖁᓪᓗᒋᑦ.  ᐃᖅᑲᓇᐃᔮᒥᓂ ᐊᑐᑦᓯᐊᕈᓐᓇᕐᓂᕐᒧᓪᓗ ᐃᓕᓐᓂᐊᖅᑎᑦᑎᖃᑦᑕᕐᒥᔪᑦ ᐃᓄᖕᓄᑦ ᓴᓇᖑᐊᕐᑎᓄᑦ ᑐᕐᕌᖓᔪᓂᒃ ᐊᒻᒪᓗ ᑮᓇᐅᔭᒥ ᐃᑲᔫᓯᐊᖃᖅᓱᑎ ᓄᓇᓕᖕᓂᑦ ᓴᓇᖑᐊᒐᓕᕆᓂᕐᒧᑦ ᐱᓕᕆᐊᖃᖅᑐᓄᑦ.

2.2     ᐊᑐᒐᒃᓴᓕᐊᖑᓯᒪᔪᒧᑦ ᑎᑭᐅᑕᐅᓇᓱᒃᑐᑦ ᑎᑭᐅᑕᐅᓂᐊᕋᓱᒋᔭᐅᓚᐅᖅᑐᓪᓗ

ᓂᕆᐅᕆᔭᐅᓚᐅᖅᑐᑦ ᓴᖅᑭᑕᐅᓂᐊᖅᑐᑦ ᐃᓄᐃᑦ ᓴᓇᖑᐊᕐᑎᓄᑦ ᐃᑲᔪᕐᑎᓂᑦ ᐊᑐᒐᒃᓴᓕᐊᖑᓯᒪᔪᓄᑦ ᐊᑐᕐᒥᔪᑦ ᐃᓄᓕᕆᔨᑐᖃᒃᑯᑦ ᐱᓕᕆᕝᕕᖓᓂ ᐊᑐᒐᒃᓴᓕᐊᖑᓯᒪᔪᑦ ᑐᓐᖓᕕᖏᓐᓂᑦ ᒐᕙᒪᒃᑯᑦ ᐱᓕᕆᕝᕕᖏᓐᓂᑦ ᑎᒥᖁᑎᖏᓐᓂᓪᓗ ᐊᑐᖅᑕᐅᓱᑦ, ᑖᑯᐊ ᑐᓐᖓᕕᖏᑦ ᐃᑲᔪᕐᓂᖃᕈᓐᓇᕐᒥᔪᑦ ᒐᕙᒪᒥ ᐊᐅᓚᓂᖃᑦᑎᐊᕐᓂᕐᒥᒃ ᐊᒻᒪᓗ ᐱᓕᕆᖃᑎᒌᓂᕐᒥᒃ ᓄᓇᖃᖅᑳᖅᓯᒪᔪᓂᑦ, ᐃᓄᖕᓂ ᐊᒻᒪᓗ ᐅᑭᐅᖅᑕᖅᑐᕐᒥᐅᓂ, ᑕᒪᓐᓇᓗ ᐃᑲᔪᖅᓂᐅᒋᓪᓗᓂ ᓯᑕᒪᓂᒃ ᑲᓇᑕᒧᑦ ᑐᖓᕕᐅᑎᑕᐅᔪᓂᒃ ᑕᐃᔭᐅᔪᓂᒃ − ᓴᖏᒡᓕᕙᓪᓕᐊᔾᔪᑎᒃᓴᓂᒃ ᑲᑎᖅᓱᐃᕙᓪᓕᐊᓂᖅ-ᑲᓇᑕᒥ ᓄᓇᖃᖅᑳᖅᓯᒪᔪᑦ ᖃᓄᐃᓕᐅᕈᑎᒃᓴᓄᑦ ᐸᕐᓇᐅᑎᖏᓐᓂᒃ.

ᐱᓕᕆᐊᕆᔭᐅᓂᐊᖅᑐᑦ, ᑐᕐᕌᕐᕕᖏᑦ, ᐊᒻᒪᓗ ᑎᑭᐅᑎᔭᐅᓇᓱᒃᑐᑦ ᓇᓗᓇᐃᖅᑕᐅᓯᒪᔪᑦ ᐊᑐᒐᒃᓴᓕᐊᖑᓯᒪᔫᑉ ᐆᒃᑑᑎᓕᐅᖅᑕᐅᓯᒪᓂᖓᓂᑦ ᐊᒻᒪᓗ ᓴᖅᑭᑦᑐᖃᕆᐊᖃᕐᓂᕐᒧᑦ ᑲᒪᒋᔭᖃᕆᐊᖃᕐᓂᕐᒧᓪᓗ ᐋᖅᑭᒃᑕᐅᓯᒪᓂᖓᓂᑦ(RMAF). ᑕᒪᓐᓇᓗ ᐋᖅᑭᒃᑕᐅᓯᒪᔪᖅ ᐃᓄᐃᑦ ᓴᓇᖑᐊᒐᓕᐅᕐᓂᕐᒥᒃ ᐊᔪᕈᓃᖅᐸᓪᓕᐊᖁᓪᓗᒋᑦ ᐊᒻᒪᓗ ᐃᑲᔪᖅᑕᐅᓯᒪᓂᐊᖁᓪᓗᒋᑦ ᓴᓇᖑᐊᒐᖏᑦ ᓂᐅᕕᐊᒃᓴᖑᖅᑎᑕᐅᓇᓱᒃᑎᓪᓗᒋᑦ ᓴᖅᑭᑕᐅᕙᓪᓕᐊᓇᓱᒃᑎᓪᓗᒋᓗ. ᑕᒪᓐᓇ ᐊᑐᕐᓗᒍᒃ ᑮᓇᐅᔭᓕᐅᕈᑎᒃᓴᒃᑲᓐᓂᕐᓂᒃ ᓴᖅᑭᑦᑐᖃᕐᓂᐊᕋᓱᒋᔭᐅᔪᖅ ᓂᐅᕈᑎᖃᕐᓂᖅᓴᐅᓕᖅᑎᓪᓗᒋᑦ, ᓇᖕᒥᓂᖃᕐᓂᕐᒧᑦ ᑮᓇᐅᔭᓕᐅᕈᓐᓇᖅᓯᑎᓪᓗᒋᑦ, ᐃᓄᐃᑦ ᓴᓇᖑᐊᕐᑎᑦ ᓴᓇᖑᐊᒐᓕᐅᖁᔭᐅᖃᑦᑕᖅᑎᓪᓗᒋᑦ ᓂᐅᕕᖅᑕᐅᔪᒪᔪᓂᒃ, ᐅᑭᐅᖅᑕᖅᑐᒥᐅᑦ ᓴᓇᖑᐊᖅᑎᑦ ᐊᑐᐃᓐᓇᐅᓂᖅᓴᐅᓕᖅᑎᓪᓗᒋᑦ ᐱᖅᑯᓯᑐᖃᕐᓂᒃ ᐊᑐᖅᓱᑎᒃ ᑮᓇᐅᔭᓕᐅᕈᑎᖃᖅᑐᓄᑦ, ᐊᒻᒪᓗ ᖃᐅᔨᒪᔭᐅᓂᖅᓴᐅᓕᖅᑎᓪᓗᒋᑦ ᐃᓄᖕᓄᑦ ᓴᓇᖑᐊᖅᑕᐅᕙᒃᑐᑦ ᓴᓇᖑᐊᖅᑎᖏᓪᓗ ᑲᓇᑕᒥᐅᓄᑦ ᐊᓯᖏᓄᓪᓗ. ᒐᕙᒪᑐᖃᒃᑯᑦ ᑮᓇᐅᔭᒥᒃ ᐊᑐᖅᑎᓪᓗᒋᑦ ᑕᒪᑐᒧᖓ ᐃᓄᐃᑦ ᓴᓇᖑᐊᖅᑎᖏᑦ ᑮᓇᐅᔭᓕᐅᕈᑎᒃᓴᖃᕐᓂᖅᓴᐅᓂᐊᖅᑐᑦ ᐃᓅᓯᖃᑦᑎᐊᕐᓂᖅᓴᐅᓪᓗᑎᒡᓗ ᐊᒻᒪᓗ ᐅᖓᓯᒃᑐᒨᖓᔪᒥᒃ ᑕᑯᓪᓗᓂᒃ ᓄᓇᓖᑦ ᓴᖏᒡᓕᕚᓪᓕᕐᓂᐊᖅᑐᑦ ᒪᑭᒪᔾᔪᑎᒃᓴᐃᓪᓗ ᐊᒻᒪᓗ ᓄᓇᖃᖅᑳᖅᓯᒪᔪᑦ ᓇᖕᒥᓂᖅ ᐊᐅᓚᑦᑎᔪᓐᓇᕐᓗᑎᒃ ᐱᓗᐊᖅᑐᒥ ᐱᖁᓯᑐᖃᕐᓂᒃ ᐊᑐᕐᓱᑎ ᑮᓇᐅᔭᓕᐅᕈᑎᒋᔭᐅᔪᓐᓇᖅᑐᑦ ᓴᓇᖑᐊᒐᓕᐅᕐᓂᕐᓗ ᐱᓪᓗᒋᑦ.

2.3   ᐊᑐᒐᒃᓴᓕᐊᖑᓯᒪᔪᑦ ᑲᒪᒋᔭᐅᓂᖏᑦ, ᐱᒻᒪᕆᐅᔪᑦ ᐃᓚᐅᓂᖃᕆᐊᖃᖅᑐᑦ ᐊᒻᒪᓗ ᐃᖃᔪᖅᑕᐅᓇᓱᒃᑐᑦ

ᐊᑐᒐᒃᓴᓕᐊᖑᓯᒪᔪᑦ ᑲᒪᒋᔭᐅᓂᖏᑦ ᐱᓕᕆᕝᕕᖓᓂ ᑖᑯᓄᖓ ᐊᓪᓚᐃᑦ ᐃᓄᐃᓪᓗ ᓴᓇᖑᐊᒐᓕᐅᕐᕕᖓᓄᑦ ᐱᓕᕆᐊᕆᔭᐅᓲᑦ, ᐃᓚᒋᔭᐅᔪᖅ ᒥᓂᔅᑕᐅᑉ ᑐᖏᓕᐊᑕ ᐊᓪᓚᒡᕕᖓᓂ ᑮᓇᐅᔭᓕᕆᓂᕐᒧᑦ ᐱᓕᕆᐊᕆᔭᐅᓯᒪᔪᓂᑦ. ᑕᒪᓐᓇ ᑮᓇᐅᔭᖅ ᑐᓂᔭᐅᓯᒪᖃᑦᑕᖅᑐᖅ ᐃᑲᔪᖅᑕᐅᓯᒪᓂᐊᖁᓪᓗᒋᑦ ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎ ᑮᓇᐅᔭᖅᓯᐅᖅᑎᓪᓗᒋᑦ ᐊᕐᕌᒍᑕᒫᖅᓯᐅᑎᓂᒃ ᐊᑐᒐᒃᓴᓕᐊᖑᓯᒪᔪᑦ ᐊᓯᖏᓪᓗ ᐱᓕᕆᐊᕆᔭᐅᓯᒪᔪᑦ ᐊᑐᖅᑕᐅᔪᓐᓇᖁᓪᓗᒋᑦᔭ ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎᓄᑦ ᑲᒪᒋᔭᐅᓪᓗᓂᒃ ᐊᑐᒐᒃᓴᓕᐊᖑᓯᒪᔪᒥ ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎ ᓂᐅᕈᑎᖃᕐᓂᕐᒥᒃ ᐊᒻᒪᓗ ᐱᓕᒪᒃᓴᐃᓂᕐᒥᒃ ᐱᓕᕆᐊᖃᓗᐊᓲᑦ ᐊᒻᒪᓗ ᑮᓇᐅᔭᓕᐅᕈᑎᒃᓴᓂᒃ ᕿᓂᓲᖑᓪᓗᑎᒃ. ᐃᓚᒋᖃᓯᐅᑎᓗᒋᑦ ᒐᕙᒪᑐᖃᒃᑯᑦ ᐊᒻᒪᓗ ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎ, ᐃᓚᐅᓂᖃᕐᒥᔪᑦ ᓴᓇᖑᐊᒐᓕᕆᔩᑦ, ᓂᐅᕈᑎᖃᓲᑦ, ᓴᓇᖑᐊᒐᓂ ᑕᑯᔭᒐᖃᕐᕖᑦ, ᓄᐊᑦᑎᔩᑦ, ᐃᓕᓐᓂᐊᖅᑎᑦᑎᔩᑦ ᐊᒻᒪᓗ ᓴᓇᖑᐊᕐᑏᑦ.

2.4   ᐊᑐᒐᒃᓴᓕᐊᖑᓯᒪᔪᓄᑦ  ᑮᓇᐅᔭᐃᑦ

ᐃᓄᐃᑦ ᓴᓇᖑᐊᕐᑎᓄᑦ ᐃᑲᔪᕐᑎ ᐃᑲᔪᖅᑕᐅᓯᒪᖕᒥᔪᑦ Cᑮᓇᐅᔭᖅᑖᖃᑦᑕᖅᓱᑎ ᐃᓄᐃᑦ ᓴᓇᖑᐊᕐᑏᑦ ᐃᑲᔪᖅᑕᐅᓂᖏᓐᓄᑦ ᓄᓇᑦᑎᐊᕐᒥ, ᓄᓇᕗᒻᒥ, ᓄᓇᕕᒻᒥ ᐊᒻᒪᓗ ᓚᐸᑐᐊᕆᒥ ᐊᔪᕈᓃᖅᓴᕈᓐᓇᖁᓪᓗᒋᑦ ᐊᒻᒪᓗ ᓂᐅᕈᑎᖃᕐᓂᕐᒧᑦ. ᑕᒪᓐᓇ ᐊᑐᖅᑕᐅᓪᓗᓂᒃ, ᐋᖅᑭᒃᑕᐅᒃᑲᓐᓂᕆᐊᖃᖅᓱᓂ ᐊᕐᕌᒍᒧᑦ 2012-2013ᒧ, ᐃᓄᓕᕆᔨᑐᖃᒃᑯᑦ ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎᓂ ᑮᓇᐅᔭᖃᖅᑎᑦᑎᓲᑦ  $458,000 ᑖᓚᓂ ᐊᕐᕌᒍᑕᒫᑦ, ᑮᓇᐅᔭᖅᑖᕆᕙᒃᑕᖏᑦ ᐊᑐᖅᐸᒃᑕᖏᓪᓗ ᐊᐅᓚᓂᕐᒧᑦ ᑲᑎᓪᓗᒋᑦ 42% ᑕᒡᕙᖓᑦ ᐃᓄᓕᕆᔨᑐᖃᒃᑯᓐᓃᖔᖅᑐᖅ. ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎ ᑮᓇᐅᔭᒥᒃ 1ᒥᓕᔭᓐ ᑖᓚᓂᒃ ᐊᑐᖅᐸᒃᑐᑦ ᐊᕐᕌᒍᑕᒫᑦ. 2008ᒥ, ᐃᑲᔪᕐᑎ ᐊᑕᐅᓯᐊᖅᑕᐅᓪᓗᑎᒃ ᑮᓇᐅᔭᖅᑖᖅᑎᑕᐅᓚᐅᕐᒥᔪᑦ  $274,437 ᑖᓚᓂ ᖃᕆᓴᐅᔭᒃᑯᑦ ᓴᓇᖑᐊᒐᓂ ᑕᑯᒃᓴᐅᑎᑦᑎᖃᑦᑕᕈᒪᑎᓪᓗᒋᑦ .

2.5   ᑭᖑᓂᐊᓂ ᑐᑭᓯᓂᐊᕐᓂᕐᒧᑦ ᐱᓕᕆᐊᕆᔭᐅᓚᐅᖅᑐᑦ

ᑭᖑᓕᖅᐹᒥ ᐃᓄᐃᑦ ᓴᓇᖑᐊᕐᑎᓄᑦ ᐃᑲᔪᕐᑎ ᑐᑭᓯᓂᐊᖅᑕᐅᓯᒪᓂᖓ ᓴᖅᑭᑕᐅᓚᐅᖅᓯᒪᔪᖅ 2001ᒥ ᐊᕐᕌᒍᓂ ᖁᓖᖕᓂᒃ ᖃᐅᔨᓴᖅᓱᑎᒃ 1999ᒥ ᐃᓱᓕᑦᑐᒥᒃ. ᑐᑭᓯᓇᓱᓚᐅᖅᑐᑦ ᖃᓄᑎᒋᑦ ᐋᖅᑭᐅᒪᑎᐊᕐᒪᖔᑦ ᐃᑲᔪᕐᑎ ᑐᕐᕌᕈᑎᖏᑦ ᑎᑭᐅᑕᐅᓇᓱᒃᑎᓪᓗᑎᒃ ; ᐃᓄᖕᓂᒃ ᓴᓇᖑᐊᕐᑎᓂ ᐃᑲᔪᕋᓱᒃᑎᓪᓗᒋᑦ ᐊᒻᒪᓗ ᐊᑐᒐᒃᓴᓕᐊᖑᓯᒪᔪᑦ ᓈᒻᒪᒋᔭᐅᒻᒪᖔᑕ; ᑮᓇᐅᔭᓂ ᐊᑐᑦᑎᐊᕐᒪᖔᑕ, ᑮᓇᐅᔭᓂ ᐅᑎᖅᑎᕕᐅᒻᒪᖔᑕ ᐊᒻᒪᓗ ᑮᓇᐅᔭᓕᐅᖅᑎᒋᒪᖔᑕ; ᐊᒻᒪᓗ ᐊᓯᐊᓂᖔᖅᓯᒪᔪᓂᒃ ᑮᓇᐅᔭᕐᑖᖃᑦᑕᖅᓯᒪᖕᒪᖔᑕ.

ᑐᑭᓯᓂᐊᖅᑕᐅᓂᖓ ᑕᑯᓪᓗᒍᒃ ᖃᐅᔨᓇᓚᐅᖅᑐᖅ ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎ ᑕᑯᒃᓴᐅᑎᑦᑎᓂᖅᓴᐅᒋᐊᖃᖅᑐᑦ ᑐᑭᓯᓇᑦᑎᐊᖅᑐᒥᒃ ᑕᐅᑐᓐᖑᐊᖅᑕᐅᓯᒪᔪᒥᒃ ᐊᒻᒪᓗ ᑕᑯᒃᓴᐅᓂᖅᓴᐅᔭᕆᐊᖃᖅᓱᑎ ᐅᑭᐅᖅᑕᖅᑐᒥ ᐅᑭᐅᖅᑕᖅᑐᒥᐅᓂᒡᓗ ᑐᓴᐅᒪᑎᑦᑎᑲᓐᓂᕆᐊᖃᖅᑐᑦ. ᖃᐅᔨᓚᐅᕐᒥᔪᑦ ᑖᓐᓇ ᐅᖃᓕᒫᒐᓕᐅᖅᑕᐅᓲ Inuit Art Quarterly ᖑᓂᕋᖅᑕᐅᔪᖅ ᐊᑑᑎᖃᑦᑎᐊᖅᑐᖅ ᓂᐅᕈᑎᖃᕋᓱᐊᕐᓂᕐᒧᑦ ᐃᓄᐃᓪᓗ ᓴᓇᖑᐊᖅᑕᖏᓐᓂᒃ ᑕᑯᒃᓴᐅᑎᑦᑎᒃᑲᓐᓂᖅᓱᓂ ᑲᓇᑕᒥ ᓯᓚᑖᓂᓗ, ᑕᐃᒪᐃᑎᓪᓗᒍᒃ, ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎ ᑮᓇᐅᔭᓕᐅᕈᑎᒋᔭᐅᔪᓐᓇᖅᑐᓂᒃ ᓇᓂᓯᓯᒪᒐᓗᐊᖅᑎᓪᓗᒋᑦ ᐊᑐᖅᓱᒍᒃ ᑖᓐᓇ ᐅᖃᓕᒫᒐᓕᐅᖅᑕᐅᓲ ᐊᒻᒪᓗ ᓴᓇᖑᐊᒐᓂᒃ ᓂᐅᕕᐊᒃᓴᖃᓲᖑᓪᓗᑎ, ᐃᑲᔪᕐᑎ ᖃᐅᔨᓴᒃᑲᓐᓂᕆᐊᖃᖅᑐᑦ ᖃᓄᐃᓕᐅᒃᑲᓐᓂᕈᓐᓇᕐᒪᖔᑕ ᓂᑭᓪᓗ ᐊᓯᐊᓃᖔᖅᑐᓂᒃ ᓇᖕᒥᓂᖃᖅᑐᓂ ᑮᓇᐅᔭᖅᑖᒃᑲᓐᓂᕈᓐᓇᕐᒪᖔᑕ.

3.    ᑐᑭᓯᓂᐊᖅᑕᐅᓂᖏᓐᓂ ᐱᐅᓯᕆᔭᐅᓚᐅᖅᑐᑦ

3.1   ᑐᑭᓯᐊᓂᐊᖅᑕᐅᓯᒪᔪᑦ ᐊᖏᓂᖏᑦ ᐊᒻᒪᓗ ᐃᓱᒫᓘᑕᐅᔪᑦ

ᑐᑭᓯᓂᐊᕐᓂᕐᒧᑦ ᐊᐱᖅᑯᑏᑦ ᑕᕝᕙᓂ ᑎᓕᔭᐅᓯᒪᓂᕐᒧᑦ ᒪᓕᒐᖏᓐᓂᑦ ᓯᕗᓪᓕᖅᐹᕐᓯᐅᑕᐅᔪᑦ ᐋᖅᑭᒋᐊᖅᑕᐅᑐᐃᓐᓇᕆᐊᖃᖅᑐᑦ ᑕᒪᓐᓇ ᐱᓕᕆᐊᕆᔭᐅᓂᖓ ᓄᑦ ᐅᓂᒃᑳᓕᐅᖅᑕᐅᓯᒪᓂᐊᖅᑐᖅ ᐋᖅᑭᑦᓱᖅᑕᐅᕙᓪᓕᐊᑎᓪᓗᒍᒃ. ᑐᑭᓯᓂᐊᖅᑕᐅᓂᖓᓂ ᖃᐅᔨᓴᖅᑕᐅᓯᒪᓂᐊᖅᑐᑦ ᐊᑐᒐᒃᓴᓕᐊᖑᓯᒪᔪᑦ ᐱᓕᕆᐊᕆᔭᐅᓯᒪᓚᐅᖅᑐᑦ 2006−ᒥ 2010−ᒧᑦ ᑎᑭᐅᑎᓪᓗᒍᒃ ᐊᒻᒪᓗ ᐅᑯᓂᖓ ᓇᓗᓇᐃᔭᐃᔪᑦ:

• ᐊᑑᑎᖃᖅᑎᒋᓂᖓ
  • ᖃᓄᑎᒋᑦ ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎᓄᑦ ᐱᔭᕆᐊᓖᑦ ᑕᒫᓃᖏᓐᓇᖅᑐᑦ ᐱᑎᑕᐅᕙᑦ? ᐱᑎᑕᐅᒃᐸᑕ, ᖃᓄᑎᒋᑦ ᐱᑎᑕᐅᕙᑦ?
    
    
  • ᖃᓄᑎᒋᑦ ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎ ᐱᕆᓕᐊᕆᓯᒪᔭᖏᑦ ᑐᕐᕌᕈᑎᖏᓪᓗ ᒪᓕᒃᓯᒪᕙᑦ ᐃᓄᓕᕆᔨᑐᖃᒃᑯᑦ ᐊᒻᒪᓗ ᒐᕙᒪᑐᖃᒃᑯᑦ ᓯᕗᓪᓕᐅᑎᓯᒪᔭᖏᓐᓂᒃ?
    
    
  • ᖃᓄᑎᒋ ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎ ᓴᖅᑭᑦᑎᖃᑦᑕᖅᑕᖏᑦ/ᐊᑐᐊᒐᖏᓪᓗ ᐋᕿᒃᑕᐅᓯᒪᓂᖏᑦ ᒪᓕᒃᓯᒪᑎᒋᕙᑦ ᐃᓄᓕᕆᔨᑐᖃᒃᑯᑦ ᐊᑐᖁᔭᖏᓐᓂᒃ ᑐᕐᕌᕈᑎᖏᓂᒡᓗ?
    
    
• ᐋᖅᑭᒃᓱᖅᓯᒪᓂᖓ ᐊᑐᓕᖅᑎᑕᐅᓂᖓᓗ
  • ᐃᑲᔪᕐᑎ ᐊᒻᒪᓗ ᒐᕙᒪᑐᖃᒃᑯᑦ ᓂᕆᐅᒋᔭᖏᑦ, ᐊᑐᕆᐊᖃᖅᑕᖏᑦ ᑲᒪᒋᔭᕆᐊᖃᖅᑕᖏᓪᓗ ᑐᑭᓯᓇᖅᐹᑦ?
    
     
• ᐋᕿᐅᒪᑦᑎᐊᕐᓂᖏᑦ (ᐊᑑᑎᖃᕐᓂᖓᐊᐅᓚᓂᖓ)
  • ᐃᑲᔪᕐᑎ ᓇᓗᓇᐃᕐᓯᓯᒪᑎᐊᖅᐹᑦ ᑐᕐᕌᕈᑎᖏᓂᒃ, ᐱᓕᕆᐊᒃᓴᖏᓐᓂᒃ, ᐱᑎᓇᓱᒃᑕᖏᓐᓂᒃ ᐊᒪᓗ ᓴᖅᑭᑎᓇᓱᒃᑕᖏᓐᓂᒃ (ᑕᒪᐃᓐᓄᑦ ᓈᒻᒪᒋᔭᐅᓯᒪᔪᓂᒃ)?
    
    
  • ᖃᓄᑎᒋᑦ ᐃᑲᔪᕐᑎ ᓂᕆᐅᒋᓚᐅᖅᑕᖏᑦ ᑐᕌᕈᑎᖏᓐᓂ ᑎᑭᐅᑕᐅᓂᐊᕋᓱᒋᔭᐅᓚᐅᖅᑐᑦ ᑎᑭᐅᑕᐅᕚᑦ (ᓲᕐᓗ, ᐱᔪᓐᓇᕐᓂᑖᕐᓂᕐᒧᑦ ᐊᐅᓚᑦᑎᔨᐅᔪᓐᓇᕐᓂᕐᒥᒃ, ᐃᓄᐃᑦ ᓴᓇᖑᐊᒐᖏᑦ ᖃᐅᔨᒪᔭᐅᕝᕚᓪᓕᖅᑎᑕᐅᓂᖏᓐᓄᑦ, ᐃᓅᓯᖏᓐᓂ ᒪᑭᒪᔾᔪᑎᓴᖏᒍᓪᓗ ᐃᑲᔪᖅᑕᐅᕝᕙᓪᓕᖅᓯᒪᕙ ᓴᓇᖑᐊᕐᑎ ᐅᑭᐅᖅᑕᖅᑑᑉ ᓄᓇᓕᖏᓪᓗ)?
    
     
  • ᖃᓄᑎᒋᑦ ᐃᑲᔪᕐᑎ ᑐᕐᕌᕐᕕᒋᓇᓱᒃᑕᖏᓐᓂᒃ ᐃᑲᔪᖅᓯᒪᕙᑦ?
    
    
  • ᖃᓄᑎᒋᑦ ᐃᑲᔪᕐᑎ ᐊᑐᒐᒃᓴᓕᐊᖑᓯᒪᓂᖏᓐᓄᑦ ᐃᓄᐃᑦ ᓴᓇᖑᐊᕐᑎ ᐃᑲᔪᖅᑕᐅᓯᒪᓕᖅᐸᑦ ᓴᓇᖑᐊᒐᓕᐅᕐᓂᕐᒥᓘᓐᓂᑦ ᑮᓇᐅᔭᓕᐅᕈᑎᖃᕈᓐᓇᖅᓯᕙᑦ?
    
    
• ᐋᕿᐅᒪᑦᑎᐊᕐᓂᖏᑦ (ᐋᕿᐅᒪᑦᑎᐊᕐᓂᖏᑦᑮᓇᐅᔭᓂ ᐊᑐᑦᑎᐊᕐᓂᖏᑦ)
  • ᑕᒪᒃᑯᐊ ᐃᑲᔪᕐᑎ ᐱᓕᕆᐊᕆᔭᖏᑦ ᐋᖅᑭᒃᓯᒪᕙᑦ ᐊᒃᑐᐃᓂᖃᕐᓂᐊᖁᓪᓗᒋᑦ ᐊᓯᖏᓐᓂᒃ  ᒐᕙᒪᒃᑯᑦ ᐱᓕᕆᕝᕕᖏᓐᓄᑦ ᑎᒥᖁᑎᖏᓐᓄᓪᓗ ᐱᓕᕆᐊᕆᔭᐅᓯᒪᔪᓂᒃ? ᖃᓄᐃᓕᐅᒃᑲᓐᓂᕈᓐᓇᖅᐸᑦ ᑕᒪᒃᑯᐊ ᐱᓕᕆᐊᕆᔭᐅᓯᒪᔪᑦ ᐊᒃᑐᐃᓂᖃᕐᓂᖅᓴᐅᖁᓪᓗᒋᑦ? 
    
    
  • ᖃᓄᐃᓕᐅᕐᕕᒃᓴᖃᒃᑲᓐᓂᖅᐹᑦ ᑮᓇᐅᔭᒥᒃ ᐊᑐᖏᓐᓂᖅᓴᐅᓂᐊᖁᓪᓗᒋᑦ/ᐊᑑᑎᖃᕐᓂᖅᓴᐅᓂᐊᖁᓪᓗᒋᓪᓗ ᐱᓕᕆᐊᕆᔭᐅᔪᑦ ᐱᓕᕆᕝᕕᖕᓂᒃ ᐱᓕᕆᖃᑎᖃᕐᓂᖅᓴᐅᓪᓗᑎᒃ ᐊᒻᒪᓗ ᐅᕝᕙᓘᓐᓃᑦ ᐊᒃᑐᐃᓂᖅᓴᐅᑎᓪᓗᒋᑦ ᐅᐸᓗᖓᐃᔭᐅᑎᖏᑦ?
    
    
  • ᖃᓄᑎᒋ ᐊᑑᑎᖃᖅᑎᒋᕙᑦ ᐃᑲᔪᕐᑎᓄᑦ ᐱᓕᕆᐊᕆᔭᐅᓯᒪᔪᑦ ᑮᓇᐅᔭᓂ ᐊᑐᑦᑐᓴᓂᒃ ᕿᓂᖅᑎᓪᓗᒋᑦ ᐊᒻᒪᓗ ᑮᓇᐅᔭᓕᐅᒃᑲᓐᓂᕋᓱᒃᑎᓪᓗᒋᑦ ᐱᓕᕆᖃᑎᖃᖅᓱᒃᑎᓪᓗᒋᓪᓗ? ᖃᓄᑎᒋᑦ ᓇᖕᒥᓂᖅ ᐊᐅᓚᑦᑎᔪᓐᓇᖅᐸᑦ?
    
    
  • ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎ ᓈᒻᒪᒋᔭᐅᕙ ᐃᑲᔪᖅᑎᐅᓪᓗᑎ ᐃᓄᖕᓂ ᓴᓇᖑᐊᖅᑎᓂ ? ᑕᐃᒪᓐᓇ ᐋᖅᑭᒃᓱᖅᓯᒪᓂᖃᖅᑎᓪᓗᒍᒃ ᐊᑑᑎᖃᕐᓂᖅᓴᐅᕚᑦ?
    
    
  • ᓇᐅᒃᑯᓪᓕ ᐱᓕᕆᖃᑎᒌᖃᑦᑕᖅᐸᑦ/ᐊᔾᔨᒌᓂᒃ ᐊᑐᖃᑦᑕᖅᐸᑦ, ᐊᔾᔨᒌᓂᒡᓗ ᐱᓕᕆᐊᖃᖅᐸᑦ ᐃᓄᐃᑦ ᓴᓇᖑᐊᕐᑎᓄᑦ ᐃᑲᔪᕐᑎᓄ ᐊᑐᒐᒃᓴᓕᐊᖑᓯᒪᔪᑦ ᐊᓯᖏᓪᓗ ᒐᕙᒪᑐᖃᒃᑯᓐᓂᑦ ᐊᕕᒃᑐᖅᓯᒪᔪᓪ ᒐᕙᒪᒃᑯᖏᓐᓂᑦ ᑲᑐᔾᔨᖃᑎᒌᒃᑯᓐᓂᓗ ᐊᑐᒐᒃᓴᓕᐊᖑᓯᒪᔪᑦ? 
    
    
• ᑐᑭᓯᓂᐊᖅᑕᐅᔭᕆᐊᖃᒥᔪᑦ
  • ᖃᓄᐃᑐᕚᑦ ᐱᐅᓂᖅᐹᑦ ᐊᑐᖅᑕᐅᔪᓐᓇᖅᑐᑦ ᐊᐅᓚᑕᐅᓂᖏᓐᓄᑦ ᐊᑐᒐᒃᓴᓕᐊᖑᓯᒪᔪᑦ ᐱᖅᑯᓯᑐᖃᕐᓂᒃ ᐊᑐᖅᓱᑎ ᓴᓇᖑᐊᒐᓕᐅᕐᓂᕐᒧᑦ?
    
    
  • ᐊᓯᐊᓃᖔᖅᓯᒪᔪᓂᒃ ᑮᓇᐅᔭᖅᑖᕈᓐᓇᕆᕚᑦ?

3. 2    ᑐᑭᓯᓂᐊᖅᑕᐅᓂᖏᓐᓂ ᐱᐅᓯᕆᔭᐅᓚᐅᖅᑐᑦ

3.2.1   ᑎᑎᕋᖅᓯᒪᔪᑦ ᖃᐅᔨᓴᖅᑕᐅᓂᑯᐃᑦ

ᒪᓕᖃᓯᐅᑎᓗᒋᑦ ᐋᖅᑭᒋᐊᖅᑕᐅᒃᑲᓐᓂᖅᓯᒪᓂᐊᖅᑐᑦ ᑐᑭᓯᓂᐊᖅᑕᐅᓂᖏᓐᓂᑦ ᐱᐅᓯᕆᔭᐅᓚᐅᖅᑐᑦ ᐸᕐᓇᒍᑕᐅᓯᒪᓂᖓᓂᓪᓗ, ᑐᑭᓯᓂᐊᖅᑕᐅᓯᒪᓂᖓ ᐊᑐᕐᓗᒍᒃ ᓇᓗᓇᐃᖅᑕᐅᓯᒪᓂᐊᖅᑐᑦ ᖃᐅᔨᔭᐅᔪᓯᒪᔪᑦ ᑕᒪᒃᑯᐊ ᖃᐅᔨᓴᖅᑕᐅᕌᓂᒃᓯᒪᑎᓪᓗᒋᑦ ᑕᒪᕐᒦᒃ ᐃᓱᒪᒋᔭᐅᖃᓯᐅᑎᓪᓗᑎᒃ:

• ᐅᓂᑳᓂᒃ ᖃᐅᔨᓴᕐᓂᖅ: ᓯᕗᓪᓕᖅᐹᒥ ᐅᓂᒃᑳᓕᐊᖑᓯᒪᔪᓂᑦ ᕿᒥᕐᕈᓚᐅᖅᑐᑦ ᐊᕐᕌᓂ ᖃᐅᔨᓴᖅᑕᐅᓪᓗᓂᒃ ᐱᖁᓯᑐᖃᓕᕆᓂᕐᒧᑦ ᐊᑐᐊᒐᖏᑦ ᐊᒻᒪᓗ ᑮᓇᐅᔭᑦ ᐊᑐᖅᑐᒃᓴᑦ ᓴᓇᐅᒐᓕᕆᓂᕐᒧᑦ; ᐊᑐᖅᑕᐅᔪᑦ ᓴᓇᖑᐊᕐᓂᐅᑉ ᐊᐅᓚᓂᖓᓐᓂᒃ ᖃᐅᔨᓴᕐᓂᕐᒧᑦ; ᓴᓇᐅᒐᓚᓕᕆᓂᖅ ᓄᓇᓕᖕᓂᓗ ᒪᑭᒪᔾᔪᑎᒃᓴᕆᔭᐅᓂᖓᓄᑦ ᐊᒃᑐᐃᓂᓖᑦ; ᐊᒻᒪᓗ ᐃᑲᔫᓯᐊᑦ ᐊᑐᖅᑕᐅᔪᓐᓇᖅᑐᑦ ᓄᓇᖃᖄᖅᓯᒪᔪᓄᑦ ᓴᓇᐅᒐᓕᐅᓲᓄᑦ. ᑕᒪᒃᑯᐊ ᖃᐅᔨᔭᐅᓂᑯᐃᑦ ᐃᓚᒋᐊᖅᑕᐅᓯᒪᓂᐊᕐᒥᔪᑦ ᐊᓯᖏᓐᓄᑦ ᖃᐅᔨᓴᕐᓂᐅᔪᓄᑦ ᐱᔭᕆᐊᖃᖅᑎᓪᓗᒍᒃ.
  
  
• ᑎᑎᖅᑲᓂᒃ ᓄᐊᑕᐅᔪᓂᒡᓗ/ᑲᑎᖅᓱᖅᑕᐅᓯᒪᔪᓂᒡᓗ ᖃᐅᔨᓴᕐᓂᖅ:ᖃᐅᔨᓴᖅᑕᐅᓪᓗᓂᒃ ᑮᓇᐅᔭᓕᕆᓂᖅ, ᐸᕐᓇᐃᓂᖅ, ᐱᑦᑎᐊᕐᓂᖓᓂᒃ ᖃᐅᔨᓴᕐᓂᕐᒧᑦ ᐊᑐᖅᑕᐅᔪᓂᒃ, ᐅᓂᒃᑳᓕᐅᕐᓂᖅ ᐊᓯᖏᓪᓗ ᑎᑎᕋᖅᑕᐅᓯᒪᔪᑦ ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎ ᐊᐅᓚᑕᐅᓂᖏᓐᓄᑦ ᐊᑐᒐᒃᓴᓕᐊᖑᓯᒪᔪᓄᓪᓗ ᐊᑐᖅᑕᐅᔪ; ᐆᒃᑑᑎᒋᓗᒋ ᒐᕙᒪᑐᖃᑯᑦ ᑮᓇᐅᔭᓕᕆᔨᒃᑯᑦ ᑲᑎᒪᔨᕐᔪᐊᒃᑯᖏᓐᓄᑦ ᑐᓂᔭᐅᓯᒪᔪᑦ, ᐊᑐᒐᒃᓴᓕᐊᖑᓯᒪᔪᓄᑦ ᐊᑐᐊᒐᖏᓐᓄᓪᓗ ᑎᑎᕋᖅᑕᐅᓯᒪᔪᑦ,ᐊᓯᖏᑦ ᑐᑭᓯᓂᐊᖅᑕᐅᓯᒪᔪᑦ, ᖃᐅᔨᓴᕐᓃᑦ,  ᑮᓇᐅᔭᐃᓪᓗ ᐊᑐᖅᑕᐅᓂᖏᑦ ᖃᐅᔨᓴᖅᑕᐅᓯᒪᔪᑦ, ᐊᒻᒪᓗ ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎ ᐅᓂᒃᑳᓕᐅᖅᓯᒪᔭᖏᑦ ᓲᕐᓗ Inuit Art Quarterly ᐅᖃᓕᒫᒐᓕᐅᖅᑕᐅᓯᒪᓂᖓ ᐆᒃᑑᑎᒋᓗᒍᒃ ᐊᓯᖏᓪᓗ ᐃᑲᔪᕐᑎ ᖃᐅᔨᓴᖅᓯᒪᔭᖏᑦ ᑐᑭᓯᓂᐊᖅᑕᐅᓯᒪᔪᓪᓗ ᐊᑐᒐᒃᓴᓕᐊᖏᑦ ᐱᓕᕆᐊᕆᔭᐅᓯᒪᔪᓪᓗ.
  
  
• ᖃᐅᔨᓴᖅᑕᐅᓂᑯᓂᒃ ᓄᐊᑦᓯᓂᖅ/ᑲᑎᖅᓱᐃᓂᖅ ᖃᐅᔨᓴᕐᓂᕐᓗ: ᓯᕗᓪᓕᖅᐹᖅᓯᐅᑎᒥ ᖃᐅᔨᔭᐅᓂᑯᓂ ᑎᑎᖃᓂᒡᓗ ᖃᐅᔨᓴᕐᓂᖅ ᖃᐅᔨᒪᔪᓂᑦ ᑐᓴᓚᐅᕐᓱᑎᒃ ᐊᒻᒪᓗ ᐊᑐᒐᒃᓴᓕᐊᖑᓯᒪᔪᑦ ᑎᑎᖅᑲᖏᑦ ᖃᐅᔨᓴᖅᑕᐅᓚᐅᕐᓱᑎ (RMAF, ᖃᐅᔨᔭᐅᓂᑯᓂ ᓄᐊᑦᑎᓂᖅ, ᐊᓯᖏᓐᓂᒡᓗ) ᖃᐅᔨᓇᓱᖕᓂᐊᖅᑐᑦ ᖃᓄᑎᒋᑦ ᑕᒪᒃᑯᐊ ᖃᐅᔨᔭᐅᓂᑯᐃᑦ ᐊᑐᖅᑕᐅᔪᓐᓇᕐᒪᖔᑕ ᖃᐅᔨᓇᓱᐊᕐᓂᕐᒧᑦ ᐊᐅᓚᓂᖃᑦᑎᐊᕐᓂᖓᓂᒃ ᐊᒻᒪᓗ ᑐᕐᕌᕈᑎᒋᔭᐅᓚᐅᖅᑐᑦ ᑎᑭᐅᑎᔭᐅᓯᒪᓂᖏᓐᓂᒃ ᑕᑯᒃᓴᐅᑎᑦᑎᔪᓐᓇᕐᒪᖔᑕ. ᓯᕗᓪᓕᖅᐹᒥ ᑕᒪᓐᓇ ᖃᐅᔨᓴᕐᓂᖓᓄᑦ ᖃᐅᔨᔭᐅᓯᒪᓂᐊᖅᑐᑦ ᐃᓱᒪᒋᓪᓗᒋᑦ, ᖃᐅᔨᔭᐅᓂᒃᑯᓂ ᕿᓂᕐᓂᐊᕐᒥᔪᑦ ᓱᓕᓐᓂᖓᓂᒃ ᑕᑯᒃᓴᐅᑎᑦᑎᔪᓐᓇᖅᑐᓂᒃ. ᐊᑐᕆᐊᖃᕐᓂᕈᓂᒃ, ᐊᓯᐊᓃᖔᖅᑐᓂᒃ  ᑭᖑᕝᕕᖅᑕᐅᔪᓐᓇᖅᑐᓂᒃ ᖃᐅᔨᔭᐅᓂᑯᓂᒃ ᖃᐅᔨᓴᕐᓂᐊᕐᒥᔪᑦ.
  
  
• ᑐᑭᓯᒋᐊᕐᕕᒋᔭᐅᔪᓐᓇᖅᑐᑦ ᐊᐱᖅᓱᖅᑕᐅᓂᖏᑦ:  25−30−ᓂᒃ ᐃᓄᖕᓂᒃ ᐊᐱᖅᓱᕐᑕᐅᔪᖃᕐᓂᐊᖅᑐᖅ ᐅᑯᓂᖓ ᐱᓕᕆᕝᕕᓕᖕᓂᑦ:
  • ᐃᓄᓕᕆᔨᑐᖃᒃᑯᑦ ᑲᒪᔨᖏᑦ ᐃᓄᐃᑦ ᓴᓇᖑᐊᕐᑎᓄᑦ ᐃᑲᔪᕐᑎ ᐊᑐᒐᒃᓴᓕᐊᖑᓯᒪᔪᓂᒡᓗ ᐱᓕᕆᐊᖃᖅᐸᒃᑐᑦ ᐃᖅᑲᓇᐃᔭᖅᑎᖏᑦ (ᐊᓪᓚᕐᕕᖓᓐᓂ ᐊᕕᒃᑐᖅᓯᒪᔪᓪᓗ ᐊᓪᓚᕐᕕᖏᓐᓂᑦ)
    
    
  • ᐊᓯᖏᑦ ᒐᕙᒪᒃᑯᑦ ᐱᓕᕆᕝᕕᖏᑦ ᓴᓇᖑᐊᖅᑐᓕᕆᔨᒃᑯᓪᓘᓐᓃᑦ ᑲᑐᔾᔨᖃᑎᒌᖓᑕ ᐊᔾᔨᑲᓴᖏᓐᓂᒃ ᐱᓕᕆᐊᖃᖅᐸᒃᑐᑦ (ᓲᕐᓗ ᑲᓇᑕᒥ ᐃᑦᑕᕐᓂᓴᓕᕆᔨᕐᔪᐊᒃᑯᑦ, ᑲᓇᑕᒥ ᐱᕙᓪᓕᐊᔪᓕᕆᔨᑦᑯᑦ, ᑲᓇᑕᒥ ᐃᖅᑲᓇᐃᔭᖅᑐᓕᕆᔨᒃᑯᑦ ᐊᒻᒪᓗ ᑲᓇᑕᒥ ᓴᓇᐅᒐᓕᐅᖅᑎᒃᑯᑦ ᑲᑎᒪᔨᖏᑦ).
    
    
  • ᐊᓯᖏᑦ ᑲᑐᔾᔨᖃᑎᒌᒃᑯᑦ ᓴᓇᐅᒐᓕᕆᓂᕐᒧᑦ ᐱᖅᑯᓯᑐᖃᓕᕆᓂᕐᒥᓘᓐᓃᑦ ᐱᓕᕆᐊᖃᖅᐸᒃᑐᑦ (ᐆᒃᑑᑎᒋᓪᓗᒋᑦ ᐃᓄᐃᑦ ᑲᑐᔾᔨᖃᑎᒌᒃᑯᖏᑦ, ᑲᓇᑕᒥ ᓴᓇᖑᐊᕐᑐᓕᕆᔨᕐᔪᐊᒃᑯᑦ, ᑲᓇᑕᒥ ᓴᓇᖑᐊᒐᖃᕐᕕᒃ, ᑲᓇᑕᒥ ᑕᑯᔭᒐᖃᕐᕕᒃ).
    
    
  • ᐊᕕᒃᑐᖅᓯᒪᔪᑦ ᒐᕙᒪᒃᑯᑦ ᑭᒡᒐᖅᑐᐃᔨᖏᑦ ᐅᑭᐅᖅᑕᖅᑐᒥ(ᒐᕙᒪᒃᑯᑦ ᓄᓇᕗᒻᒥ, ᓄᓇᑦᑎᐊᕐᒥ ᑯᐸᒃᒥᓗ)
    
    
  • ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎ ᑲᑎᒪᔨᖏᑦ ᐃᖅᑲᓇᐃᔭᖅᑎᖏᓪᓗ
    
    
  • ᓴᓇᖑᐊᕐᓂᕐᒥᒃ ᐃᓕᓐᓂᐊᖅᑎᑦᑎᔩᑦ, ᖃᐅᔨᒪᔪᒻᒪᕇᑦ, ᑕᑯᔭᒐᖃᕐᕕᓖᑦ ᓂᐅᕕᐊᒃᓴᖃᖅᐸᒃᑐᓪᓗ ᐃᓄᐃᑦ ᓴᓇᖑᐊᖅᑎᓄ ᐃᑲᔪᕐᑎᓂᒃ ᐱᓕᕆᖃᑎᖃᓲᑦ ᐊᑐᒐᒃᓴᓕᐊᖑᓯᒪᓂᖏᑦ ᐃᓕᓐᓂᐊᖅᑎᑦᑎᓂᕐᒧᑦ ᐱᓕᕆᐊᕆᔭᐅᑎᓪᓗᒋᑦ.
    
    
  • ᐃᓄᐃᑦ ᓴᓇᖑᐊᕐᑎᖏᑦ (ᐊᑐᒐᒃᓴᓕᐊᖑᓯᒪᔪᓂᑦ ᐊᑐᓚᐅᖅᑐᑦ ᐊᑐᓚᐅᖏᑐᓪᓗ).
    
    
  • ᐃᓕᓐᓂᐊᕐᕖᑦ ᐃᑲᔪᕐᑎᓄ ᐊᑐᒐᒃᓴᓕᐊᖑᓯᒪᔪᓂᒃ ᐊᑐᓲᑦ, ᐊᔾᔨᑲᓴᖏᓐᓂᒡᓗ ᐃᓕᓐᓂᐊᕈᑎᒃᓴᓂᒃ ᐱᓕᒻᒪᒃᓴᐃᓂᕐᒧᑦ ᐊᑐᓲᑦ (ᐆᒃᑑᑎᒋᓗᒋᑦ ᑳᓪᑕᓐ ᓯᓚᑐᖅᓴᕐᕕᖓ, ᐋᑐᕚᒥ ᓴᓇᖑᐊᕐᑐᓕᕆᓂᕐᒧᑦ ᐃᓕᓐᓂᐊᕐᕕᖓ, ᐊᓪᒑᖕᑯᐃᓐ ᓯᓚᑐᖅᓴᕐᕕᖓ ᐊᒻᒪᓗ ᓄᓇᕗᑦ ᓯᓚᑐᖅᓴᕐᕕᖓ).
    
    
• ᖃᐅᔨᓴᖅᑐᖃᕈᓐᓇᕐᒪᖔᑦ ᑕᐃᒃᑯᐊ ᐃᓚᖏ ᐱᓕᕆᕝᕕᓖᑦ ᖁᓛᓂ ᓇᓗᓇᐃᖅᑕᐅᓯᒪᔪᑦ ᐃᓚᒋᔭᐅᓪᓗᑎᒃ ᐃᓱᒪᕐᓴᖅᓯᐅᕈᑕᐅᒃᑲᓐᓂᐊᕐᑐᖅ ᑐᑭᓯᓂᐊᖅᑕᐅᓂᖓᓄᑦ ᐱᐅᓯᕆᔭᐅᔪᒫᖅᑐᑦ ᓇᓗᓇᐃᖅᑕᐅᓕᖅᑎᓪᓗᒋᑦ ᐅᓂᒃᑳᓕᐅᖅᑕᐅᓯᒪᔪᒥᑦ.
  
  
• ᐊᑐᓂ ᖃᐅᔨᓴᖅᑕᐅᓂᖏᑦ ᓇᓕᒃᑭᑕᖅᑕᐅᓯᒪᓗᑎᒃ:ᑕᒪᓐᓇ ᐅᓂᑳᓕᐅᖅᑕᐅᓯᒪᑎᓪᓗᒍᒃ ᑐᑭᓯᓂᐊᖅᑕᐅᓂᖓᓄᑦ ᐱᐅᓯᕆᔭᐅᓛᖅᑐᑦ, ᐱᖓᓱᓂ ᓄᓇᓕᖕᓂᒃ (ᓇᓗᓇᐃᖅᑕᐅᔭᕆᐊᖃᖅᑐᑦ ᓱᓕ) ᓂᕈᐊᕈᓐᓇᖅᑐᑦ ᖃᐅᔨᓴᖅᑕᐅᓂᖓᓄᑦ ᖃᓄᑎᒋᑦ ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎᓄ ᐊᑐᒐᒃᓴᓕᐊᖑᓯᒪᔪᑦ ᐊᑑᑎᖃᖅᑎᒋᒪᖔᑕ. ᐊᔪᕐᓇᖏᒃᑯᓂᒃ, ᑲᑎᒪᔨᕋᓛᓂᒃ ᓴᓇᖑᐊᕐᑎᓂᒃ ᐋᕿᒃᓯᔪᓐᓇᕐᒥᔪᑦ ᑕᒪᑐᒥᖓ ᖃᐅᔨᓴᖃᑕᐅᔪᓐᓇᖁᓪᓗᒋᑦ. ᖃᐅᔨᓴᖅᑕᐅᓯᒪᓂᐊᕐᒥᔪᑦ ᐊᑐᒐᒃᓴᓕᐊᖑᓯᒪᔪᑦ ᓄᓇᓕᖏᓐᓂᑦ ᑲᑎᖃᑎᒋᔭᐅᑐᐃᓐᓇᕆᐊᖃᕐᓱᑎ ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎᓄ ᐊᑐᒐᒃᓴᓕᐊᖑᓯᒪᓂᖏᓐᓂᒃ ᐃᓚᐅᓂᖃᖅᑐᑦ ᐊᒻᒪᓗ ᐅᕝᕙᓘᓐᓃᑦ ᑭᒡᒐᖅᑐᐃᔨᓂᒃ ᐊᓯᐊᓂ ᑲᑐᔾᔨᖃᑎᒌᓃᖔᖅᓯᒪᔪᓂᒃ ᑕᒪᑯᓂᖓ ᐱᓕᕆᐊᖃᖃᑕᐅᕙᒃᑐᑦ.

3.2.2  ᐃᓱᒪᒋᔭᐅᖃᓯᐅᑎᒋᐊᖃᖅᑐᑦ, ᓴᓐᖏᓂᐅᔪᑦ ᐃᓱᖃᕐᓂᖏᓐᓂᓗ

ᓯᕗᓪᓕᖅᐹᖅᓯᐅᑎᓂᒃ ᐅᖃᖃᑎᒋᔭᐅᓯᒪᑎᓪᓗᒋᑦ ᐱᓕᕆᔨᖏᑦ  ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎ, ᐃᓄᓕᕆᔨᑐᖃᒃᑯᓪᓗ ᐃᖅᑲᓇᐃᔭᖅᑎᖏᑦ, ᐱᓕᕆᑦᑎᐊᖁᐃᔨᔪᑦ ᑎᑎᕋᖅᓯᒪᔪᑎᒍᑦ ᑕᑯᒃᓴᐅᑎᑦᑎᖃᑦᑕᖅᓱᑎ ᐱᕙᓪᓕᐊᓯᒪᓂᖏᓐᓂᒃ ᑐᕐᕌᕈᑎᖏᓐᓄᑦ ᑎᑭᐅᑎᓇᓱᒃᓱᑎ. ᑭᓯᐊᓂᓕ, ᖃᐅᔨᔭᐅᓂᑯᐃᑦ ᑕᑯᓐᓇᑦᑎᐊᓚᐅᕐᓗᒋᑦ ᑭᓯᐊᓂ ᖃᐅᔨᒪᓂᐊᖅᑐᒍᑦ ᖃᓄᐃᑦᑐᓂᒃ  ᐊᑐᕈᓐᓇᕐᓂᐊᕐᒪᖔᑕ ᑐᕐᕌᕈᑎᖏᓐᓂᒃ ᑎᑭᐅᑎᓯᒪᓕᕐᓂᖏᓐᓂᒃ ᑕᑯᒃᓴᐅᑎᑦᑎᓂᐊᖅᑐᓂᒃ.

ᐊᔾᔨᒌᖏᑦᑐᓂᒃ ᐊᑐᖅᑕᐅᖔᖃᑦᑕᖅᑐᓂᒃ ᖃᐅᔨᓴᕐᓱᓂ ᐃᑲᔪᕐᓂᖃᕈᓐᓇᕐᒥᔪᖅ ᐊᔪᕐᓇᕐᓚᑲᓗᐊᖅᑎᓪᓗᒍᒃ ᑐᑭᓯᓂᐊᖅᑕᐅᓂᖓᓂᑦ. ᐃᓄᐃᑦ ᓴᓇᖑᐊᕐᑎᓄᑦ ᐃᑲᔪᕐᑎ ᐊᔾᔨᖃᖏᓐᓂᖏᓐᓄᑦ ᑲᓇᑕᒥ ᑕᐃᒪᐃᑐᓕᕆᔨᐅᔪᓂᑦ, ᐊᓯᐊᓂ ᑕᑯᓐᓇᕋᓱᒃᓱᓂᒃ ᐊᐅᓚᓂᖏᓐᓂᒃ ᐆᒃᑑᑎᒋᔭᐅᔪᓐᓇᑦᑎᐊᖏᑦᑐᑦ ᐊᔾᔨᒌᖏᓗᐊᕐᓂᖏᓐᓄᑦ ᐊᑐᒐᒃᓴᓕᐊᖑᓯᒪᔪᑦ. ᑲᓇᑕᒥ ᓯᓚᑖᓃᖔᖅᑐᓂᒡᓗ ᑎᑎᕋᖅᑕᐅᓯᒪᔪᓂᒃ ᖃᐅᔨᓴᕐᓂᐊᕐᒥᔪᑦ ᐱᐅᓂᖅᐹᑦ ᐊᑐᖅᑕᐅᔪᓐᓇᖅᑐᑦ ᐊᐅᓚᑕᐅᓂᖏᓐᓄᑦ ᐊᓯᖏᓐᓄᓪᓗ ᑕᐃᒪᐃᑦᑐᓕᕆᔨᐅᔪᓄᑦ ᐊᑐᖅᑕᐅᓯᒪᓕᖅᑐᑦ ᖃᐅᔨᓇᓱᒡᓗᒋᑦ.

ᒪᓕᒃᑕᐅᓪᓗᓂᒃ ᐃᓄᓕᕆᔨᑐᖃᒃᑯᑦ ᐊᑐᐊᒐᖓ ᐊᕐᓇᐃᑦ ᐊᖑᑏᓪᓗ ᐃᖅᑲᓇᐃᔭᕐᕕᒻᒥ ᐊᔾᔨᒌᑎᑕᐅᒋᐊᖃᖏᓂᖏᓐᓂᒃ, ᐃᓱᒪᒋᔭᐅᖃᓯᐅᑕᐅᓂᐊᖅᑐᑦ ᐊᕐᓇᐅᓂᖏᓐᓄᑦ ᐊᖑᑕᐅᓂᖏᓐᓄᓪᓗ ᐊᒃᑐᐃᓂᖃᕈᓐᓇᖅᑐᑦ ᓄᐊᑎᕙᓪᓕᐊᑎᓪᓗᒋᑦ ᐊᒻᒪᓗ ᖃᐅᔨᓴᖅᑕᐅᑎᓪᓗᒋᑦ ᑐᑭᓯᓂᐊᖅᑕᐅᓯᒪᔪᑦ. ᐃᓄᐃᓪᓗ ᐃᓱᒪᒋᔭᖏᑦ ᐃᓚᒋᔭᐅᓂᐊᕐᒥᔪᖅ, ᐊᑐᐊᒐᖓ ᑐᑭᓯᓂᐊᕐᓂᕐᒧᑦ, ᐊᐅᓚᑦᑎᓂᕐᒥᒃ ᒪᓕᒐᐃᑦ ᒪᓕᒃᑕᐅᓗᑎᒃ ᖃᐅᔨᓂᐊᖅᑏᑦ, ᐱᓕᕆᑎᒋᓂᖏᓐᓂᒃ ᐆᒃᑐᕋᐃᔩᑦ ᐊᒻᒪᓗ ᕿᒥᕐᕈᔩᑦ ᐃᖃᓇᐃᔭᕐᕕᖕᒥ ᒪᓕᒋᐊᖃᖅᑕᖏᑦ, ᖃᐅᔨᓴᖅᑕᐅᓂᖏᓐᓂᑦ ᑮᓇᐅᔭᐃᑦ ᐊᑐᖅᑕᐅᑦᑎᐊᓚᐅᕐᓂᖏᓐᓂᒃ ᐊᒻᒪᓗ ᑲᔪᓯᓯᒪᓂᖏᓐᓂᒃ ᖃᐅᔨᓴᐃᓂᖅ ᐃᓱᒪᒋᔭᐅᖃᓯᐅᑎᓂᐊᖅᑐᖅ. ᐊᑐᖅᑕᐅᓯᒪᔪᓐᓇᖅᑐᓂᒃ ᐋᖅᑭᒃᓯᓂᐊᕐᒥᔪᑦ ᑲᑎᒪᔨᕋᓛᓂᒃ ᖃᐅᔨᓴᖃᑕᐅᓂᐊᖅᑐᓂᒃ ᐋᖅᑭᒃᓯᓂᕐᒧᑦ ᐃᓚᒋᔭᐅᓂᐊᖅᓱᑎ ᐃᓄᐃᑦ ᑲᑐᔾᔨᖃᑎᒌᓃᖔᖅᑐᓂᒃ ᓲᕐᓗ ᐃᓄᐃᑦ ᑕᐱᕇᒃᑯᓐᓂ ᑲᓇᑕᒥ ᐊᒻᒪᓗ ᐸᐅᒃᑑᑎᒃᑯᓐᓂ ᑕᒪᓐᓇ ᐊᐅᓚᓂᖃᑦᑎᐊᕐᓂᐊᖁᓪᓗᒍᒃ.  ᐱᔭᕆᐊᖃᕈᓂᒃ, ᐊᕙᑎᑦᑎᓂ ᐱᕙᓪᓕᐊᔪᓂ ᑲᒪᑦᓯᐊᕈᓐᓇᕐᓂᕐᒧᑦ ᑕᑯᒃᓴᐅᑎᑦᑎᔪᓂᒃ ᖃᐅᔨᓴᕐᓂᐊᕐᒥᔪᑦ ᐊᑐᒐᒃᓴᓕᐊᖑᓯᒪᔪᑦ ᐊᑑᑎᖃᖅᑎᒋᓂᖏᓐᓂᒃ ᖃᐅᔨᓴᕐᓱᑎᒃ.

4.    ᐊᑐᒐᒃᓴᓕᐊᖑᓯᒪᔪᑦ ᑲᒪᒋᔭᐅᓂᖏᓐᓄᑦ ᐊᐅᓚᓂᖃᑦᑎᐊᕐᓂᕐᒧᓪᓗ ᐊᑐᖅᑕᐅᔪᑦ

ᖃᐅᔨᓂᐊᖅᑏᑦ, ᐱᓕᕆᑎᒋᓂᖏᓐᓂᒃ ᐆᒃᑐᕋᐃᔩᑦ ᐊᒻᒪᓗ ᕿᒥᕐᕈᔩᑦ ᐃᖃᓇᐃᔭᕐᕕᖕᒥ ᒪᓕᒋᐊᖃᖅᑕᖏᑦ,  (EPMRB−ᑯᒃ) ᐃᓄᓕᕆᔨᑐᖃᒃᑯᑦ ᐱᓕᕆᕝᕕᖓᑕ ᑮᓇᐅᔭᒥᒃ ᖃᐅᔨᓴᖅᑎᖏᑕ ᐊᕕᒃᑐᖅᓯᒪᓂᖓᓂᑦ ᑖᓱᒥᖓ ᑐᑭᓯᓂᐊᖅᑕᐅᓯᒪᔪᒥᒃ ᐊᐅᓚᑦᑎᓂᐊᖅᑐᑦ ᒪᓕᒃᑕᐅᓪᓗᑎᒃ ᐱᓕᕆᕝᕕᐅᑉ ᐊᑐᐊᒐᖏᑦ ᐃᓚᐅᑎᑦᑎᓇᓱᐊᕐᓂᕐᒧᑦ ᐊᒻᒪᓗ ᐱᐅᓂᖅᐹᒥ ᐊᑐᖅᑎᑦᑎᓇᓱᐊᕐᓂᕐᒧᑦ. ᐱᔭᕆᐊᖃᕈᓂᒃ, ᐃᓚᖓ ᖃᐅᔨᓴᖅᑕᐅᓂᖓ ᓯᓚᑖᓃᖔᖅᓯᒪᔪᓄᑦ ᑲᒪᒋᔭᐅᑐᐃᓐᓇᕆᐊᖃᕐᒥᔪᑦ ᐃᓚᒋᔭᐅᓪᓗᑎᒃ ᐃᓄᓕᕆᔨᑐᖃᒃᑯᑦ ᐱᓕᕆᕝᕕᖓ ᐃᖅᑲᓇᐃᔭᖅᑎᖏᓪᓗ.

ᑕᒪᓐᓇ ᑐᑭᓯᓂᐊᖅᑕᐅᓯᒪᔪᖅ ᐱᓕᕆᐊᕆᔭᐅᓯᒪᑎᓪᓗᒍᒃ, ᐱᓕᕆᕝᕕᖓᓃᖔᖅᑐᓂᒃ ᐃᓚᖃᖅᑐᒥᒃ ᑲᑎᒪᔨᕋᓛᒥᒃ ᐋᖅᑭᒃᓯᓂᐊᕐᒥᔪᑦ ᐃᓚᒋᔭᐅᓪᓗᑎᒡᓗ ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎ ᐊᓯᖏᓪᓗ ᐊᕙᒃᑐᖅᓯᒪᔪᓃᖔᖅᑐᑦ. ᐃᓚᐅᑐᐃᓐᓇᕆᐊᖃᕆᓪᓗᑎᒃ ᐊᓯᖏᑦ ᑲᑐᔾᔨᖃᑎᒌᒃᑯᑦ (ᓲᕐᓗ ᐃᓄᐃᑦ ᑕᐱᕇᒃᑯᑦ ᑲᓇᑕᒥ) ᒪᓕᒃᑕᐅᓪᓗᓂ ᐃᓄᓕᕆᔨᑐᖃᒃᑯᑦ ᐊᑐᐊᒐᖏᑦ ᓄᓇᖃᖅᑳᖅᓯᒪᔪᓂᒃ ᐃᓚᐅᑎᑦᑎᓂᕐᒧᑦ ᑐᕐᕌᖓᔪᑦ. ᑲᑎᒪᔨᕋᓛᒧᑦ ᖃᐅᔨᓴᖅᑕᐅᓯᒪᓂᐊᖅᑐᖅ ᑐᑭᓯᓂᐊᖅᑕᐅᓂᖏᓐᓂ ᐱᐅᓯᕆᔭᐅᓛᖅᑐᑦ, ᓯᕗᓪᓕᖅᐹᓂ ᖃᐅᔨᔭᐅᔪᑦ ᐊᒻᒪᓗ ᑭᖑᓪᓕᖅᐹᒥ ᐅᓂᒃᑳᓕᐅᖅᑕᐅᓯᒪᓂᐊᖅᑐ  ᑎᑎᕋᖅᑕᐅᓯᒪᓂᖓᓂᒃ ᖃᐅᔨᔭᐅᓯᒪᔪᓪᓗ. ᑐᑭᓯᓂᐊᖅᑕᐅᓂᖏᓐᓄᑦ ᐱᐅᓯᕆᔭᐅᓚᐅᖅᑐᑦ ᐅᓂᒃᑳᓕᐅᖅᑕᐅᓯᒪᓂᖓ ᑭᖑᓕᖅᐹᖅᓯᐅᑎᖓᓗ ᖃᐅᔨᓴᖅᑕᐅᒃᑲᓐᓂᕋᔭᖅᓱᓂᒃ ᐃᓄᓕᕆᔨᑐᖃᒃᑯᑦ ᐱᓕᕆᕝᕕᖓᓃᖔᖅᓯᒪᔪᒧᑦ. 

5.     ᑐᑭᓯᓂᐊᕐᓂᕐᒧᑦ ᑮᓇᐅᔭᐃᑦ ᐊᑐᖅᑐᒃᓴᐃᑦ ᖃᖓᒃᑰᖓᓂᖏᓪᓗ

ᑕᒪᓐᓇ ᑐᑭᓯᓂᐊᖅᑕᐅᓂᖓᓄᑦ $75 000 ᑖᓚᓂᒃ ᐊᑐᕐᓂᐊᕋᓱᒋᔪᑦ, ᑕᕝᕙᖓᑦ ᐃᑲᔪᕐᑎ ᑮᓇᐅᔭᖏᓐᓂ ᐊᑐᖅᑐᒃᓴᓂᑦ ᐲᔭᖅᑕᐅᓂᐊᕐᑐᖅ.  ᐃᓄᓕᕆᔨᑐᖃᒃᑯᑦ ᐱᓕᕆᕝᕕᖓᓂᑦ ᑕᒪᓐᓇ ᑐᑭᓯᓂᐊᖅᑕᐅᓂᖓ ᐱᓕᕆᐊᕆᔭᐅᓯᒪᓗᐊᕐᓂᐊᕐᒃᑐᖅ ᑮᓇᐅᔭᓂᒃ ᓴᓂᕐᕙᐃᓯᒪᓪᓗᑎᒃ ᐊᑐᖅᑐᒃᓴᓂᒃ ᓯᓚᑖᓃᖔᖅᑐᓂᒃ ᐊᑐᕆᐊᖃᖅᐸᑕ ᖃᐅᔨᓴᖅᑎᓪᓗᒋᑦ ᓲᕐᓗ ᑲᑎᒪᔨᕋᓛᓂ ᐋᕿᒃᓱᐃᔨᒧᑦ ᑐᓵᔨᓄᓪᓗ.).

ᓈᒻᒪᒋᔭᐅᒍᓂᒃ ᑐᑭᓯᓂᐊᖅᑕᐅᓂᖏᓐᓂᑦ ᐱᐅᓯᕆᔭᐅᓛᖅᑐᑦ ᐅᓂᒃᑳᓕᐅᖅᓯᒪᓂᖓᓂᑦ, ᑐᑭᓯᓂᐊᖅᑕᐅᓯᒪᓂᖓ ᐃᓄᐃᑦ ᓴᓇᖑᐊᕐᑎᓄ ᐃᑲᔪᕐᑎ ᐊᐅᓚᓂᖓ ᐱᔭᕇᖅᑕᐅᓯᒪᓂᐊᕋᓱᒋᔭᐅᔪᖅ ᒫᔾᔨ 2011ᒥ.

ᓈᒻᒪᒋᔭᒃᑲ ᖁᓛᓃᑦᑐᑦ ᑎᓕᔭᐅᓯᒪᓂᕐᒧᑦ ᒪᓕᒐᖏᑦ

 ᒪᕆ ᔪᓯ ᓚᕙᒃ
ᐃᖃᓇᐃᔭᕐᕕᐅᑉ ᑎᒥᖁᑖᓄᑦ ᑎᑎᕋᖅᑎ

ᐅᓪᓗᖅ:

ᑎᓕᔭᐅᓯᒪᓂᕐᒧᑦ ᒪᓕᒐᐃᑦ ᐊᑐᖅᑕᐅᓂᐊᖅᑐᑦ ᐃᓄᐃᑦ ᓴᓇᖑᐊᕐᑎᓄᑦ ᐃᑲᔪᖅᑕᐅᕝᕕᐊᓗᒃ ᑐᑭᓯᓂᐊᖅᑕᐅᓂᖓᓄᑦ ᓈᒻᒪᒋᔭᐅᓚᐅᖅᑐᑦ ᖃᐅᔨᓂᐊᖅᑏᑦ, ᐱᓕᕆᑎᒋᓂᖏᓐᓂᒃ ᐆᒃᑐᕋᐃᔩᑦ ᐊᒻᒪᓗ ᕿᒥᕐᕈᔩᑦᑲᑎᒪᔨᕋᓛᖑᖅᑎᑕᐅᓯᒪᔪᒧᑦ ᒪᐃ 14, 2010−ᒥ.

ᐅᑎᖅᑎᑕᐅᓂᐊᕐᐳᖅ ᐊᐅᓚᑦᑎᔨᒧᑦ, ᖃᐅᔨᓂᐊᖅᑏᑦ, ᐱᓕᕆᑎᒋᓂᖏᓐᓂᒃ ᐆᒃᑐᕋᐃᔩᑦ ᐊᒻᒪᓗ ᕿᒥᕐᕈᔩᑦ ᑲᑎᒪᔨᕋᓛᑦ ᐱᓕᕆᕝᕕᖓᓂ ᐊᑎᓕᐅᖅᑕᐅᓯᒪᓕᖅᑎᓪᓗᒋᑦ.